HOME LANGKAN KATO

  • Sabtu, 26 September 2020

Provinsi Minangkabau; Taimpik Nak Di Ateh, Takuruang Nak Di Lua

Peta sebagian besar kawasan Minangkabau
Peta sebagian besar kawasan Minangkabau


Provinsi Minangkabau; Taimpik Nak di Ateh, Takuruang Nak di Lua

Taimpik nak di ateh, takuruang nak di lua? Baa sabanae du? Lai dak cadiek buruak aratinyo ko?

Ndak lah. Memang banyak nan salah maaratian pituah ko. Keceknyo, iko bukti "Padang Bengkok" mah! Cabur, alias cadiek buruak.

Padohal iko bukti kehebatan Urang Minangkabau. Tak picayo? Cubo simak tulisan ko taruih.

Daolu, wakatu Buya Hamka dipanjaro, tanyato sudah dek liau Tafsir Al Azhar. Ruponyo, badan liau nan takuruang, tapi pikiran tatek mardeso. 

Mardeso pikiran, mardeso hati. Mardeso pulo badan. 

Jikok pikiran tajajah, hati takuruang. Badan pun takulai.

Mako, mardeso ateh lai itu paralu basaratoan jo "taimpik nak di ateh". Pikiran harus "takuruang nak di lua". Jan sampai aka singkek, pangana tatumbuak!

Daolu, wakatu peri-peri (PRRI) malatuih, sabanyak nan jadi tantara rimbo, sambuah pulo nan bapihak ka tantara pusat. Peri-peri sudah, Urang Minang taimpik. Tapi di ateh!

Lah sudah bagolak, biduek pun lalu kiambang batawik. Bukan sarupo dak tau se ateh apo nan tajadi. Tapi maklum ateh apo nan jadi hanyo samato karano takadie Allah. Rancana di awak, kaputusan di Tuhan.


Babaliek ka pakaro mardeso. Ado mardeso bapikie, ado mardeso batindak. Dan sangaik independen tiok urang. Nan sarumah pun bisa babeda tampek tagak.

Caliek lah di Pilkada--kini se lah mulai tampak--ado urang sarumah babeda tagak, babeda pilihan. Dak ado pakaro. Nan tiok basobok tatek saliang sapo. Walaupun banyak juo nan dak basapoan karano urusan piliah mamiliah ko.

Nan sampai idak basapoan tu, lah jaleh panyampik kalang mah. Duduak basamo basampik-sampik dek inyo. 

Tapi, nan maraso duduak sorang basampik-sampik, inyo lah mardeso badan, aka jo ati. Mardeso karano nak takuruang di lua!

Awalan kato "nak" manganduang arati, kainginan, tekad atau cito-cito. Jikok lai ado raso jo cito-cito "takuruang nak di lua", mako in Sya Allah bisa mardeso. 

Tak hanyo mardeso ateh lai. Ateh tidak pun kito mardeso. Mardeso pikiran. Mardeso ati. Asa lai "taimpik nak di ateh", mardeso nah.

Pun, ciek lai, karano "taimpik nak di ateh", Urang Minangkabau jadi egaliter. Inyo mancaliek sasuatu itu jauah ka aspek-aspek lain. Idak mancaliek jo mato kudo doh!

Tigo belok di muko, lah tabayang, kutiko ado hal nan paralu disisiasek-i. Dak sakadar mancaliek tigo belok ka muko se doh. Tapi baranang ikan dalam ayie, lah tantu jantan batinonyo. 

Bahkan, Urang Minang pun mancaliek jo hati. Batin. Balayie, babatin. Dalam batin babatin pulo. Sarupo kulik bawang, balapih-lapih pangana jo makripek. Saabih-abih makripek, aniang. Dak bakato-kato.

Baitu pancaliek-an Urang Minang. Pun baitu pulo pancaliak an Fadli Zon--politisi nan "gadang" di rantau karano mancaleg dari Jabar, dan lah babarapo periode jadi legislator, dan vokal lo lai, di DPR RI--nan malewakan gagasan; Provinsi Minangkabau.

Sacaro layie, Urang Sumbar 83 persen labieh adolah Urang Minangkabau. Ulayek Minangkabau memang labieh gadang dari wilayah Sumbar kini. Dari Buayo Putiah Daguak, hinggo Sirangkak nan Badangkak. Sampai ka lawik nan sadidih. Iyo laweh. 

Lawik sadidih, lawik nan tanang tak baombak, mungkin kiro-kiro di Selat Sunda tu mah. Lampung kini? Bisa jadi. Baitu kiro-kiro.

Tapi--sacaro batin--kok kito pareso Sumbar ko, dari 83 persen nan Urang Minang tu, lai ko lah 100 persen Minangkabau batinnyo?

Kok dipareso sabaliek lai, urang nan batinnyo Minangkabau, pasti di layie nyo tampak keminangkabauan. Mangecek jo caro awak, bakurenah jo caro Minangkabau, dan jaleh sasok jarami jo asa katurunan yang dijango dan dijago. 

Etong se lah sorang. Lai baraa persen Urang Minang hari kini babahaso Minang di rumah surang-surang? Eten di kaki bukik, lah ado nan dak Minangkabau bahaso urang lai doh. 

Beko lah kok dipareso, lai kok jaleh sasok jaramie? Lai kok abeh pandam pakuburannyo? Apo suku? Siapo mamak? Siapo pangulu? Lai abeh ko lah?

Sakali lai, jawek se lah surang!

Mako, satantangan ide Fadli Zon itu, antah kok banamo Provinsi Minangkabau bana Sumbar ko supayo babaliek ka caro-caro Minangkabau? 

Caliek lah tanok-tanok. Tarenok bana jo ati. Pakai ilemu "taimpik nak di ateh, takuruang nak di lua". Mungkin karano Fadli Zon acok di lua mako timbue ide nan tun, samantaro kito lah "takuruang di dalam" kotak nan banamo Sumbar; aka singkek pangana tatumbuak. 

Mako, baitu lah. Provinsi Minangkabau, pulang maalum ka bakeh nan basamo. Kito etong baraa nan "nak takuruang di lua".


Wartawan : TE Radjo Boedjang
Editor : sc.astra

Tag :#ProvinsiMinangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com