HOME LANGKAN TINGKOK

  • Jumat, 17 Mei 2019

Si Gando

TINGKOK
TINGKOK

Sigando

di Luhak Tanah Data

Oleh   Bahren*

 

Dalam curito tantang Nagari Gunuang di sabuik lah sabuah tampek. Tampek nan dihuni dek niniak moyang kami nan di katinggian tu mancaliak lah niniak kami ko ka sakuliliang dan tampak bajurai-jurai sahinggo diagiah namo lah nagari Gunuang tu manjadi bajurai-jurai. Di tampek niniak kami partamo tingga banyak tumbuah cindawan mako dibarilah namonyo si Gando. Kato Gando sandiri barasa dari bahasa sanskerta yang aratinyo cindawan.

Tapi, dalam partamuan Zuriati jo Mak Sutinah surang urang tuo di nagari Gunung di tanggal duo baleh bulan Mei tahun duo ribu tujuah. Mak Sutinah nan kutiko itu baumua anam puluah tigo bakaba lah ka Zuriati. Biko malah kaba liua. Dalam manjalani kahidupan di nagari Gunuang ko, niniak kami maangkek lah surang pamimpin. Urang tuo, nan Niniak kami jadikan pamimpin ko dibari gala Bagindo Rajo. Namun dalam kasaharian Niniak kami acok maimbau Bagindo Rajo dengan caro manyingkeknyo manjadi Si Gando, nan aratinyo Si Bagindo. Lamo lambek, tampek Niniak kami manetap dan maangkek pamimpin tadi dibari namo Sigando, yang aratinyo Si Bagindo Rajo.

Mak Sutinah mandapek curito ko dari nan urang nan tuo-tuo di nagari Gunuang ko. Mak Sutinah indak doh picayo baso sigando ko barasa dari kato sankserta. Liau labiah yakin curito nan disampaikannyo ko labiah dipicayo-i dek banyak urang Gunuang dari pado curito nan partamo. Hal nan sarupo juo di ragukan dek Mak Datuak Mangkuto rajo kutiko bacurito tantang asa-usua nagari Gunuang. Liau kurang yakin jo curito tantang sigando nan barasa darai bahaso sanskerta. Agaknyo paralu diadokan samacam penelitian tantang asa jo usua nagari ko dari segi kebahasaan. Bitu bana kato Mak Datuak wakatu itu.

Limbak nan dari pado itu. Namo juo curito. Sipaik curito ko bakarang. Kok ado nan batua jo nan bana di curito tu, sungguah kabanaran datang dari Tuhan. Allah ta’a la kayo sungguah tampek paham sarato ilimu bahimpunnyo. Jikok nyo ado curito nan salah, salah nan datang dari kito manusia, tampek salah jo gawa bahimpunnyo. Ka Tuhan ampun di pintak, ka dunsanak maaf diharok. Wallahu’alam.

           

                *Dosen Jurusan Sastra Minangkabau FIB Unand


Wartawan : Bahren
Editor : Bahren

Tag :# Langkan # Tingkok # Asa # Usua # Nagari # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com