Utang Dibayia Piutang Ditarimo

Utang Dibayia Piutang Ditarimo

Oleh: Bahren*

            Pagi-pagi bana Si Udin Kuriak lah ribuik di kadai Si Da. Sambia mangunyah lontong jo managuik kupi angek nan baru sajo dimintak ka Si Da pagi tu. Baa ko coiko bana Ang pagi ko Din, solo Mak Andah nan duduak di ujuang paleh-paleh.  “Abih an lah lontong di muncuang tu dulu!, baru mancaracau!’. “iyo, ko masih panuah tambolok dek makanan lah heboh sajo”, sambuang Si Man Iriak sato sakaki. Inyo bak iko mah dek Mak Andah, baa den ndak ka heboh, dek mamak tu. Alah ka pamiliahn umum lo urang sakali lai bulan katibo. Alah pulo mancogok calon-calon nan ka maju dalam pamilihan nantun. Tapi apo? jo sia nan ka dipiliah? Urang e itu ka itu sajo nyo Mak Andah. Alun lai janji-jani e nan banyak kutiko kampanye, ado juo baru lai nan alun takarajoan dek inyo. Apokoh nan sarupo iko tatek juo ka kito piliah Mak.

            Oooo, itu nan ang hebohkan Din, manga lo dipikian bana tu Din! Dunia tu mah, ka surau je lah lai Din, pabanyak amal jo ibadah. Nannnagari ko ka mode ko sajo nyo Din. Kini ko politik ka politik ko pakai sajo ilimu utang pitang Din. Baa lo ilimu utang piutang mukasuik Mak Andah. Cubo lah mamak agiah tarang ka ambo Mak, bia nak sanang pulo dalam hati, sajuak dalam kiro-kiro. Nyo biko mah din, dalam hal utang piutang ko kan lah tasabuik sajak dulunyo, jikok bautang dibayia, jikok bapiutang tantu manarimo.  Kan iyo baitu Din? Tanyo Mak Andah. “Iyo Mak”, jawek si Udin Singkek. Tapi…. Apo hubungannyo jo pamilihan ko Mak, sia nan bautang, sia nan bapiutang?.

            Danga dih Din, baa ilimu utang piutang kato ambo. Kutiko baliau-baliau tu sabalun kampanye parnah bajanji jikok ambo tapiliah mako ambo ka baiko, mantun sagalo macam dangan sagalo janji kampanye nyo. Mako itu, manjadi utang dek baliau-baliau tu. Jikok inyo kini kumbali mancalon atau dicalonkan. Mako kito, bisa sajo mancaliak apokoh utang-utang baliau salamo kampanye sabalun ko alah ko di bayia nyo. Apokoh janji-janji manih nan disorak-sorak an ne di tangah lapang jo padium wakatu musim kampanye daulu alah ko lah ujuik dalam maso baliau manjabat dan tapiliag. Jikok alun aratinyo utang baliau masih ado di kito nan manjadi pamiliah nyo. Dan kito bisa sajo sapakaik untuak indak mamiliahnyo baliak untuak kini ko karano masih bautang.

            Lain pulo hal nyo, kutiko janji baliau-baliau masop kampanye tu dan kutiko baliau lah manjabat bisa diujuik an dan dipabueknyo salamo maso limo taun ko. Mako sacaro umum baliau lah mananam piutang ka awak ko nan manjadi rakyaik nyo salamo limo tahun. Berhak pulo lah agaknyo baliau untuak mandapek piutangnyo untuak dipiliah baliak dalam pamiliahn taun kini ko. Kini baa dek kito lai? Tantu karajo atau upayo nan paliang mungkin dipabuek iyolah mancaliak ma nan banyak utang e nan alun salasai atau piutang e nan ka kito agiah baliak. Itu sajo nyo tu Din, indak payah bana bagai doh manyalasaikannyo. Indak pulo paralu Udin baturo-turo di lapau ko doh, dek gara-gara pamiliahn umum ko. Karajo ko sakali limo taun nyo Din, nan awak satiok ari basuo. Batangka-tangka pulo wak dek gara-gara mamiliah palo daerah ko kan indak lo sero doh Din. Lai jaleh dek Udin tu?.

            Jikok baitu kato Mak Andah, alah mukalum ambo rasonyo. In dak doh ado kusuik nan ndak salasai dek Mak Andah doh.  Lah patuik lo Mak Andah macalon nampak dek Ambo mah Mak. Bato Din, balaluan juo nan saketek tu yo. Ndak baitu doh, lamo den di siko tasama lo ati den dek Si udin ko beko lai. Itong lah balanjo den lai Da. Den pai lai. Si Da pun maetong balanjo Mak Andah dan Mak Adang pun maagiah pitih duo puluah ribu saalai, sambia pai ka ladang nyo pagi tu.

*Dosen Sastra Minangkabau FIB Unand