HOME LANGKAN TINGKOK

  • Senin, 9 Desember 2019
PARAMBAHAN
TINGKOK

PARAMBAHAN

di Luhak Tanah Data

OLEH: BAHREN*

 

Jo bismillah kato dibukak, kato di bukak panjawek tanyo. Apokoh garan nan manjadi tanyo dek baliau Zuriati ka baliau Datuak Sinaro di Parambahan Tanah Data. Tujuah puluah tujuah umua angku Datuak Sinaro wakatu itu, kutiko Zuriati datang bakunjuang, mahadok kabakeh baliau sarato jo rombongan nan datang dari Padang. Tanggal duo puluah anam di bulan Mei tahun duo ribu tujuah wakatu rombongan datang ka Parambahan.

Apokoh garan mukasuik jo tujuan rombongan datang kamari, baitu bana tanyo Mak Datuak. Manjawk malah Zuriati maso itu, gadang mukasuik ka dijalang Mak Datuak, mako kami datang mahadok. Adopun mukasuik jo tujuan kami datang mahadok Datuak, iyo nak batanyo-tanyo ka Datuak manga nagari mangko banamo Parambahan. Tolong dek datuak kami dibari jawek nak sanang pulo di dalam hati sajuak dalam kiro-kiro.

Jikok nyo itu nan batanyokan, ambo bilang sado nan dapek sarato nan takana, siso nyo bia manjadi jawek rang nan pandai. Manga nagari banamo Parambahan, biko curito nan ambo danga sarato ambo dapek dari nan tuo-tuo daulu. Danga kan malah elok-elok simakkan molah baik-baiak.

Adolah pado suatu kutiko barankek lah sarombongan niniak kami dari Pariangan Padang Panjang, barangke untuak mancari sarato mambuek lahan nan baru ka tampek tingga sarato tampek bacocok tanam. Dek lamo lambek bajalan sampailah niniak moyang kami di sabuah tampek nan masih samak sarato baluka. Untuak dapek lalu di daerah nantun mako dirambah lah dek niniak moyang kami samak baluka itu tadi. Inggo niniak kami bisa mambuek labuah untuak ka jalan nan ka ditampuah, mako banamo lah daerah nan lah bisa dilalui cako jo namo Labuah.

Limbak nan dari pado itu, dek jalan alah barambah mako hasia dari parambahan tadi dibuanglah dek niniak muyang kami kasabuah tampek pulo. Mako tampek mambuang hasia dari marambah tadi dibari lah namo tampek nantun jo namo Parambahan. Dek lamo bakalamoan mako labuah jo parambahan tadi digabuang lah manjadi ciek disabuik jo Labuah Parambahan. Tapi samantang pun baitu, dek urang samakin rami juo, panduduak samakin banyak mako labuah parambahan dibagi duo juo lah akianyo manjadi Labuah jo Parambahan.

Ado sabuah kampuang di Parambahan nan lataknyo mamanjang di sapanjang paramhaban nangko. Dek lataknyo nan mamanjang mako dinamoi lah dek niniak moyang kami daerah nantun jo Korong Panjang, nan aratinyo bana kampuang nan mamanjang. Samantaro itu kini, ado pulo kampuang nan lawek sarato leba, mako dek niniak kami mamakai mamangan alam takambang manjadi guru dibari namolah korong kampuang nantun jo namo Korong Laweh.

Daerah nan labiah kaciak dari korong kami disiko manyabuiknyo jo sabutan jurai, ado sabuah jurai di Parambahan nangko nan daulunyo mampunyoi sabuah kubu babantuak tanduak mako dibari namolah jurai nantun jo namo Kubu Batanduak.Ado pulo sabuah daerah nan dari sajak mulo di uni dek tigo urang niniak, mako banamo lah tampek nantun jo namo Tigo Niniak. Indak doh jauha dari tigo niniak ado pulo sabuah kubu tampek batahan sarao manganiang basimbunyi caro rang kini, dek kubu tu digunukan untuak manganiang mako banamo lah Kubu Manganiang, kubu tampek basimbunyi. Nan tarakir sakali ado daerah nan dihuni dek tigo niniak duku di batua atau tanah/ tampek mako banamolah daerah tu kini Tigo Batua.

Informasiko lah di dapek dek baliau Datuak Sinaro dari mambaco carito tambo sarato curito rang tuo-tuo di kampuang jak daulu. Asa nyo niniak moyang kami iyo nan dari Pariangan Padang Panjang dari niniak nan basuku koroang Gadang, Suku Caniago, Sungai Napa, Korong Dalam, Tapi Malana, Panyalaian, Suku Pinang, Dalimo, Caniago Ketek, Mandaliko jo Suku Mariah. Itu lah kisah nan ambo danga mudah-mudahan manjadi ama dek nan manyampaikan ka ambo sarato manjadi ama pulo lah dek ambo handaknyo.

 

*DOSEN SASTRA MINANGKABAU UNIV. ANDALAS


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau