Mubazir

Mubazir

Oleh: Bahren*

Allah ta’ala dalam Alqur’an surek Al’Isra’ Ayat nan ka 27 manyampaikan kabakeh kito nan basamo baso “sungguah urang-urang nan mubair itu adolah dunsanak dek setan. Dan setan itu sangaik ingka ka Tuhannyo. Mako, bacamin kito ka ayaik nan sa ayaik cako molah kito maresek-resek tapi kain masiang-masiang, apokoh kito masuak ka jinih urang nan mubazie tu. Talabiah bana sapakan lai awak sado urang Islam ka mamasuki bulan puaso. Tingkah sarato jo laku mubazir ko kadok jo galik kito caliak. Tarutamo sakali kutiko ka masuak wakatu babuko puaso. Dek ulah hawa jo napasu tadi juo sagalo nan tampak di jalan nan dijua urang untuak pabukoan dibali, sado e raso kalamak, sadoe raso ka sero masuak rakuangan ko.

Tapi, baitu sarine babunyi, nan takana ayia putiah sagaleh jo rokok sabatang. Sasudah tu lansuang makan nasi sapiriang gadang. Kok di tanyo dek rang rumah, kolak nan babali tadi kadimakan kini da?. Jaweknyo pulang tarawiah je beko. Pulang dari tarawiah mato ko alah mangantuak pulo, akianyo kolak jo sarabi, es campua, jo bubua nan alah babali sore tadi indak tamakan lai. Mubazir akianyo. Baitu pulo kok kamasuak puaso, babali sagalo banyak bahan nan kadimasak, takuik kalau lah masuak puaso, sahari duo hari ka puaso harago biasonyo manjadi tinggi. Tapi nan babali tadi wakatu puaso tuo dimasak sagalo saketek untuak ka sahur nan partamo. Jikok lai ado bakulkas di rumah tantu lai bisa di simpan agak babarapo ari, tapi nan indak bakulkas baa lah agak ati, tantu mubazir pulo lah jadinyo. 

Sabuah lai, nan kadok pulo kito caliak soal mubazir ko, dan ampia tiok hari kito mancaliaknyo. Apo tu nan ambo mukasuik. Jikok lai galik bajalan apak atau ibu tiok pagi, caliak lah di tiok simpang lampu merah, alah jaleh lampu ko iduik apo juo guno kandaraan ko di atur lai dek pak lisi jo pak perhubungan ko. Jikok dikatokan bia indak macet, nan namonyo pagi tatap sajo macet di ampian satiok simpang, karano urang bakaja-kaja pai ka kantua maanta anak sarato bini, atau sakadar mangaja panumpang dek maojek pagi. Jikok alasannyo masih tatap sajo untuak karapian dan kecepatan dalm balalu linteh, baa dek kutiko lampu merah ko mati, ari pagi sarao rinai pulo apak-apak ko jarang tampak di lampu merah tadi. Atau bisa jadi siang hari ditampah pulo jo lampu mati, angin kancang wara-wiri apak ko lansuang lailang sakali. 

Harusnyo kan diwakatu nan sarupo iko tadi apak ko hadir untuak mambantu kami bia bisa capek sampai di kantua di pagi ari, atau indak badulu kudian ikik-ikik-I dalam maambiak jalan inggo tasipi sampai di tapi. Kok tatap sajo pak lisi ko matatur lalu linteh wakatu lampu iduik iko mubazir pulo namo e mah. Alah jaleh sajaleh jalehnyo lampu nan gunonyo untuak maatur ma nanbuliah bajalan sarato ma nan harus baranti, tapi apak sato lo maatur, mubazir tu Pak. Kok iyo juo ka aatur vukuik lah kalau jalan ko mulai indak takandalai, ado urang nan manyarobot, atau ado nan lalu e di lua pambateh lajan, bagian itu nan apak-apak tindak jo adili indak baa doh Pak. Dek ulah nan bak kian itu makonyo lalu linteh manjadi kacau satiok pagi mah Pak. 

Mako limbak nan dari pado itu, molah kito sadonyo sasuai jo posisi jo ranah masiang-masing, mulai mangurangi nan mubazir-mubazir cako, bia awak indak masuak dalam golongan setan nan dikatokan dek Allah dalam surek Al-Isra’ ayaik 27 tadi. Semoga  

*Dosen Sastra Minangkabau FIB Unand