Bapitaruah Atah Ka Mancik

Bapitaruah Atah ka Mancik

Oleh: Bahren*

     Carito nan sakali kini ko ado kaitannyo jo kajadian nan acok kali tajadi satiok hari rayo tibo. Lah manjadi kabiasaan dek kito di satiok hari rayo maagiah pitih untuak anak kamanakan bahkan urang sakampuang nan datang ka rumah untuak bahari rayo. Sasudah mandapek pitih dari dunsanak atau urang sakampuang itu mako ado di antaro anak-anak ko nan manitip pitih rayo nyo ka amak atau ka abak nyo. Mako limbak nan dari pado itu, mulai lah curito ko baraliah ka judul nan kito angkek untuak kali kini bapitaruah atah ka mancik.

     Judul ko diambiak dek mancaliak kajadian jo fenomena nan tajadi salamo ko. Kutiko anak-anak alah manitip pitih ka amak atau ka abak nyo lahia lah istilah nan baru untuak kajadian nan sarupo iko, dalam bahaso Indonesia, urang manyabuik nyo jo istilah inpestasi bodong. Impestasi bodong jikok disimak mukasuik jo aratinyo labiah ka impestasi nan ilegal, acok kali impestasi jenis ko diiming-imingi jo keamanan, sarato mandapek labiah sasudah itu.

     Impestasi bodong dalam aratian manitip pitih ka amak jo apak sasudah rayo ko labiah kapado iming-iming dari amak supayo pitih anak ko indak tapakai untuak mambali nan asal-asalan sajo, tapi labiah dari itu nyatonyo sasudah pitih ko ditip ka amak acok kali pitih ko indak tantu kama rimbonyo sasudah lapeh dari tangan. Kok ditanyo ka Amak jawek nyo tantu sajo pitiah ang aman, pitih kau lai amak simpan. Tapi jikok di mintak bisuak lah, amak alun bapitih hariko.

     Impestasi bodong dalam bahaso kieh Minangkabau kiro-kiro cocok jo istilah bapitaruah atah ka mancik. Baa dek baitu pandangan ambo. Jikok dicaliak sarato diinok manuangkan jikok lah atah namonyo nan dipitaruahkan ka mancik alamaik indak ado nan kabasiso. Nan atah abih dek mancik karano memang itu makanan nan paliang disukoi nyo. Nan mancik indak ka parnah manulak atau puaso makan atah ko.

     Kieh mancik diumpamokan untuak Amak nan dititipi dek anak e pitih rayo. Dan atah di siko diumpamokan untuak pitih nan alah dititipkan. Tapi walaupun demikian adonyo, pasti ado juo nan indak sarupo bana jo kieh nan itu. Indak mungkin apo nan alah dititipkan tadi tu indak ado gununyo dek anak nan matitipkan. Pastilah sabagai surang urang gaek indak kan parnah baniat untuak mahabihkan harato anaknyo babeda jo mancik nan sangaik mungkin untuak mahabihkan atah nan dipitaruahkan ka mancik tu. Aratinyo bana umpamo nan ado ko untuak maabiak banag merah nyo antaro istilah nan sadang viral dek anak-anak kini ko tantang impestasi bodong ko alah masuak ka ranah manitip pitih rayo ka urang gaek dek anak-anak kito kini. Banyak di antaro anak-anak kito kini ko manyamokan istilah ko jo impestasi bodong. Wallahu’alam

*Dosen Sastra Minangkabau FIB Unand