HOME LANGKAN TINGKOK

  • Selasa, 3 September 2019

LIMO KAUM

TINGKOK
TINGKOK

Limo Kaum

Di Luhak Tanah Data

Oleh: Bahren*

 

Alah lamo indak ka rimbo

Kayu di hutan lah gadang-gadang

Alah lamo yo indak bacurito

Kini di cubo pulo maulang-ulang

 

Limo kaum di Tanah Data

Dalam wilayah luak nan tuo

Di ansua pulo kini bakaba

Kaba curito nagari kito

 

Tigo Tapian jo Koto Gadih

Balai Batu Jo kubu Rajo

Batu Batunjuak sato di dalam

Di ulang curito mako tak abih

Ka padoman untuak nan mudo

Untuang bisa jadi padoman

 

Datang lah pado hari itu tanggal duo puluah anam di bulan Mei tahun duo ribu tujuah. Datang Zuriati dari Padang, mahadok kapado Sutan Mahmud. Mantan Pak Camaik karajonyo. Gadang mukasuik nan dijalang, untuak ka ditanyokan ka Pak Mahmud. Apokoh mukasuik nan babaok, batanyo Pak Sutan Mahmud ka Zuriati. Mako dimulai lah dek Zuriati manyampaikan mukasuik jo tujuan datang mahadok ka baliau. Adopun mukasuik jo tujuan, nak batanyo kapado liau tantang curito asa jo usua nagari Limo Kaum.

Sasudah tau jo paham, akan mukasuik dari Zuriati. Mako bakaba lah Sutan Mahmud kutiko itu, tantang curito asa jo usua nagari Limo Kaum. Dek nan indak mudo lai, tujuah puluah tujuah umua liau maso itu. Bacuritolah liau bagulambek. Apo sabab jo karano nagari ko banamo Limo Kaum.

Dari curtio nan ambo danga dari niniak jo moyang kami nan daulu. Nagari ko daulunyo dihuni dek limo kalompok atau kaumnyo. A sajo kaum nan limo biko malah curitonyo. Ado kaum Tigo Tapian, Koto Gadih, Balai Batu. Batu Rajo langkok limo jo Batu Batunjuak.

Mako banamo Tigo tapian, elok ambo surah agak saketek. Tigo tapian ko daulunyo iyolah gabuangan dari tigo tampek. Apo bana tampek nan tigo Dusun Tuo jo Balai Batu, langkok sarato Tigo Tampuniak mako banamo lah tigo daerah nantun jo Tigo tapian. Lanjuik kisah ka koto Gadih. Sabab banamo Koto Gadih, iyo basabab jo karano daerah nantun banyak anak Gadih nyo jikok dibandiangkan jo nan lain. Limbak nan dari pado itu, ado pulo nan manyabuik kan daerah itu daulunyo rancak saropo anak gadih mako dibari namo jo Koto Gadih.

Masih di dalam daerah limo kaum. Daerah nan ado balai-balainyo nan digunokan untuak basidang jo barundiang. Batampek duduak dari batu, mako balai nan digunokan untuak barundiang nan bakaduduakan batu tadi disabuik malah tampek nantun jo Balai Batu. Ado pulo sabuah lai, tampek nan dijadikan benteang untuak batahan dek rajo di Limo Kaum. Benteang dalam bahaso limo kabum disabuik jo Kubu. Dek sabab benteang atau kubu nantun digunokan dek Rajo, mako banamo lah tampek tadi jo Kubu Rajo nan aratinyo Kubu tampek balinduang jo batahan rajo.

Indak doh jauh dari kubu rajo ado sabuah Batu nan tampak sarupo punyo tunjuak. Dek urang kito ko, tasabuik baguru kapado alam sarupo mamangan nan acok kito danga. Alam takambang manjadi guru. Mako daerah nan ado batu sarupo ado tunjuak nyo tadi dibari namo Batu Batunjuak.

Pak Sutan Mahmud mancuritokan kisah nantun. Dari kisah nan ditarimo liau pulo dari niniak nan daulu, limbak nan dari pado itu, kisah ko ado pulo di dapeknyo dari mambaco buku tambo. Ado sabuah lai nan takana dek liau wakatu itu. Niniak kami rang Limo Kaum barasa dari Pariangan. Dek karano masih lai takana batanyo juo Zuriati wakatu itu tantang suku nan ado di Limo Kaum. Urang Limo kaum nangko ado basuku Caniago. Suku Tujuah Rumah, Koroang Gadang, Sumagek, Patopang, Sungai Napa, Parik Panjang. Supanjang, Jambak jo Mandaliko.

Itulah kaba tantang Limo Kaum nan bisa disurah dek baliau Sutan Mahmud. Jikok ado nan bana tantang nantun. Iyolah kabaranan nan datang dari Tuhan. Jikok ado nan salah tantang curito nantun. Kasalahn nan datang dari kito manusia. Kapado tuha ampun dimintak, ka pambaco maaf dipinto.

  *Dosen Sastra Minangkabau FIB Unand

 


Wartawan : -
Editor : bahren

Tag :# Langkan # Tingkok # Asa # Usua # Nagari # Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com