HOME LANGKAN KATO

  • Jumat, 11 Desember 2020

Biduak Lalu Kiambang Batawik

Pilkada (ilustrasi.net)
Pilkada (ilustrasi.net)

Biduek Lalu Kiambang Batawik

Oleh TE Radjo Boedjang

Kiambang, ado yang manyabuiknyo kapu-kapu, kayu apu, kayambang, atau apu-apu, punyo namo latin pistia stratiotes. Iko adolah tumbuhan ayie nan biaso basuo tarapuang di ayie tanang.

Banyak pulo urang mamakai untuak tumbuhan pelindung akuarium. Untuak ka tampek manyuruak dan bamain ikan-ikan.

Kiambang banyak basuo di daerah tropis dan subtropis. Di Minangkabau, kiambang ado di batang ayie. Tarutamo batang ayie nan tanang. Di batang ayie gagek, jarang tasuo kiambang.

Rupoe, kiambang ko bisa manyasok limbah industri dan limbah logam. Bulieh disabuik, kiambang baguno juo untuak maambek pencemaran ayie.

Labieh dari itu, pituah "biduak lalu kiambang batawik" adolah kieh untuak maumpamokan baa kurenah kiambang, salain mamfaatnyo nan disabuik di ateh. 

Kalaluannyo bana, kok dikiehkan kiambang ka kito--tarutamo nan lah punyo hak pilieh, nan mandukuang atau mamilieh salah satu paslon--mako kok lah tarang bak ari, lah taduah bak ujan, rancak dipakai sipek kiambang tu!

Sarupo nan kito tau, sungguahpun hasil final pilkada adolah pleno KPU masiang-masiang (KPU provinsi dan KPU kabupaten/kota), namun maliek ituang capek (quick count) jo real count timses paslon, babarapo paslon lah bulieh "maukue jas pelantikan" nah. Tarutamo nan jarak prosentase nomor satu jo nomor duo di ateh limo persen! Karano kecek urang tukang ukue, baitu pulo jo standar kesalahan (bateh toleransi), angko limo persen adolah margin error yang ditarimo.

Nah, kok ditiliek dari angko samantaro di Pilkada Sumbar,  hinggo Kamih (9/12/2020) pukul 05.06 WIB, paslon nomor 04, H Mayeldi-Ir Audy Joinaldy maraieh suaro paliang banyak, 35,4%. Di etong capek pun, paslon nan diusuang dek PKS jo PPP ko manang. Salisiah 2 persen jo paslon Nasrul Abit-Indra Catri (NA-IC).

Paslon Mahyeldi-Audy, sarupo nan dicatat dek tribunnews.com manang di sabaleh kabupaten/kota, dari 19 kabupaten/kota di Sumbar. Disabuik an, paslon Mahyeldi-Audy manang di Kabupaten Solok, Sijunjuang, Tanah Data, Agam, Dharmasraya, Kota Padang, Kota Solok, Kota Sawahlunto, Kota Padang Panjang, Kota Bukittinggi, dan Kota Payokumbuah.

Sungguahpun kito pun tau, kaputusan terakhir adolah pleno KPU. Tantu itu samo kito tunggu. Namun samantang pun baitu, satantangan kito nan banyak--nan takalompok mandukuang paslon surang-surang--ka baa ko lah lai?

Ado nan langsuang bagalak-galak. Bakucindan mampakecek an hasie pilkada. Nan tagak di paslon manang, lamak galak e. Tapi nan tigo lai, galak juo. Tapi lah galak nan bagalak an. Pencong galak. 

Sainggo itu sajo?

Pangalaman ba pilkada salamo ko, ado nan bakasumek bataun-taun. Tingga dakek barampiang, tapi dak basapoan. Karano pilkada, mamak bakasumek jo kamanakan. Sumando mak rumah tagak balawanan. Lah tibo pulo pilkada ciek lai, nan kasam dak juo bakasudahan. Tabao dandam pilkada ka urusan pribadi.

Makonyo dak salah urang tuo-tuo kito mambuek pituah, "biduak lalu kiambang batawik". Pakai sipek kiambang. Jan bataun-taun pulo kasumek dak sudah. Alah nah.

Baitu pulo ka nan manang. Saatnyo mambaok lawan-lawan jadi kawan. Saciok bak ayam sadanciang bak basi, tolong pakaikan. 

Kini ko, sungguahpun mananti angin tanang, tapi lah paralu dipakaikan rasan ayie ka pamatang. Rasan minyak ka kuali. Karano nan tapilieh, adolah pamimpin nan banyak. Tamasuak jadi apak kanduang untuak urang nan kalah!


Wartawan : TE Radjo Boedjang
Editor : sc.astra

Tag :#Pilkada #BiduekLaluKiambangBatawik

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com