HOME LANGKAN KATO

  • Sabtu, 10 Juli 2021

Awas Antu Masuak Saku!

Medsos
Medsos

Awas Antu Masuak Saku!

Oleh TE Radjo Boedjang

Sakali lai tantang medsos. Nan bisa jadi radio lutuik mode kini. Maaru-aru pangana. Marusak bana, sahinggo tak jaleh maa nan bana maa nan salah!

Nan bana bisa dak bana. Nan dak bana bisa bana. Bana pun kini makin relatif, sungguahpun sacaro hakikat hanyo Baliau nan Maha Bana.

Relatif kabanaran tu, di dunia nan makin online ko, makin manjadi-jadi. Maklum tiok urang kini lah pakai kacomato surang-surang. Referensi bisa nyo pilieh surang-surang. Tingga mancari di Google, ciek tanyo banyak jawek.

Apo se ditanyo, Angku Google punyo jawek. Antah bana antah tido, tapi itu lah jawek nan ado. Itulah nan bana, kecek kito!

Padohal, Google ko hanyo palanta. Tampek satiok nan bana jo nan duto bacampue aduek. Sabanyak nan batue, sambuah pulo nan duto. 

Sabananyo ado caro untuak mamilah. Antaro lain ado portal (palanta) nan punyo pamarentah, tandonyo tatulih .go (baco: dot go) dibalakang. Ado pulo dot co, iko perusahaan mah. Ado dot sch, sakola. Dan dot ac, ko sakola tenggi. Portal pamarentah, sakola tenggi (Perguruan Tinggi), jo sakolah tantu bulieh dipacayoi. 

Adopun dot-dot nan lain, tantu bisa juo dipacayo. Tagantuang isi (konten) nan dipublishnyo. Kok urang manggaleh, lah pasti baa galehnyo nan ka laku. Dek pandai maruok, cirik kambiang bisa jadi ubek. Dek rancaknyo foto baju, sipatu jo sarawa, urang pun tapadayo balanjo online. Lah ka tangan barang tu, baru tau atah jo bareh.

Idak hanyo portal-portal korporasi (dot co), portal-portal pribadi pun (dot com) bisa juo dipacayo sapanjang nan dipublish bisa dipatangguangjawekkan. 

Mako tiliek paralu dilakukan. Pikie palito ati, nanang saribu aka. Tiliek (teliti) daolu sagalo sasuatu nan tasaji di dunia maya tu. Kok paik jaan lansuang diludahkan. Kok manih jaan lansuang dilulue.

Tapi, di siko masalah tibo. Paik manih info di dunia maya tu datang batubi-tubi. Ibaraik ayie bah, di portal dan di medsos tiok datiek masuak ka rumah. Masuak ka biliek. Masuak ka saku-saku. Masuak ka kapalo. Manjadi paham di ati. 

Namonyo ayie bah, sia nan talok maadangnyo? Baa caronyo maambek urang sadunie mamposting apo nan kalamak dek inyo. Dak bisa managahan urang mamposting isi ati, manaruah foto urang anyuik atau manaruihan kaba urang. Galeh basambuik. Kaba urang inyo kabaan.

Kok nan rancak, tantu paralu dibatehi medsos ko. Bukan untuak mambatehi urang mampacaliek an pikiran jo atinyo, tapi baa supayo dak ado surang pun nan anonim alias antu di medsos ko. Bukan untuak mambatehi HAM, tapi supayo urang batangguang jawek jo karajonyo. Tangan mancancang, bahu mamikue.

Memang lah ado UU ITE. Dalam babarapo hal mungkin rancak, dan bisa mangurangi karuah ayie di sungai medsos. Tapi salamo tiok urang bisa jadi antu (ghost) di medsos, UU ITE ko jadi kurang mangkuih.

Buktinyo, baraa banyak di medsos--Facebook, Instagram, Twitter, dll--akun palasu. Akun anonim. Akun antu!

Tantu iyo murah manjadi antu di medsos tu, karano registrasinyo cayah bana se nyoh. Cubo jikok registrasi tu paralu scan KTP, dak ka ado nan talok mangata-ngatai presiden di medsos tu doh. 

Kini, karano banyak antu (akun anonim) bagantayangan, mako hoaks, ujaran kebencian, adu domba, fitnah, dll bak ramo-ramo banyak e di medsos! Urang nan dak ado niek jadi antu, karano lungga aturan registrasi tu, bisa barubah jadi ghost nah. Apo lai urang nan memang suko jadi antu, akun anonim ko jadi jalan untuak manokok kawan dakek tanpa nyo tau. Mangguntiang dalam lipatan! 

Antu ko bahkan bisa lo jadi profesi. Buzzer namoe. Untuak maangkek talue, paralu para antu dibayie. Fenomena buzzer ko lah marambah ka banyak sisi iduik. Kok daolu acok di pakai di dunia politik, kini lah marambah ka dunia bisnis. Untuak manggaleh paralu buzzer juo rupoe!

Mako, jaan diadang ayie gadang, elok mailak ka tapi labuah. Nan antu tatek kan ado. Sarupo setan nan lah teken kontrak jo Tuhan, antu masuak saku salah satu jalannyo.

Kok takuik dilamun ombak, jaan barumah di tapi pantai. Nak jaan tibo antu ka saku, pilieh portal jo medsos nan ka dimasuki. Atau, pabanyak referensi dan kuasoi referensi paliang tenggi; Al Quran jo Hadist. In Sya Allah antu online tabang ambue karano paham lah dipaek dalam di ati.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com