HOME LANGKAN PEPATAH

  • Sabtu, 13 Juni 2020

INDAK KAYU JANJANG DIKAPIANG

Pepatah
Pepatah

Indak Kayu, Janjang Dikapiang

OLEH: EKA MEIGALIA*

 

Papatah di ateh biaso langkoknyo babunyi sarupo iko

 

Indak ameh, bungkah diasah

Indak kayu, janjang dikapiang

Tak aia, talang dipancuang

Pado papatah di ateh ado kato ameh, bungkah, kayu,  janjang, aia, sarato talang. Ka anam kato tu tamasuak ka dalam kato benda. Ameh, siapo ndak tau. Siapo pulo ndak indak katuju. Ameh nan bahaso Indonesianyo emas adolah sajenis logam mulia nan warnanyo kuniang. Ameh ko bisa dibantuak untuak jadi kaluang, galang, subang, atau apo pun nan bisa jadi hiasan. Tantunyo ameh ko sangaik baharago sahinggo baiak di Minangkabau atau di lua Minangkabau, ameh bisa manunjuakkan martabat sarato harago diri urang. Mako ndak saketek pulo urang nan amuah mamakai nan namonyo ameh imitasi untuak manjago martabat tadi.

Sasudah tu ado kato bungkah. Bungkah adolah anak timbangan nan warnanyo kuniang sarupo ameh. Anak timbangan ko adolah alat nan dipakai untuak manantuan hasil timbangan. Ukurannyo mulai dari 50 gr, 100 gr, 250 gr, 500 gr, dan sataruihnyo. Ado juo nan manyabuiknyo ‘batu timbangan’. Timbangan nan pakai anak timbangan ko yo agak jarang ditamuan kini. Apolai kini alah ado pulo timbangan digital. Iko contoh timbangan lamo nan pakai anak timbangan tu.

Anak timbangan nan di gambar ado 2 buah tu warnanyo kuniang, apolai kalau baru. Iko nan disabuik jo bungkah dalam papatah di ateh.

Salanjuiknyo ado kato kayu. Kayu adolah bagian dari batang pohon nan kareh. Kalau nan lunak sarato murah dipatahan disabuik rantiang. Sadangkan janjang adolah alaik untuak manumpu katiko naiak atau turun dari suatu tampek. Kalau dalam bahaso Indonesia, padanan kato janjang dalam papatah ko tapeknyo adolah tangga, bukan janjang. Biasonyo tabuek dari kayu atau batu nan disusun balenggek.

Di barih terakhir ado kato aia sarato talang. Aia dalam bahaso Indonesia samo jo air, yaitu benda nan caia nan dibutuahan dek makhluk iduik. Dan kato talang dalam bahaso Indonesia samo jo telang. Iko adolah sajinih batuang atau bambu nan tipih. Ado juo arati kato telang dalam bahaso Indonesia nan marujuak ka tanaman juo, yaitu sajinih bungo nan bawarna biru. Bungo ko tumbuahnyo manjala dan banyak manfaaiknyo untuak kasehatan. Bahaso ilmiah untuak bungo telang ko adolah Clitoria ternatea.

Jadi untuak kato talang jikok dicaliak manuruik kamus, mako ado 2 arati atau benda barupo tumbuhan nan samo-samo disabuik telang.

Barikuiknyo pado papatah di ateh, ado tigo kato kerja, yaitu diasah, dikapiang, sarato dipancuang. Kato diasah dasarnyo adolah asah sarato kapiang. Asah aratinyo adolah ‘gosok jo sesuatu nan kareh’. Karano itu ado alaik nan namonyo asahan nan tabuek dari batu. Kato asah diagiah imbuhan di sahinggo aratinyo manjadi ‘manggosok jo sasuatu nan kareh’. Tujuan manggosok ko macam-macam. Ado untuak manajaman (misalnyo pisau), atau mambuek licin atau haluih (missal batu atau paramato).

Kato salanjuiknyo dikapiang nan kato dasarnyo adolah kapiang. Aratinyo adolah ‘benda nan babantuak ketek atau tipih’. Sadangkan kalau dijadian kato kerja, mako samo jo mambalah, mambagi, atau mairih untuak menjadian labiah ketek.

Terakhir kato dipancuang nan asanyo kato pancuang. Dalam bahaso Indonesia samo jo pancung, aratinyo ‘memenggal’. Mamotong sacaro capek sampai putuih. Mako alatnyo biasonyo padang atau parang.

