Datuak Marajo; Pinang Pulang Ka Tampuaknyo (3)

Datuak Marajo; Pinang Pulang ka Tampuaknyo (3)

Oleh TE Radjo Boedjang

Tanggal 12 Februari 2021 ko, Gubernur Irwan Prayitno dan Wakil Gubernur Nasrul Abit abih maso karajo liau. Lah tibo di wakatu, sampai di padan. Tambilang pun tanti batanti. Karajo baganti-ganti.

Tapi hinggo kini KPU Sumbar alum bisa mamutuihan, sia nan kaganti Gubernur IP. Hanyo salapan dari tigobaleh kabupaten/kota se Sumatera Barat (Sumbar) nan manyalanggarokan Pemilihan Kepala Daerah (Pilkada) 2020 lalu, nan lah bisa ditatek an calon tapiliahnyo.

Sadangkan lima kabupaten/kota lainnyo, tamasuak Pilkada Sumbar, hinggo kini alum bisa dijadwalkan penetapan calon tapiliah lantaran manunggu hasil sidang Mahkamah Konstitusi (MK), karano adonyo pangaduan Perselisihan Hasil Pemilu (PHP) dari pasangan calon (paslon).

Kepala Divisi Hukum KPU Sumbar, Amnasmen mangatoan, kemungkinan putuih sidang PHP itu adalah tanggal 15-16 Februari malalui Putusan Sela, atau tanggal 25-29 Maret kutiko Putusan Akhir.

Putusan Sela itu, biasonyo bakaik jo "jalan hukum" nan diambiek MK untuak maagieh "ruang keadilan" bagi pihak yang mangadu, tanpa harus manunggu Putusan Akhir. Jikok Putusan Sela tu lah dikarajoan sasuai jo barih nan dipaek, hasilnyo itulah kaputusan final. 

Maliek substansi gugatan nan diajukan, ado kamungkinan Putusan Sela bukan "jalan hukum" nan diarokkan para penggugat. Apolai yang jadi pokok gugatan antaro lain adolah mandiskualifikasi paslon nan lah dapek suaro paliang banyak, mako mungkin MK mamakai jurus panyudahan--Putusan Akhir.

Karano itu, putuih pakaro Pilkada Sumbar ko di MK bisa jadi pado rantang wakatu 25-29 Maret nan katibo. Mako, Gubernur IP mungkin akan sarahtarimo jo Penjabat (Pj) Gubernur sajo. Biasonyo Pj Gubernur dikirim dek Kemendagri RI. Dan, biasonyo nan diangkek jadi Pj Gubernur adolah para pejabat eselon satu. Satingkek sekjen atau dirjen lah.

Ateh apo nan sadang tajadi itu, Gubernur IP manulih di koran Padang Ekspres, Salasa (2/2). Dalam tulisan bajudul Menunggu Hasil Keputusan MK itu, IP mamintak supayo para pihak dak usah bamanuver dan mambangun opini. Karano sacaro hukum, kecek IP, kiniko adolah ranah MK. Dan MK dalam mamutuih pakaro, tukuak IP, dak katapangaruah opini.

Gubernur IP juo manyayangkan hal nan tajadi. "Masyarakat yang tadinya sudah tenang, kembali menyatu, dipaksa untuk menjadi terbelah kembali dengan munculnya opini baru. Upaya melakukan playing as victim dilakukan untuk mempengaruhi persepsi masyarakat. Tidak hanya itu, ada juga kemungkinan membawa lembaga lain sebagai 'penjahat' dalam pembentukan opini. Padahal belum tentu itu faktanya," baitu antaro lain Gubernur IP bapandapek di tulisan liau tu.

Nah. Baa toh di nan kini? Daripado taelo-elo karano radio lutuik nan lah mulai basuaro, sabananyo di siko lah ujian partamo Dt Marajo. 

Saidak-idaknyo ado tigo pakaro nan paralu manunggu lakek tangan Dt Marajo. Partamo "malantai sabalum luluih". Iko dimukasuik an untuak nan sadang dan akan tajadi di MK. Apopun buahnyo, itulah nan disapakati basamo! Kalaluannyo bana lah tu kini, bia instrumen hukum nan bajalan, nan rasaki alang, in Sya Allah dak ka dek musang doh! Musang jo alang, itu takadie Allah Nan Kuaso.

Malantai sabalun luluih untuak ka lua (eksternal), ka urang banyak, adolah mambingkai kayu basilang dalam tungku. Sungguahpun dek basilang kayu makonyo api iduik, tapi kasakadar mananak nasi atau maabuih ayie api tu andaknyo. Idak api untuak kamambaka rumah gadang!

Sabagai pamangku adat, Dt Marajo sungguah urang nan cadiek candokio. Mambagi adie, bakato bana. Tantu paham jo kieh kato sampai. Apolai satantangan malantai sabalum luluih ko, lah ayie mandi dek liau nah. In Sya Allah...