HOME LANGKAN TINGKOK

  • Kamis, 11 April 2019

Nagari Batipuah Ateh

TINGKOK
TINGKOK

Nagari Batipuah ateh

di Luhak Tanah Data

 

Oleh   Bahren*

 

Batipuah ateh, tanah data

Oi tasabuik jo tuan gadangnyo

Di aliah pulo kini ko kaba

Batipuah ateh  jadi curito

 

Baramolo, curito ko ka dimulai dek liau Datuak Rangkayo Bungsu kapado Ivan Adilla nan datang madok ka liau. Datangnyo dari Padang di tanggal 25 bulan Mei 2007. Liau Datuak Bungsu urang paladang jo patani. Tujuah puluah ampek umua katiko itu, kutiko liau bacurito. Apo bana nan liau sabuik, sarato curai jo papahkan ka bakeh Ivan Adilla maso itu. Simak kan alah baik-baik, dangakan malah elok-elok. Untuang nyo jadi palajaran, palajaran nan baguno, tantang curito nagari ko.

Bagulambek liau bacurito, batanang jo bahati-hati liau manyampaikannyo. Takalo niniak muyang urang Minang mulai mancari jo mampalaweh panarukoan jo tampek tingga, sampai malah niniak kito tu di sabuah tampek. Di tampek itulah niniak ko mulai marambah jo manaruko, mambuek rumah jo paladangan. Di tampek itu pulolah tumbuah sabatang kayu gadang, batang tu banamo batang kayu ipuah. Batang ipuah ko diyakini gatahnyo manganduang racun, yang kamudian hari tampek tu banamo batipuah, atau yang batampek tingga dakek kayu ipuah. .

Dalam pado itu, dek nagari samakin bakambang juo, mako batipuah nan ado di bagian ateh , dibari namo lah jo namo batipuah ateh, samantaro batipuah nan latak nyo agak di bawah atau agak di baruah bahaso urang situ, mako banamo lah tampek tu jo batipuah baruah. Itu curito partamo nan liau danga.

Curito nan kaduo nan pernah pulo didanga dek baliau Datuak Rangkayo Bungsu. Takalo niniak moyang sampai di nagari ko mangko basumpah lah niniak moyang nan banyak ko untuak salalu iduik basamo-samao di daerah iko, bapagang taguah ka adaik jo limbago, nan alah disapakati. Sumpah itu di sampaikan dakek sabuah batu, banamo Batu Pasumpahan inggo kini. Adopun isi sumpah tu, sia ado nan malangga sumpah mako dimakan biso jo racun ipuah lah nan malangga tu, mako banamo lah daerah tu kini Batipuah nan aratinyo Batu Ipuah.

Salain curito nan duo tu, batipuah juo disabuik-sabuik sabagai daerah partahanan, dek sabab karano itu mako batipuah banyak punyo benteang atau tampek balinduang nan disabuik dek urang batipuah jo sabutan Kubu.  Kubu nan banyak batang karambai di sakaliliangnyo mako banamo lah daerah tu jo kubu karambia. Kubu nan banyak batang pisang nyo, di namoi jo kubu pisang, kubu nan banyak batang kalikih atau pepaya jo sampelo mako dibari namo jo kubu kalikih.

Kubu nan banyak batang pudiang nyo, banamo kubu pudiang.  Kubo nan banyak batang aua dibari namo kubu aua, samantarao kubu nan banyak tumbuah batang ilalang mako banamo kubu hilalang. Kubu nan partamo dibuek dek niniak kito tu dibari namo kubu Tuo, tarakir kali kubu nan latak nyo balirik dinamokan jo kubu baririk. Tapakai bana ilimu alam takambang jadi guru dek niniak moyang kito dalam maagiah namo nagari tu. Bitu sambuang Datuak Rangkayo Bungsu.

Curito tu indak di karang baitu sajo, curitok ko lah di danga dek Liau datuak Rangkayo Bungsu dari urang nan tuo-tuo di kampuangnyo. Malah liau mandapek kaba, baso niniak moyang rang batipuah ateh turun dari Pariangan Padang Panjang. Suku-suku nan ado di Batipuah Ateh suku Jambak jo suku Sikumbang. Suku Pisang jo Suku Guci, langkok jo suku panyalai sarato suku malayu.

Itulah kisah nan di urai, sarato disurah dek Datuank Rangkayo Bungsu. Kok ado nan bana tantang itu, kabanaran nan datang dari Allah, Allah ta’a lah kayo sungguah ilimu di liau lah tampek nyo. Jikok ado salah jo jangga, salah nan datang dari kito, kito manusia nan palupo tampek salah jo silap nan bagantuang. Ka urang banyak maaf di pintak kapado tuhan ampun di mohon.

 

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # tingkok # Asa # Usua

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com