HOME LANGKAN KATO

  • Rabu, 8 September 2021
SUMBANG DUO BALEH (BAGIAN 2)
Carito

SUMBANG DUO BALEH

(BAGIAN 2)

Oleh: RONA ALMOS*

 

Sumbang duo baleh adolah paraturan adaik Minangkabau nan barisi tantang nilai sopan santun sarato tata krama. Pado tulisan nan alah tabik babarapo wakatu nan lalu alah dijelah anam sumbang dari duo baleh sumbang nan ado. Subang nan alah dijalehan tu iolah 1) sumbang duduak (sumbang katiko duduak), 2) subang tagak (sumbang katiko tagak), 3) sumbang bajalan (sumbang katiko bajalan), 4) sumbang kato (sumbang dalam bakato-kato), 5) sumbang caliak (sumbang dalam mancaliak) dan 6) sumbang makan (sumbang katiko makan).

Dikasampatan kini dijalehan tujuah sampai duo baleh yaitu 7) sumbang bapakaian (sumbang dalam bapakaian), 8) sumbang karajo (sumbang katiko bakarajo), 9) subang tanyo (sumbang dalam batanyo), 10) sumbang jawek (sumbang dalam manjawek), 11) sumbang bagaua (sumbang dalam bagaua), 12) sumbang kurenah (sumbang dalam bertingkah laku). Untuak labiah jalehnyo barikuik dijalehan ciek-ciek.

7) Sumbang Bapakaian (sumbang dalam bapakaian)

Dalam bapakaian padusi Minangkabau sangaik dilarang mamakai baju nan ketat, nan mancetak bantuak badan. Indak buliah mamakai baju nan jarang. Katiko bakaian padusi Minangkabau haruslah mamakai baju nan sopan dan barasiah. Di jaman dahulu baju kuruang basibah adolah pakaian padusi Minangkabau.

8) Sumbang Karajo (sumbang katiko karajo)

Karajo nan ideal untuak padusi Minangkabau iolah karajo nan ringan jo nan mudah. Karajo ringan sarato mudah itu contohny mamasak, manjaik/manyulam, sarato manyuci. Karajo-karajo nan kasa sarato barek disarahan ka kaum laki-laki. 

9) Sumbang Tanyo (sumbang katiko batanyo)

Dalam batanyo pun padusi Minangkabau diatur. Katiko salah surang padusi Minangkabau batanyo harus jo sopan santun. Jan sampai takas an mauji urang nan ditanyo. Salain itu katiko awak nio batanyo dangaaan bana dahulu apo bana nan dijalehan urang. Kalau urang alah sudah mangecek baru batanyo. Jan sampai urang masih mangecek awak lansuang mamotong kecek urang tu.

10) Sumbang Jawek (sumbang dalam manjawek)

Baitu juo untuk manjawek, katiko surang padusi Minangkabau ditanyoi mako inyo harus manjawek jo kalimaik nan jaleh singkek sarato tapek. Jan samapai jawaban tu babalik-balik sahinggo urang nan mandanga manjadi binguang sainggo timbua patanyaan nan baru.

11) Sumbang Bagau (sumbang dalam bagaua)

Dalam bagau jo kawan samo gadang tatap harus majago sopan santun. Indak buliah bajalan samo laki-laki baduo-duo. Apo lai kalua laki-laki tu indak muhrimnyo. Hal iko akan dipandandang indak elok dan tantu akan jadi buah bibia dikampuang.

12) Sumbang Kurenah (sumbang dalam batingkah laku)

Dalam kahidupan sahari-hari tingkah laku arus tatap dijago. Kalua mangecek jan sampai manyinguang parasaan urang lain. Mangecek jo nada nan randah jan mangecek maariak-ariak. Nan paliang dipantangan adolah galak gadang-gadang apolai sampai maangkek kaki. 

Itulah panjalehan manganai sumbang duo baleh nan arus diparatian dek anak-anak kini. Alangkah malunyo keluarga apo bilo anak padusinyo indak maikuti panjaleh di ateh. 

 *Dosen Sastra Minangkabau FIB Unand


Wartawan : RONA ALMOS
Editor : bahren

Tag :#Langkan #Carito #Minang #Kato