HOME LANGKAN TINGKOK

  • Senin, 13 Januari 2020

TUO UMUA

Carito
Carito

TUO UMUA

OLEH: BAHREN*

          Alah labiah sapakan mungkin duo pakan agaknyo Mak Datuak Lauik jo Si Alan sarao Si Muih indak mancogok an mukonyo di lapau Piak Enek. Mungkin liau-liau ko lah sibuk jo banjir nan tajadi di Jakata, walaupun hanyo mancaliak di tipi sajo, tapi itu alah labiah dari cukuik untuak tau baa sabab mako banjir tu tajadi. Alah banyak pulo carito nan didanganyo pandapek dari urang-urang nan katonyo ahli tantang banjir ko, mulai nan dari mudo matah sampai ka urang nan lah gake bangkeh alah manajdi ahli kasadoe.

        Tapi samantang pun baitu, ado nan manjadi paratian dek Mak Datuak Lauik, ikolah nan nak dicuritokan dek Mak Datuak ka Si Alan jo Si Muih. Nan mudo matah memang sacaro umua baru saumua jaguang darah baru satampuak pinang tapi pangalamannyo labiah dari cukuik. Ado pulo nan gaek bangkeh alah tuo sacaro umua namun nan dikabakannyo hanyo parasaan-parasaan sajo, dulu ka dulu sajo.

        Dari sikolah Mak Datuak lauik nak manyurahkan ka Si Alan jo Si Muih tantang urang tuo di Minangkabau ko, sasudah inyo bacurito tantang tuo tugku jo tuo sendok ka urang nan baduo ko. Kini Mak Datuak Lauik kabacurito tantang rang Tuo Umua. Baa bana Tuo Umua tu Mak? Tanyo Si Alan ka Mak Datuak Lauik. Bari tarang lah kami dek Mak Datuak, bia manjadi suluah kutiko malam, tungkek kutiko bajalan. Jo harok kami manunggu surah Mamak.

        Babarapo ari nan lapeh, den lah bacurito tantang Tuo Tungku jo Tuo Sendok, kiniko den nak bacurito tantang Tuo Umua. Apo bana mukasuik Tuo Umua ko. Datuak Rajo Kayo parnah bakisah baso Tuo Umua ko tamasuak ciek dari tuo nan ampek. Urang nan tuo umua ko, sacaro umua lah pasti inyo gaek tapi sacaro pangana jo pandapek iyo alun dapek ka ditumpang dek urang nan banyak lai. Umua nan lah banyak dipakai nyo indak digunokan untuak manambah pangalaman sarato pangatahuannyo. Urang nan tuo umua ko labiah banyak mangarajoan karajo nan indak bamanpaat. Aratinyo bana labiah banyak lalok dari jago, labiah banyak bamanuang dari karajo. Kiro-kiro nan bak iko apo nan bisa awak tumpang ka inyo.

        Jikok dikatoannyo indak tau atau indak pahak nan tuo umua ko salalu sajo mangatoan kapado kito “labiah tuo den dari ang, alah banyak asam garam iduik ko nan den rasoi, Ang baru kapatang iduik lah ka maajakan sarao manunjuak an Den pulo, alah gaek Den ko mah”. Umua nyo nan alah angkeh sajo nan dijadikannyo sanjato jikok badebat jo urang, indak labiah dari itu. Kok ado karajo nyo nan salah, tu disawak dek nan mudo matah, langsuang se nyo malagak “urang gaek jan ang ajakan pulo makan bubua” dulu dari pado ang den iduik. Itu ka itu sajo nan dilagakkan nyo, di agah e jo umua nan lah bangkeh sajo nan mudo matah ko.

        Bitulah urang tuo umua tu Lan, Muih. Indak bisa awak mambari bana ka urang nan tuo umua tu doh Lan, walapun pangana e kurang, pangalaman indak pulo ado, namun dek umua nyo lah tuo mako itu ka itu sajo nan manjadi sinjato dek urang gaek nan tuo umua ko. Mudah-mudahan awak ko indak tamasuak ka urang nan tuo umua, tapi urang tuo adaik lah andaknyo. Apo pulo tu Mak, urang tuo adaik tu, bari tarang lah kami dek Mamak. Kok parakaro tuo adaik ko minggu muko lah Den kubak sarato den kabari ka Ang Lan, dek den ka pai ka Bank mambiak pensiun, beko rami bana urang lai. Inggo itu dulu dih, minggu muko kito basuo baliak di lapau Piak Enek.           

 

*DOSEN SASTRA MINANGKABAU UNIVERSITAS ANDALAS


Wartawan : Bahren
Editor : bahren

Tag :# Langkan # curito #minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com