PANTUN WARGA BINAAN LP MUARA PADANG

PANTUN-PANTUN KARYA WARGA BINAAN LP MUARA PADANG

Cang incuik koncek baranang

Baranang ka pulau Angso Duo

Sakik jo iduk den tangguang surang

Antah bilo kasalasainyo

(Ayank)

Rumah sajik di tangah balai

Dikunci jo kuro-kuro

Baa nasib ndak kasansai

Badan takuruang di panjaro

(Nusirwan)

Limau manih jatuah ka batu      

Tibo di batu pacah duo

Urang gaek duduak di pintu

Manunggu anak kalua pinjaro

(Joni Apriko)

Jalan-jalan ka Payokumbuah

Tibo di situ makan galamai

Usah kawan baati rusuah

Mari duduak baramai-ramai

(Boy)

Ikan banamo ikan taneman

Nan kaduo banamo gambolo

Disangko inyo paremen

Kironyo inyo induak bako

(Rudi)

Jalan-jalan ka Koto Kaciak

Singgah sabanta ka Kampuang Jao

Jan ragu cinto uda ka adiak

Sabantalai uda ka pulang juo

(Ances Setiawan)

LP Muaro LP Padang

Lataknyo di tapi lauik Padang

Lah bamanuang diriku surang

Takana bini diambiak urang

(Ances Setiawan)

Tapi lauik badarum ombak

Ombak tadanga dari pinjaro

Bilo kabasuo jo amak abak

Badan takuruang manangguang doso

(Efriza Junius)

Lah satahun dalam kurungan

Bujang ditinggaan didalam baduang

Ibo ati ndak tatahan

Mancaliak bujang kini lah gadang

(Efriza Junius)

Anak jawa pandai baranang

Pontong kaki dimakan buayo

Adiak di rumah tanang-tanang

Bia uda nan bausaho

(M. Faris Ayusko)

Limau manih limau puruik

Dimakan urang di Padang Panjang

Kalau indak adiak manuruik

Bia uda nan manangih surang

(M. Faris Ayusko)

Jalan-jalan ka Muaro Lasak

Banyak urang mamakir oto

Alah lamo taragak jo anak

Mambuek ati cukuik taibo

(Tarmizi Wahyudi)

Limau manih jatuah katabek

Tibo di tabek diambiak urang

Alah lamo dimintak indak dapek

Kironyo diambiak dek urang

(Nanda)

Ramilah urang ditanam patagak

Nan mambubuang talemang juo

Rindulah ati nan jo taragak

Rindu jo ayah nan den cinto

(Afriyadi)

Taluak Bayua labuhan kapa

Bulando turun dari si koci

Jangek lah layua gigilah tangga

Badan taraso alah kamati

(Afriandi)

Jalan-jalan ka Gunuang Padang

Minum tuak di kadai Eti

Baitu banyak padusi nan datang

Hanya engkau surang nan dihati

(Oktarinanda)