HOME LANGKAN KATO

  • Sabtu, 18 September 2021
Carito Calon Dotor
Carito

Carito Calon Dotor

Oleh: Bahren*

Baramulo

 

               Jo Bismillah salam dibukak, jo salawat kato disambuang. Sabalun manjadi panyasalan di kalak kamudian hari, mako dimulai lah untuak manulihkan sagalo apo nan dialaminyo dek Tan Barain sajak samulo ado niaik dalam diri untuak malanjuikkan sikola ka kanjang na labiah tenggi. Naiak ko tantu sajo indak datang baitu sajo, sungguah niat nan alah lamo sabananyo tahujam dalam hati tasimpan dalam pangana, jikok disabuik-sabuik bana manjadi kawan dalam rasian kutiko malam tarayan-rayan dalam pangana wakatu bamanuang, bitu banalah kancangnyo niaik Tan Barain agaknyo kini.

               Sajak tamek dari sikola pasca sarjana, Tan Barain, alah pulo pulang kumbali ka kampusnyo, sajak pulang ka kampus dan mulai baliak manjadi guru, lamo lambek wakatu bajalan indak doh taraso alah ampia pulo sapuluah taun sajak pulang liua ko lah manjadi guru baliak. Sungguah pun baitu, nan tacindo dalam hati tatap sajo lah untuak malanjuikkan sikola ka tingkek nan labiah tinggi. Indak doh ado mukasuik nak manjadi sombong atau niatan nak manjadi labiah dari nan lain, tapi hanyo samato-mato untuak mamanuhi tuntutan manjadi surang guru di tingkek unipersitas musti baitu lah handaknyo.

               Sajak kumbali dari sikola Tan Barain alah pulo dipicayo dek kangkawannyo samo guru untuak manjadi sekretaris di jurusannyo. Salamo manjadi sekretaris alah pulo Tan Barain, manyudahkan babarapo bangkalai nan tatingga sangkek katua jurusan sabalunnyo, tarutamo bangkalai nan bakaitan arek jo Akreditasi atau panilaian tingkek jurusan dek urang pusat, Alhamdulillah, walaupun alun sampai ka tingkek unggul nan jurusannyo lai sampai ka titiak banilai baik.

               Sabalun tambah panjang carito ka nan lain, elok dielo suruik ka curito tantang sikola. Niak ko alah ado samanjak limo taun tarakir, tapi karano babagai kasibukan jo parasaian nan niaik tingga niaik alun juo kasampaian, duo taun sasudah itu, alah pulo dicubo paruntuangan untuak kumbali manambah sikola, nan uang pandaftaran alah babayia ado pulo masalah lain nan datang sainggo indak jadi juo lanjuik sikola. Sampai pado satu kutiko hari baik bulan samparono, nan awak alah siap bana untuak basikola, alah pulo dapek calon promotor di Jawa, sampai ka wakatu barangkek tajadi pulo pandemi Copit, indak juo jadi sikola ko doh. Gagal juo baru untuak manyampaikan niaik. Tapi bukan Tan Barain namonyo jikok capek patah arang, jikok mangalah sabalun batandiang, mako di awal taun nangko dicubo pulo dek Tan Barain untuak sikola di tampek nan dakek-dakek sajo, atau di kota tampek Tan Barain bakaro.

               Dimulai jo mandaftar, sasudah mandaftar diisi pulo sagalo blanko nan patuik diisi, dimintak pulo rekomendasi dari senior-senior untuak mandukuang baso Tan Barain lah patuik untuk malanjuikkan sikola, sarato alasan akademik nan lain, dan dibuek pulo samacam proposal sabagai bantuak pinangan untuak sikola di unipersitas nantun. Salang duo bulan sasudah itu, diumumkan lah akianyo, Tan Barain lulus dan dinyatokan layak untuak sikola katingkek nan labiah tinggi. Indak doh bara kagadang ati, kutiko dapek kaba nan baik nantun, jadi juo lah kironyo Tan Barain malanjuik an sikola.

               Bajarak sakitaran duo minggu sasudah pangumuman tando lulus, mako diuruslah dek Tan Barain sagalo kalengkapan untuak manjadi mahasiswa baru, kok uang sikola nan kabidayia alah dibayia dek Tan Barain, Kok pitih pembangunan nan kadilunasi dilunasi pulo dek Tan Barain, singkek kato dalam maso saminggu sagalo urusan untuak sikola alah salasai dek Tan Barain, indak lupo pulo sugiro diurus dek Tan Barain sagalo bantuak surek manyurek nan diparalukan salamo liau manjalani izin baraja taun nangko. Aratinyo bana, apo nan dicito-citokan dek Tan Barain sajak limo taun tarakir tacapai juo jadinyo, walapun masih tangiang-ngiang di taligo liau, kato rang gaek-gaek dulu, kadang-kadang dapek nan dihati alun tahu bisa sakandak ati, bitu pulo dapek sakandak ati alun tahunan di hati.   Intinyo kini Tan Barain manganggap ikolah nan lah dipiliah kan dek Tuhan nan paliang elok sarato baik untuk Tan Barain di maso kini, antah jalan ko pulo lah agaknyo nan ka maanta Tan Barain untuak manggapai cito-cito nan lain saudah iko...(Basambuang...)

  *Dosen Sastra Minangkabau FIB Unand

 


Wartawan : Bahren
Editor : bahren

Tag :#Langkan #Carito #Minang