HOME LANGKAN KATO

  • Sabtu, 10 April 2021

Barabuik Tuah, Ujian Ikhlas

Ikhlas (ilustrasi/internet)
Ikhlas (ilustrasi/internet)

Barabuik Tuah, Ujian Ikhlas

Oleh TE Radjo Boedjang

Dalam demokrasi lansuang ko, nan dietong jumlah suaro. Ciek suaro dari urang basikola dotor samo se jo suaro urang tak tamek esde. 

Akibeknyo, para politisi balomba maumbuak rakyat. Anggota legislatif (aleg), tamasuak presiden dan kapalo daerah (gubernur-wakie gubernur, bupati-wakie bupati jo walikota-wakie walikota) taruih se bajuang manangguak suaro rakyat. 

Walau pemilu jo pilkada masih lamo lai, malah kini baru sajo angek-angek sudah pilkada, namun para aleg dan kapalo daerah lansuang pijak gas manebar pesona malalui karajo nyato. Gaspolll. 

Memang lah jaleh, bahwasanyo nan kapalo daerah adolah eksekutor--nan kamanjalankan roda pemerintahan. Tapi nan legislator tak pueh kalau hanyo dicap jadi tukang buek aturan sajo. Nan anggota DPRD provinsi dan anggota DPRD kabupaten/kota tak bisa laku jikok hanyo dapek cap mitra gubernur atau mitra bupati/walikota dalam manjalankan roda pemerintahan.

Bak dek baitu? Baa kok aleg paralu mampacaliek an labieh nyato kapado rakyat, bagalanggang mato rang banyak dan basuluah matoari takaik karajo jo perjuangan baliau untuak rakyat?

Jaweknyo, itu tadi. Aleg paralu suaro. Sarupo presiden jo kapalo daerah, tamasuak pak wali pun paralu dukuangan urang banyak supayo tapilieh baliek di periode nan katibo!

Mungkin itu pulo sabeknyo, dengan manggunokan hak mengatur anggaran (hak budget) para aleg pun bulieh mausul alokasi anggaran. Idak hanyo sabateh jumlah pitih, bahkan sampai rinci. Sampai bamerek lokasi, dan volume.

Lah salasai? Alun. Baitu APBN atau APBD tokok palu, para aleg bisa ilang pangguang jikok lupo manyuarokan bahwa proyek anu jo program anu adolah usao baliau. Samato-mato adolah usao baliau!

Kok itu sajo, tantu no problem lah. Tak masalah. 

Tapi, baa nan pangguang untuak presiden jo kapalo daerah? Jikok para kapalo daerah aniang sajo sambie takun mangarajoan proyek jo program nan lah balabel "perjuangan baliau, aleg si anu" itu, alamek para aleg lah nan kadicatat dek pamiliah. Bisa-bisa kapalo daerah dianggap mangarajoan takok nan lah diagieh aleg sajo. Nah!

Tantu sajo tak ado kapalo daerah nan tak baniek nak duo kali. Tapi, kok aleg se nan dapek namo, bisa gawa mah. 

Mako, para kapalo daerah pun mamainkan jurus eksekutornyo. Mulai dari mamancang, sampai mangguntiang pita tatkalo proyek diresmikan, liau borong sadoe. Adokalonyo nan aleg pun tak diundang. Walaupun ado juo para aleg nan cadiek, tibo se liau kutiko pita ka diguntiang.

Baitu pulo takaik mampajuangkan anggaran. Aleg DPR RI lah jaleh salah satu tugehnyo adolah mausul anggaran. Tantu sajo para aleg balomba mausul untuak dapil sorang-sorang. Lobi-lobi dipakai, baa pitih ka tibo untuak dapil. 

Salah satu bantuak lobi adolah maundang para pejabat nan bakuaso maalokasikan pitih. Mungkin presiden, wapres, menteri, dirjen, dll, diundang untuak tibo ka lokasi nan kadipajuangkan supayo diagieh anggaran.

Salah? Ndak lah. Memang lah di barih makan paek nah. Iyo sarupo itu andaknyo. Kok bisa labieh dari itu. Kok bisa sadoe aleg sarupo itu. Idak hanyo aleg DPR RI sajo, tapi anggota DPRD provinsi dan kabupaten/kota pun sarupo itu pulo andaknyo.

Walaupun kutiko tamu tibo, tantu kapalo daerah yang kamuko. Kok tibo bupati ka nagari, lah jaleh pak wali nan kamanyambuik di muko. Kok gubernur tibo, tantu pak bupati/walikota nan manyalami partamo. Baitu pulo kok tibo presiden, wapres, menteri, atau dirjen, lah ka jaleh se gubernur nan manyambuik di ruang VVIP di BIM. Tak ado yang salah doh kan?

Tapi, mbek cah. Bisa jadi masalah kalau wartawan lupo pulo ma alo-alo kan bahwa ado peran aleg makonyo nan tenggi dari pusat tu tibo. Atau sabalieknyo, ado peran kapalo daerah makonyo presiden, atau wapres, dst, tibo.

Apolai postingan di medsos nan tak paralu basanda ka kode etik jurnalistik bagai, pasti lah nan kalamak dek inyo se mamposting foto jo narasi baponten sabaleh! Ebat apak tu, tibo presiden dek liau. Mambaok pitih banyak lo tu. Tibo wapres dek liau. Tibo menteri dek liau. Dst. 

Baitulah, tulah demokrasi; barabuik tuah. Dan bagi baliau-baliau, itu ujian ikhlas!!!


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #Ikhlas

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com