Palawan

Palawan

Oleh: Bahren*

Ang palawan mah. Maleh den jo ang

Nyo palawan mah. Ndka usah di ajak lai

Jan diagiah lo inyo, inyo palawan.

Usah dibantu pulo jurusan tu. Ketuanyo palawan mah.

Ampek kalimat di ateh, acok kali awak danga kutiko urang gaek, kawan, atau pimpinan sabuah lembaga bakato kutiko mandapek-i anak, kawan atau anak buahnyo indak babuek atau indak mangarajoka sagalo sesuatu nan di suruah, parintahkan atau dilarang indak dikarajoan dek urang nan disuruah cako. Inti dari kato nan ado di satiok kalimat di ateh iyolah palawan. Jikok kito inik sarato manuangkan. Kato palawan ko sungguah sabuah kato nan maarahkan lawan bakato indak manutuik suruah dan maninggakan larangan.

Kato palawan ko, biasonyo disambuahan jo kato nan lain,misalnyo palawan dalam hati, palawan bana. Aratinyo bana, kato palawan dalam hal iko indak maarah ka sabuah tindakan nan manggunokan kekuatan atau tanago, atau palawan ko indak ado maarah ka tindakan kekerasan sacaro pisik, tapi kato palawan hanyo sakadar bantuak dari parasaan indak manarimo sabuah suruahan, indak mandanga sabuah arahan, atau indak satuju jo sabuah kaputusan nan alah diambiak.

Babeda jo kato malawan, kato malawan biasonyo diikuti jo perilaku sacaro pisik, manahan, mambaleh atau bahkan bacakak. Samantaro palawan labiah ka tindakan indak manarimo sacaro diam dan cenerung disimpan dalam hati. Urang palawan biasonyo labiah punyo prinsip-prinsip nan sacaro naluriah inyo pagang dan inyo kuasai. Urang palawan ko biasnyo dianggap sabagai urang nan acok manggangu karajo nan lah dirancang salamo ko. Tapi nan harus dikatahui pulo dek urang nan maanggap urang lain ko palawan sabanyo nan palawan ko indak pulo suai pangananyo jo nan mangatokan palawan ko.

Manjadi aneh nyo, katiko surang urang dianggap palawan dek gara-gara indak satuju sajo jo program-program dan caro karajo urang nan manganggap palawan ko. Apokoh satiok urang nan indak satuju atau indak mandanga apo nan awak katokan itu bisa langsuang kito cap urang ko palawan. Atau mungkin urang nan manngatokan awak ko palawan justru nan palawan sabananyo.

* Dosen Sastra Minangkabau FIB Unnad