Diamuak Baledang Masiak

Diamuak Baledang Masiak

Oleh Nurhayati, S.S**.

Hari nan sadang tangah hari, sadang bagalanggang matohari, sadang bunta bayang-bayang, sadang langang urang di kampuang, sadang rami urang di balai.

Tek Nun bajalan bagageh-gageh, nak mambali lauak ka dimasak, panyampa paruik urang di rumah, bia nak damai kiro-kiro.

Sato tibo inyo di pasa, pasa nan sangaik rami bana. Di liek suok jo kida, sungguah banyak urang manggaleh. Kiri kanan urang basorak, manyorak-an galeh surang-surang.

Di suok manggaleh lado, di kida manggaleh kain, taruih ka dalam manggaleh pamasak, basuo jo urang manggaleh ayam, lalu basobok urang manjua maco.

Dek lamo lambek bakuliliang, tapaku lah Tek Nun jo lauak baledang. Bantuak pipiah agak panjang. Dagiang nan indak taba bana. Namun, mamanciang salero makan.

Baledang lah masuak dalam karanjang, takana pulo jo kinco no. Babali patai tigo papan, sarato lado ijau jo taruang aka. Minyak panggoreng usah dilupo-an.

Mancaliak ragam macam balanjo, lah sanang raso kiro-kiro. Tabayang samba dalam piriang, raso manjejeh aie liue, lah raso di bibia tapi cawan.

Lah raso cukuik nan dibali, Tek Nun babaliak hanyo lai. Malangkah salangkah duo langkah, tadanga suaro buruak tingkah, bunyi bacakak tangah balai, antah apo kok lah garangan.

Dek rami nan tadanga, manalingo Tek Nun cako, rupo nyo ado nan ndak tarimo jo suaro panggilan dari musajik, urang lupo jo asa usua, lupo ka bakeh tampek pulang.

"Baa dek manciracau gaek nantun, alun kok ba agiah makan siang?" tanyo si Yura.

"Usah didanga nan bak nantun, kana badan ka kanai ciraco, awak nan bukan sia sia."

Mandanga kato nan bak kian, si Yura manuruik di balakang. Padohal taragak makan cindua tapai, langganan maso ketek-ketek.

Pihak di badan Tek Nun cako, manalingo-manalingo sambia bajalan, ciek jo duo tadanga juo, kironyo dalangnyo masih urang nan samo.

"Pado ma abih-abih an maso, mancari info nan ndak badaso, ancak den pulang mambuek samba maco." Baitu pikiran no Tek Nun cako.

Dek rami urang tangah pasa, agak ta-ambek kaki malangkah, acok tatagun pado bajalan.

Pihak si Yura nan litak cako, disambia-kan juo mambali cindua, bakuah saka babungo ampiang, ka pangganja paruik tibo di rumah, paumbuak lambuang manjalang samba masak.

Sato tibo inyo di rumah, ba kaluan bali dari karanjang, taraso paruik mulai litak, di sinan takana di nan bana, baa ndak babali martabak agak saloyang.

"Oi, Yura adiak kanduang, baa ndak bakana kan Etek mambali kacok, lah manggareok galang-galang, tak ado nan bisa ka dimakan."

"Usah Etek marusuah bana, iko cindua lai denai bali, kapangganja paruik litak, manjalang lauak baledang jadi samba."

Taraso sanang hati Tek Nun. Taubek payah nan sahari nangko. Ndak manyasa badan baradiak padusi, lai paduli jo paruik dunsanak.

Ba-ambiak cindua nan sabungkuih, bacucuik langsuang dari pambungkuihnyo. Ndak manunggu piriang jo sendok. Nan takana asa paruik kanyang.

Sacucuik duo cucuik, tabik pangana jo nan bana, lah tarang jalan ka dapua, mulai lai manggoreng lauak baledang.

Sabaliak duo baliak, bagoreng pulo patai mudo, bamasuak-an lado mudo giliang tangan, ndak lupo bawang jo taruang aka, basangai sabanta samba masak.

Di sinan dunia tampak tarang. Nan cakak di pasa alah lupo, nasi talatak tangah rumah, duduak sahamparan ibu bapak, anak minantu kasadonyo.

Tapacak paluah di kaniang, indak nampak mintuo lalu, paruik kanyang hari lah siang, ndak kamano iduik ka dicari. Pasanang molah badan diri, pakaro usah dipanciang-panciang, dunsanak nan ka dipabanyak, musuah usah dicari-cari.

** Nurhayati namo diagiah urang gaek, singkek tapi manjadi doa panjang sampai ka akhirek. Acok dipanggie ‘Tek Nun.’ dek kawan jo kerabat dakek. Layie di Nagari Dingin Alahan Panjang, masyarakaiknyo rato-rato baprofesi sabagai patani bawang. Alumni Sastra Minang di Universitas Andalas, Kota Padang. Kini, nyo mangabdi sabagai guru di MAN 1 Kota Bukittinggi samenjak tahun 2009 sampai sakarang. Salah satu karya bukunyo nan bisa dibanggakan bajudul ‘Padusi Alang-Alang’. Jajak tulisannyo dapek dilacak di akun facebook Noer Cakrawala, Instagram noerhayati.noer