HOME LANGKAN KATO

  • Kamis, 7 Oktober 2021

Carito Calon Dotor (Tugeh)

Carito
Carito

Carito Calon Dotor

Tugeh

 

Oleh:Bahren*

 

         Adaik manjadi anak baru lah namo nyo, Tan Baraian alah pulo marasokannyo. Kini... yo kini ko bana wakatunyo. Sapakan duo pakan manjadi anak baru sikolo Dotor nan lah ditampuah dek Tan Barain kini alah pulo mulai sibuk dek tugeh-tugeh nan harus dibuek jo dikarajokan. Babagai macam parsoalan nan manjadi dorongan sakaligus halangan dalam mabuek tugeh-tugeh dari guru-guru nan maajak di kalas samester kini ko. Tugeh nan diagiah dek baliau tuan-tuan guru ko pun babagai mode jo rno nyo. Ado nan hanyo sakadar mambahas jo maringkas isi jurnal, ado pulo nan harus mambuek artikel untuak ditabikkan di jurnal, ado pulo guru nan maagiah tugeh kaduo-duo nyo mambahas iyo manulih iyo. Tapi kumbali ka carito di awa mulo tadi adaik manjadi anak baru jo anak sikola alah biaso se tunyo dapek tugeh nan bak kian. Kini dek kito nan manjadi anak sikola sajo lai harus bapandai-pandai dalam maatur wakatu jo kutiko dalam manyalasaikan tugeh demi tugeh nan dibari dek tuan-tuan guru cako.

         Indak doh kadibaok balamo-lamo parakaro nan ciek tu, nan jaleh kini ko Tan Baraian alah mamutuihkan untuak manjadi anak mahasiswa baru tantu sajo sagalo bantuak halangan jo rintangan nan ka mahadang nantiyo kutiko sadang sikola jo niaik nan baik sarato do’a dan kaiklasan sajo nan mairiangi karajo elok nangko. Diansua-ansua pulo mancari bahan jo buku-buku nan paralu untuak kadijadikan pagangan jo bahan bacaan. Mulai pulo batanyo-tanyo ka kangkawan nan alah labiah daulu manginyam sikola tingkek dotor ko. Badiskusikan pulo jo guru-guru kito nan lain tantang babagai parakaro sikola dan tugeh-tugeh ko. Aratinyo bana dima dapek mancari ilimu jo pangatahuan di sinan lah Tan Barain barado untuak saliang badiskusi jo batuka pikiran.

         Limbak nan dari pado itu, ado tujuan mato palajaran nan ditawarkan dalam samester kini nangko, aratinyo ado satidaknyo tujuah pulo tugeh nan harus dikakok dalam sapakan. Jikok lah ciek tugeh ko harus ado 5 bahan bacaan nan manjadi padoman, mako satiok minggu satidaknyo ado tigo puluh limo pulo buku atau artikel nan harus dibaco untuak manjawek tugeh demi tugeh nan dibari. Intinyo bana sambuah, baik itu bahan bacaan atau pun tugeh nan harus dibuek. Alun lai biko tugeh sarato bacaan nan harus disiapkan pulo dek Tan Barain untuak murik-murik e di sikola, karano Tan Barain hanyo mandapek ijin baraja mako kawajiban dalam manjalankan tugeh sabagai guru indak pulo buliah dilupokan. Singkek kato dalam tangah duo taun ka muko ko, iyo agak padek jadwal nan harus dikaja jo disalasaikan dek Tan Barain. Mudah-mudahan Tan Barain bisa manjalaninyo dangan hati suko jo niaik nan elok karano Allah. Inggan iko carito calon dotor sakali ko dulu dunsanak, di lain maso jo kutiko kito sambuang baliak (basambuang...)

 

*Dosen Sastra Minangkabau FIB Unand


Wartawan : Bahren
Editor : bahren

Tag :#Langkan #Kato #Carito #Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com