HOME LANGKAN KATO

  • Kamis, 15 April 2021
NIAIK
Carito

NIAIK

OLEH: BAHREN*

            Niaik, ikolah kaji nan di sampaikan dek Buya Pulungan wakatu manjadi pancaramah wakatu malam paratamo di bulan puaso taun ko di musajik dakek rumah kito, tantu sajo sabalunkaji dimulai, ado saketek banyak e kato-kato sambah jo sambutan dari pangurus musajik. Paliang tidak kato-kato permintaan maaf ka jamaah nan hadir di malam samalam nantun. Mako sarentaklah jamaah manjawek lai… kutiko pengurus mamintak untuak dimaafkan sagalo salah jo silap salamo sataun di balakang. Salin itu jamaah pun mamintak maaf pulo ka pangurus kok ado salah jo silap salamo, tujuannyo tak lain jo tak bukan bia puaso ditahunko manjadi puaso nan samparono dan prediket taqwa nan dijanjikan dek Allah bisa kito raiah.

            Babaliak ka parakaro niat, sacaro singkek jo padek buya ko manarangkan ka kito, baso manjadi sio-siolah ibadah atau pun karajo nan kito pabuek jikok indak dimuloi jo niaik nan baik karano Allah. Dan indak sah pulo agak nyo karajo nan kito karajokan kalau indak ado niatnyo. Sabagai contoh dibari dek Buya wakatu itu, indak jadi kito sumbayang Isya malam kini kalau niatnyo sumbayang subuah, dan ndak sah tarawiah kito kalau niaik nyo sumbayang isa. Bitu bana paralu sarato pentingnyo niaik ko untuak kito dalam ba ibadah.

            Parakaro niatko pun ado dalam hadist sahiah Nabi Muhammad nan diriwayatkan oleh Imam Bukhary nan aratinyo: dari Amirul Mu’minin, Abi Hafs Umar bin Al Khattab radhiallahuanhu, bakato baliau baso inyo mandanga Rasulullah shallahu`alaihi wa sallam bersabda: Sungguah satiok parbuatan itu tagantuang pado niaik ateh parbuatan itu. Dan sungguah satiok urang akan mandapek balasan ateh apo nan lah diniaikkan nyo. Barang siapo nan Hijrah karano ingin mandapek karidaan Allah jo Rasulnyo. Dan barang siapo nan hijrahnya karena menginginkan kahidupan nan layak di dunia atau karano wanita yang ingin dinikahinyo mako hijrahnyo (akan banilai sasuai) samo nan diniatkannyo. (HR. Bukhary).

            Mako, dalam kasampatan di malam samalam nantun, Buya maajak kito nan hadir untuak basamo-samo kumbali mampobaki niat kito dalam manjalankan ibadah salamo bulan puaso taun kiniko. Mudah-mudahan dangan kito lah samo-samo baniaik untuk manjadi nan labiah elok sarato baik di tahun ko, sagalo wabah, musibah atau pun parsoalan nan sadang dihadoi kini ko sugiro hilang dan diganti dek Allah jo nan labiah elok.

            Untuak pambaco setia carito minang pun, baitu pulo lah handaknyo dek puaso baru bajalan tigo hari, kok nyampang lupo baniaik sabalun ka puaso ko molah kito samo-samo baniak untuak manjadi nan labiah elok di bulan puaso kiniko, mudah-mudahan dangan niaik baik nan lah disampaikan tadi, sasuai jo janji Allah dalam hadis di ateh mako dinilai baik pulo lah handaknyo. Aamiin.

 *DOSEN SASTRA MINANGKABAU UNAND


Wartawan : Bahren
Editor : bahren

Tag :# Langkan # kato # curito #minang