HOME LANGKAN KATO

  • Minggu, 26 September 2021
Carito Calon Dotor (Anak Baru)
Carito

Carito Calon Dotor

Oleh: Bahren*

Anak Baru

        Duo hari sasudah marayoan ulang tahun Negara kita nan tacinto ko, tapeknyo di hari Kamih kami mulai manjadi anak baru di Kampus aia tawa. Adaik manjadi anak baru tantu sajo kami ditarimo jo disambuik dek pak Rektor Jo Pak Dekan, cukuik sagalo pajabat nan patuik hadir dalam patamuan awal ko. Babagai nasihat jo pituah tantu sajp dibarai kabakeh kami anak nan baru ko. Babagai impo tantang tata caro kuliah jo perkuliahan salamo maambiak jalur dotor ko pun kameh sakameh-kameh nyo dijalehkan dek apak-apak pejabat nantun. Babagai buku jo dukumen nan diparalukan salamo manjadi anak baru di kampusko pun turuik di kirimkan salindia nyo ka kami nan baru nangko. Pokok e nan sahari tu iyo lah bak cando tamu agung bana kami disambuik dek baliau-baliau tu.

        Alah baganti-baganti apak-apak ko maagiah pituah jo sambutan, mulai dari Pak Rektor lah disambuang pulo jo Pak We Er satu, salasai liau mambari pituah soal akademik disambuik lo dek Pak We Er duo nan bacarito tantang sagalo pakaro nan baurusan jo masalah kauangan nan harus manjadi tangguangan kami, sampai lah akianyo ka Pak dekan jo Pak Kalapo Prodi Kami nan labiah manjurus ka urusan baa bana sistim kuliah di Jurusan nan kito ambiak nangko. Jaleh sarato langkok impo nan kami dapek, tingga dek kami sajo manjalani lai kuliah partamo minggu mukonyo.

        Tan Barain, dek lah mandapek impo nan bak kian, lah mjlai pulo bacigok-cigok portal nan alah dibagikan alamaiknyo sabalun kami kuliah. Alah batenok pulo ciek-ciek apo sasaran jo tujuan akia dari satiok mato kuliah. Alah pulo babuek an masiang-masiang gurup WA untuak bakoordinasi jo dosen nan ka mambari kuliah kami di pakan nan ka tibo. Gurup untuak mahasiswa pun alah pulo kami buek, baagiah judul nan bisa mambari sumangai kito basamo banamolah gurup WA kami ko Insya Allah Dotor 2024.

        Di dalam gurup alah pulo mulai batanyo-tanyo dari ma kangkawan nan baru ko. Ado nan dari duri, Pakan Baru, jo dari Medan, Dari Batam jo Palembang dari Padang jo dari Solok, Dari Batu sangka jo Kiktinggi. Limbak nan dari pado itu. Kok ditanyo pulo program studinyo, ado nan maaja di PGSD jo Jurusan lain, ado Nan maaja di Sastra indonesia, jo Inggiris, Sastra Japang jo Sastra Minang. Aratinyo bana alah mandunia program nan kami piliah ko, sajak dari nan lokal sampai ka internasional bagabuang dalam angkatan nan taun kini ko.

        Adaik dek kami anak baru, tantu nan bakatahuan jo saliang barkanalan paralu juo agak sajamang. Mako dibuek pulo lah partamuan basitatap maya kami di zoomeeting, untuak sakadar nak tau dari namo jo kota kangkawan ko tingga. Babagi pangalaman jo carito lah kami tantang pilihan ko. Intinyo baa carito calon dotor nan samo-samo supakaik untuak tamat di taun 2024 ko kabalanjuik jo dikabakan ka dunsanak satiok minggunyo. Asa lai sanak saba mananti, tantu caritonyo indak sajo dari Tan Barain, carito dari kangkawan nan lain juo kadi kabakan dalam kisah ko. Sasuai jo namo caritonyo, iyolah carito calon dotor tantu agak banyak kisah sikola di dalam satiok carito nan babarikan. Mudah-mudahan dangan dicataik jo tulihkan bisa manjadi paingek-ingek jo kanangan dek kami nan saangkatan. Kajadi buah kisah pulo lah ahndaknyo untuak dek anak cucukami barisuak hari, baa kisah apak jo angkunyo salamo manginyam sakola inggo tingkek nan labiah tenggi. (basambuang…)   

 

*Dosen Sastra Minangkabau FIB Unand


Wartawan : Bahren
Editor : bahren

Tag :# Langkan # curito #minang