HOME LANGKAN PEPATAH

  • Jumat, 1 November 2019

Basilang Kayu Di Tungku

Pepatah
Pepatah

Basilang Kayu di Tungku

Oleh: Eka Meigalia

Papatah di ateh langkoknyo “basilang kayu di tungku, di sinan nasi mangkonyo masak”. Kato basilang aratinyo samo jo saliang mamotong antaro duo garih. Nan basilang dalam papatah tu adolah kayu, batang tanaman nan kareh. Basilang di tungku, yaitu tampek tumpuan pariuak katiko mamasak. Biasonyo dari batu. Jadi bahan baka untuak tungku ko nan taralah adolah kayu.

Di tungku urang mamasak jo caro mambaka kayu tadi. Kayu dibaka jo api, mako nasi masak. Baa kok harus basilang pulo kayu tadi makonyo nasi masak? Dalam ilimu fisika, proses mambaka tu mambutuahan tigo bahan. Nan partamu bahan bakanyo. Di siko kayu adolah bahan bakanyo. Kaduo oksigen atau udaro. Katigo sumber angek, yaitu api. Kalau kayu sabagai bahan baka disusun rapi, rancak-rancak, indak ado tampek untuak udaro masuak. Sadangkan untuk mambaka tu udaro harus ado. Makonyo kayu harus disusun basilang-silang. Gunonyo untuak maagiah jalan untuak udaro masuak. Baru api bisa hiduik mambaka kayu. Kalau api lah hiduik, urang baru bisa mamasak. Ka mamasak apo sajo bisa. Tapi dalam papatah di ateh, nan dimasak adolah nasi.

Sacaro nan tasurek, papatah tu manjalehan bahaso untuak mamasak nasi di tungku, kayu harus disusun basilang-silang. Karano disusun basilang, api jadi hiduik nan ka manjadian nasi tadi masak. Tujuan utamonyo adolah nasi nan masak. Bukan sampai api iduik sajo karano disusun basilang-silang.

Papatah iko sabananyo manganduang mukasuik nan dalam. Hubuangannyo jo musyawarah mupakaik. Nan namonyo musyawarah samo jo mambincangan masalah sacaro basamo-samo. Tujuannyo untuak mandapek panyalasaian dari masalah tu.

Basamo aratinyo banyak urang nan talibaik untuak mambincangan suatu masalah. Alah kodratnyo pulo satiok urang ko balain-lain, baiak bantuaknyo apolai pikirannyo. Pikiran nan balain-lain dari satiok urang tu kalau disampaian mako akan ado nan disabuik debat. Dalam badebat ko, masiang-masiang akan manyampaian pamikirannyo basarato alasan-alasannyo. Karano itu dalam bamusyawarah tu dapek sajo suasananyo jadi angek ibaraik api nan iduik di tungku. Iduik karano ado nan babeda-beda.

Sasudah api tu hiduik jo suasana jadi angek ujuangnyo harusnyo didapek mupakaik. Mupakaik aratinyo saiyo sakato. Sado nan ado di situ pado akhianyo sapandapek, samo sapakaik makonyo disabuik mupakaik. Kalau dibaok baliak ka papatah di ateh, samo jo nasi nan akhianyo masak. Masak karano alah sudah pulo basilang-silang pandapek.

Bamusyawarah kalau indak ado silang pandapek indak dapek pulo dikatoan musyawarah. Sarupo nan tajadi di anggota dewan awak kini ko. Di pamarintahan nan baru ko, nan baru dilantiak mulai dari anggota dewan sampai ka Menteri, ado nan baru nampak. Salamo ko partai-partai nan manjadi oposisi (lawan) ruponyo alah masuak pulo dalam jajaran pimpinan. Sarupo Gerindra nan samulo balawanan jo PDIP, taruih jadi oposisi, kini malah jadi Menteri pulo. Tapeknyo Pimpinan Partai Gerindra, Prabowo Subianto nan diangkek jadi Menteri Pertahanan. Karano itu, Partai Gerindra indak jadi oposisi lai di DPR. Inyo lah masuak ka kubu nan indak balawanan lai jo pamarintah.

Mako kini ko di dewan masih alun jaleh sia nan manjadi oposisi. Ado ciek PKS nan lai batahan untuak tatap jadi oposisi. Nan lain masih antah iyo antah tido. Bisa juo barubah manjadi sasuaro jo pamarintah. Mako di Dewan kini ko dapek dibayangan indak ado lai nan ka balain suaro. Sasuaro sajo maiyoan apo nan dimintak Pemerintah.

Ado urang-urang nan maanggap itu elok. Sadonyo sasuaro di Dewan. Samo iyo atau samo indak. Tapi baliak ka masalah musyawarah tadi. Kalau indak ado silang pandapek, baa mancapai kato mupakaik tadi. Alah samo sajo jo kabau nan dicucuak iduangnyo, kama dielo talinyo, ka situ nyo maarah. Padohal hakikaiknyo satiok urang tu babeda-beda. Satiok urang punyo pandirian jo pamikiran pulo. Harusnyo satiok pamikiran itu disampaian bia pun balawanan. Sado nan mandanga dapek pulo mamikian baiak eloknyo. Sasudah itu baru dapek dicapai kato mupakaik. Kato nan paliang baiak dari nan ado.

Alah sapatuiknyo pulo di dewan tu ado silang pandapek, karano di DPR tu taruih ado rapek nan sabananyo adolah bantuak dari musyawarah. Satiok partai punyo hak suaro nan dapek disampaian di forum. Mako partai oposisi sabananyo sangaik dibutuahan untuak ragamnyo suaro di dewan. Jan sampai sado kandak dari pihak pamarintah langsuang disapakati sajo. Karano, kadang ado kandak dari pamarintah nan indak sasuai atau dapek marugian masyarakat. Hanyo untuang untuak nan bakuaso sajo. Di situ pulolah gunonyo babeda-beda pandapek tadi. Sarupo papatah nan dibahas kini ko, basilang kayu di tungku, di sinan nasi makonyo masak. Hakikaik dari musyawarah tu adolah basilang pandapek untuak mandapekan kato mupakaik.


Wartawan : Eka Meigalia
Editor : bahren

Tag :# Langkan # Pepatah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com