PASIE LAWEH

PASIE LAWEH

di Luhak Tanah Data

Oleh: Bahren*

         Tasabuiklah curito dari baliau Datuak Rajo Pangulu. Anam puluah ampek umua liau wakatu itu, samaso bacurito jo bakisah ka Zuriati di kadai kopi Pasie Laweh. Datuak Rajo Pangulu pansiunan guru di Pasie LAweh nangko. Apokoh bana curito liau, simakkan malah baiak-baiak dangakan molah elok-elok.

         Adolah maso daulunyo, urang nan barasa dari pasie laweh nangko iyolah urang nan pasiah babahaso jo mangeceknyo. Limbak nan dari pado itu, salain pasiah mangecek jo babicaro, urang nan dari daerah kami ko tamasuak urang nan punyo pangatahuan nan lueh, laweh cando urang kami di siko. Sainggo jikok ado nan kadisampaikan urang kami bisa manyampaikannyo sacaro pasiah, sabek nan dari pado itu, jikok lah ado rapek di Sungai Tarab. Alun akan dimulai rapeknyo jikok urang nan pasiah ko alun datang di acara nantun. Lain nan dari pado itu, dek ulah pasiahnyo urang kampuang kami ko, banyaknya diantaronyo nan manjadi ulama karano bisa manyampaikan sagalo sasuatu dengan pasiah. Mako lamo ka lamoan daerah asa rang na pasiah sarato laweh pangatahuannyo tu banamo Pasie Laweh.

         Daerah kami Pasie Laweh ko iyolah daerah pintu masuak ka Sungai Tarok Darussalam. Dek karano itu pulo lah agaknyo kampuang kami ko disabuik jo asie Laweh Babussalam nan aratinyp pintu kasalamatan. Dek karano itu pulo lah agaknyo daerah nan talatak dakek pintu masuak ka Sungai Tarok tu banamo jo Kampuang Babusssalam. Ado pulo sabuah kampuang nan lataknyo dake lurah nan maampang atau malintang jalan dibarilah namo kampuang tu jo namo Lurah Ampang.

         Sabuah lai kampuang nan babantuak tanjuang dan dijadikan ladang lado di ateh bukik tanjuang nantun. Dibarllah namo kampaung tadi jo sabtuan Kampuang Tanjuang Lado Ateh Bukik. Samantaro itu, kampuang nan banyak batang talang jo batang dusun (bawang putiha) nyo dibari namo pulo lah kampuang tu jo sabutan Talang Dusun.

         Namun samantang pun baitu, salain pandapek dari Mak Datuak Rajo Pangulu ado juo nan bapandapek baso Pasie Laweh ko asanyo dari kaadaan daerah tu nan bapasie  akibaik dari runtuahan gununag marapi nan sangai lawe kutiko malatuih daulunyo. Tapi masyarakaik tatap picayo baso pasia tu asanyo dari kato pasiah, karano daerah ko alah ao sabalun latusan gunuang marapi nantun dan lah banamo Pasie Laweh juo.

         Niniak moyangkami urang  Pasie Laweh nangko, barasa dari Tabek Sawah Tangah, ado juo nan dari Sungayang jo Pagaruyuang. Adopun suku kami di Pasie Laweh ko ado nan basuko Caniago, Gugun, Piliang jo Mandahiliang. Bitulah kisah dari Mak Datuak Rajo Pangulu. Kok ado kisah nan bana tantu kabanaran datang dari tuhan, jikok ado curito nan salah nan tasampaikan tantu salah asanyo dari kito, manusia. Ka dunsanak nan mambaco maaf dipintak ka tuhan, ampun dipinto.  

*Dosen Sastra Minangkabau Unand