Sacaro kasaluruahan, papatah di ateh arati nan tasurek adolah sarupo iko. Indak ado ameh, bungkah atau anak timbangan nan diasah untuak pangganti ameh. Indak ado kayu, janjang nan tabuek dari kayu dikapiang untuak dijadian kayu. Indak ado aia, talang atau buluah nan dipancuang untuak mandapekan aia. Utamonyo untuak talang nan sabalumnyo dijalehan ado duo mukasuik, yaitu buluah atau bungo telang, mako nan tapek untuak papatah ko adolah talang barupo buluah. Karano kato nan mairiangi talang adolah dipancuang. Ndak tapek bungo nan ketek sarato haluih tu dipancuang. Nan bisa dipancuang labiah tapeknyo adolah buluah. Jadi talang nan dimukasuik dalam papatah di ateh adolah buluah nan lunak nan didalamnyo biasonyo ado tasimpan aia.

Sacaro tasirek, papatah di ateh maumpamoan suatu mukasuik nan dituju, tapi ndak bisa diraiah. Ameh biasonyo bisa digunoan untuak mangganti pitih sarato dipakai untuak mamanuahi kebutuhan hiduik, balanjo. Karano ameh atau pitih iko ndak ado, anak timbangan bisa juo dijua untuak manjadi pitih. Bisa juo ameh ko tujuannyo untuak dipakai sabagai perhiasan untuak manunjuakan martabat sarato harago diri keluarga atau kaum. Karano ndak ado ameh, bisa sajo bungkah nan memang bawarna kuniang manyarupoi ameh tadi diasah dan dibantuak untuak manjadi perhiasan. Mako tujuan untuak mamakai hiasan tadi dapek tacapai.

Baitu pulo jo kayu nan biasonyo dipakai untuak manjadi bahan baka. Utamonyo bagi urang saisuak, mamasak sangai bagantuang jo kayu. Jadi kalo ndak ado kayu, mako ndak bisa mamasak. Untuak bisa tatap mamasak, kayu tadi bisa diambiak dari janjang nan tabuek dari kayu juo. Janjang tadi dikapiang sahinggo manjadi potongan nan labih ketek dan bisa manjadi bahan baka untuak mamasak. Tujuan untuak mamasak tadi akhianyo tacapai biapun kayu samulo ndak ado.

Hal nan samo juo untuak aia nan sangaik dibutuahan urang untuak minum. Ndak ado aia, akhianyo bisa mati karano kahauihan. Karano aia ndak ado, talang dapek dicari sarato dipancuang. Mako aia nan tasimpan dalam talang tadi dapek dijadian untuak minum. Dan tujuan untuak mandapekan aia minum tadi dapek pulo tacapai.

Papatah di ateh juo maajaan kito untuak indak baputuih aso. Bisa jo banyak caro untuak mancapai tujuan. Tantunyo tujuan nan elok-elok. Kalau dalam istilah lain, “tidak satu jalan ke Roma”. Indak ciek jalan ka Roma doh. Baitu pulo dalam mancapai satu tujuan nan baiak. Hal iko pulo nan dapek dipakai dalam keadaan kito kini. Alah tigo bulan sajak bulan Maret lai awak ndak bebas untuak kama-kama, bakumpua, bakaranjo, sarato baraja di sakolah. Bara banyak tugas nan ndak bisa dikarajoan karano harus di rumah sajo. Tapi itu ruponyo alah disalasaian jo banyak caro. Untuak baraja sarato bakumpua misalnyo, bisa dikarajoan sacaro daring atau manggunoan jaringan internet. Banyak aplikasi bisa digunoan. Ado pulo nan manyadioan jasa balanjo online. Apo nan dibali, dipasan sacaro online dan lah tibo sajo di rumah dianta dek kurir. Bahkan ado pulo nan manyadioan jasa rekreasi sacaro online. Petugas dari tampek wisata pai bakaliliang tampek wisata sambia manjalehan apo nan disiaran di sekitarnyo sahinggo nan di rumah bisa juo marasoan pai bakaliliang tampek wisata bia pun hanyo dari rumah. Ikolah salah satu bantuak panerapan dari papatah di ateh.

*DOSEN SASTRA MINANGKABU UNAND 

 


Wartawan : Eka Meigalia
Editor : bahren

Tag :# Langkan # Pepatah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com