HOME LANGKAN KATO

  • Sabtu, 24 April 2021

Mambaco Nan Tasirek

Membaca (ilustrasi, internet)
Membaca (ilustrasi, internet)

Mambaco Nan Tasirek

Oleh TE Radjo Boedjang

Hukum ditagak an di nan nyato. Zahir. Tak bisa mahukum nan dak tampak. Gaib. Batin.

Pakaro zahir, lah jaleh nah. Kutiko ado urang maliang jawi, ado bukti, ado sasi, di sinan baru bisa hukum bicaro. Baru lakek dugaan. Tak ado asok kok tak ado api. Kok tampuo basarang randah, tantu ado sabek jo karano.

Idak itu sajo. Bahkan kurenah pun bisa jadi janjang untuak maambiek kasimpulan. Saidak-idaknyo indikasi. 

Tapi, baa maniliek batin? Baa maniliek niek? Baa manakok ati urang?

Di siko lah kito acok gawa. Iyo ado pituah kok gabak di ulu tando ka ujan. Cewang di langik tando ka paneh. Tapi, dalam lawik nan dapek ditakok nyoh. Dalam ati, siapo nan tau? Hanyo inyo surang sarato Tuhan nan tau isi ati. Pakaro batin, tak ado yang tau, kecuali urang tu bana jo Tuhan.

Pakaro manakok-nakok isi ati ko nan acok jadi masalah. Acok salah takok. Atau takok-takok uwok. Asa manakok-nakok saan!

Sungguah pun manih galak kumandan, lun tantu samanih nan nyo galak an di dalam atinyo. Atau sabalieknyo. Buruak caliek urang, lun tantu buruek mukasuiknyo.

Makonyo ado pituah; kok manih jaan lansuang dilulue. Paik jaan lansuang diludahkan.

Timbang daolu. Nanang saribu aka, pikie palito ati. Jaan pakai ilemu koncek. Baitu takana lansuang malompek. Jaan!

Cubo-cuboi dulu. Raso-rasoi. Kalau paralu ganggam baro se. Apolai basikap takaik jo nan tasirek, dak usah ondong ayie ondong dadak. Maloncek koncek, maloncek pulo garundang.

Kok nan zahir, kan lah jaleh. Bisa tagak hukum di nan zahir tu. Baa aka pakaro nan tasirek? Dikecek an idak, iyo. Dikecek an iyo, idak. Angguak anggak, geleang amuah. 

Bedo kan? Sabananyo pakaro tiliek maniliek ko lah ayie mandi dek kito. Takilek ikan dalam ayie, lah tantu jantan batinonyo.

Kok dalam ati memang tak dapek diduga. Tapi nan tasirek bisa dibaco. Baa caronyo?

Partamo, caliek kamaa arah angin. Sungguahpun gabak di ulu, kok angin gagek ka mudiek, lah tasirek ujan tak jadi.

Kaduo, kamaa kelok lilin, ka situ kelok loyang. Sacaro zahir, tak ado sasuatu nan tajadi tanpa konteks. Peristiwa tu adolah kumpulan konteks-konteks. Dari konteks tu, jaleh mano bungka nan piawai. Itulah pusek jalo. 

Kok bisa manantuan pusek jalo, kaji manurun untuak mambaco nan tasirek nah. Sarupo urang manangguak, tau di lubuak nan ba ikan. 

Katigo, pakai paham taimpik nak di ateh. Takuruang nak di lua. Oyo, jan salah, pituah ko sabananyo bukan bamakna cadiek buruak. Tapi mukasuiknyo bapikie di lua kotak. Out of the box!

Nan tasirek hanyo bisa dicaliek labieh janieh kutiko kito barado di lua kotak. Ka dicaliek kotak, maa ka tapek ko kito di dalam kotak. 

Kok lai tagak di lua kotak, mako tibo di mato dak kadipiciangan. Tibo diparuik dak kadikampihan. Objektif. Janieh mancaliek, janieh maniliek. Dak bulieh pakai parasaan. Baper kecek rang kini.

Jan sampai tabao parasaan. Raso bulieh dipakai, tapi parasaan jaan. Parasaan adolah hal-hal yang takaik jo ikatan kito jo duniawi. Kok raso, samo jo insting. Makin diasah, makin tajam. Apolai kok diasah jo zikir.

Nah, itulah nan kaampek. Mambaco nan tasirek, nan kuaso Allah sungguah. Nan tasirek jo nan tasurek, sarato nan tasuruak Baliau nan punyo. Tantu dak ka mungkin kito nan awam dapek wahyu, kiramah atau maunah (wangsit kecek rang Jawa). Karano itu, tagak se di paham, sagalonyo kuaso Nan Kuaso.

Aratie bana lah tu kini, sahabih-habih maniliek nan tasirek, bagi Baliau tarang sungguah. Karano itu, sarahan ka Baliau, abih pakaro. Tapi, itu langkah paliang kudian.

Tigo langkah partamo, mambaco atau maniliek nan tasurek adolah kaarifan Minangkabau sangkek daolu! Kini, lah tasirek Pancasila idak diajaan lai di sakola. Lalu Menteri Nadiem bajanji ka maubah PP. Menteri Budi Gunadi Sadikin mangaku salah sasaran soal testing covid-19. PAN bagabuang ka koalisi Jokowi. Dan, ssstt, kabae ka ado reshuffle. Lah tasirek? Bacolah.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #Tasirek

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com