HOME LANGKAN KATO

  • Sabtu, 22 Mei 2021
Bajanjang Naiek Batanggo Turun Bapamatang Babintalak
Janjang (ilustrasi.internet)

Bajanjang Naiek Batanggo Turun

Bapamatang Babintalak

Oleh TE Radjo Boedjang

Alhamdulillah, ramadan salasai, Idul Fitri tibo. Rirayo pun dikungkuang Covid19. Sahinggo jamaah sumbayang rayo dak sarami nam biaso (lah duo taun ko rirayo tagaduah pandemi). 

Alhamdulillah, mudik dilarang. Tapi urang eboh dek "urang lua" bapalapeh masuak. Samintaro di bateh bapanjago!

Alhamdulillah, rirayo lai lo dak batikai. Samo-samo hari Kamih kito barayo. Presiden Jokowi sumbayang rayo diimami anggota Paspampres di lapangan gedung induk Istana Bogor. Bisa dietong jo jari jamaahnyo. 

Jamaah memang saketek, tak cukuik ampek puluah urang. Dan nan jadi imam jo khatib adolah Ridwan Payopo. Sajarah baru untuak negara kito; presiden sumbayang rayo diimami paspampres, jo jamaah nan saketek bana. Taat prokes lah namonyo. Andaknyo manjadi taladan dek kito supayo manjalankan prokes sacaro ketat!

Tapi, lain presiden, lai pulo di daerah. Ado nan tageh malarang karano barado di zona sirah atau oranye. Ado nan ragu-ragu. Ado pulo nan basipakak sajo. 

Lalu, kito pun cameh. Lai dak katumbuah klaster idul fitri du? Tapi, baa kok mall bapalapeh san? Eboh lo liek di medsos saliang hujjah pakaro klaster-klaster tu.

Alhamdulillah, kini rirayo lah sudah. Ambek bateh lah dibukak. Pagawai lah karajo sarupo biaso. Tamasuak 13 kabupaten/kota plus propinsi nan lah punyo nangkodoh baru, kini lah masuak kantue sadonyo.

Lah langkok ganok pamangku undang di Sumatera Barat (Sumbar). Pakan-pakan nan lalu, tanggal 26 April, lah dilantik pulo Bupati-Wakil Bupati Solok dan Solok Selatan (Solsel). Gubernur Mahyeldi Dt Maradjo nan malantik. 

Sah. Bupati H Epyardi Asda, M Mar jo Wakil Bupati (Wabup) Jon Firman Pandu, S.H pun lah dilewakan jadi Bupati-Wabup Solok. Dan H Khairunas jo Yulian Efi jadi Bupati-Wabup Solsel.

Karano lah langkok tu, Provinsi Sumbar jo 19 kabupaten/kota pun lah bisa malangkah saarak jo baarah. Lah bisa bakolaborasi jo basinergi.

Saarak maknanyo sajalan basamo. Bararak, bairiang. Saarak juo bamakna sarupo itiek babarih, tapadu dalam kelompok. Tanpa ado nan kalua. Taicie.

Saarah maknanyo bapadan nan jaleh. Ado padan masiang-masiang dalam arah nan samo. Ado target.

Nah, pakaro target ko paralu duduak basamo mah dak? Padan dibuek di ateh sapakek. 

Dari kasapakatan pihak-pihak lah padan mangkok ka laku. Kok dibuek sapihak, umpamonyo titiek dari ateh, bisa dianggap paso. Nan mangarajoan pun di bawahnyo jadi tapaso. Jikok dibuek sapihak dari bawah, itupun mamaso nan di ateh. Labieh gawa kajadiannyo.

Mako, pakaro target ko, sacaro banegara lah ado regulasinyo. Ado regulasi nan maatur perencanaan daerah, dalam bateh-bateh otonomi daerah. 

Sajalan jo peringatan Hari Otonomi Daerah, nan diperingati tiok tanggal 26 April--pas pulo jo pelantikan duo pasang bupati-wabup tu--pakaro padan ko sabananyo nan paralu capek-capek diduduak an. Supayo otonomi tu idak kontraproduktif jo ego-ego daerah-daerah nan baotonomi tu.

Tapi, sajauh iko, justru pakaro padan ko nan acok lupo dikolaborasikan. Sahinggo daerah-daerah bajalan jo padan surang-surang. Kadang-kadang lah tumpang tindih. Ado pulo nan bapadan di tipak kawan. Karajo urang nan bakakok, karajo awak lupo marasok--karano padan tak jaleh tu lah.

Mupakaik padan ko pun jadi senjang senjuik karano pihak-pihak dak samo mulai. Kutiko presiden mambuek padan dalam Rencana Pembangunan Jangka Menengah Nasional (RPJMN), sataun sudah tu baru gubernur pulo mambueknyo dalam RPJM Daerah (RPJMD) propinsi. Idak pulo samo jo bupati/walikota mambuek padan nan dituangkan dalam RPJMD kabupaten/kota.

Periodesasi nan dak samo ko lah yang manjadi dasar, in Sya Allah diadoan pemilu serentak taun 2024 nan katibo. Kok lah sarantak nanti, baru lah padan-padan tu bisa dibreakdown ka bawah. Sahinggo kumpulan padan-padan kabupaten/kota manunjang padan propinsi. Kumpulan padan-padan propinsi manunjang padan nasional nan dibuek presiden dalam RPJMN.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #BajanjangNaiek