HOME LANGKAN TINGKOK

  • Selasa, 29 Oktober 2019

Padang Gantiang

TINGKOK
TINGKOK

PADANG GANTIANG

DI LUHAK TANAH DATA

OLEH: BAHREN*

 

            Aia angek di Padang Gantiang

Duo jo rangek Pariangan

Sapuluah koto sato di dalam

 

Mako banamo Padang gantiang

Danga dek sanak apo garangan

Dek karano baguru kapado Alam

 

 

Datanglah pado maso itu, tanggal duo puluah tujuah di bulan Mai tahun suo ribu tujuah wakatu itu. Datanglah Zuriati sarato rombongan dari Padang, mahadok ka baliau B. Datuak Mantiko Kayo. Anam puluah duo umua Mak Datuak kutiko itu, kutiko dikunjuangi dek kami barombongan. Wakil Katua KAN jabatan baliau sangkek itu, wakatu kami datang bakunjuang. Apokoh mukasuik datang nak batamu, ka baliau Mak Datuak Mantiko Kayo, sungguah nyo gadang mukasuik dibaok, nak batamu samo liau nangko.

Adopun tujuan jo mukasuik, Kami nan datang dari Padang, mahadok ka Mak Datuak, iyolah nak batanyo-tanyo ka Mamak, ba’a mangko nagari banamo Padang Gantiang. Dek lah paham jo mkasuik, sarato tau jo tujuan Kami, bakisah molah Mak Datuak Mantiko Kayo. Bagulambek liau bakisah, manyurah sado nan tau, mancurai sado nan di dapek. Danga molah baiak-baiak, simakkan molah elok-elok. Mangko nagari banamo Padang Ganting baiko malah curitonyo.

Adolah pado zaman daulu, daerah kami ko iyolah medan tampek baparang, Parang nan lah tajadi sajak lamo. Limbak nan dari pado itu, dalam baparang nantun umumnyo pasukan kaduo balah pihak manggunokan padang sabagai alaik palinduangan diri. Dek sangaik lamo baparang, mako gantiang lah padang nan digunokan dek urang nan baparang nantun, inggo ampia putuih lah agaknyo Padang nantun. Abih hari baganti minggu, abih minggu babilang bulan, bulan lalu tahun baganti. Dek lamo lambek baparang mako barakia juo malah jadinyo. Tampek baparang nan manggunokan Padang inggo gantiang tadi tasabuik malah daerah nantun jo sabutan Padang Gantiang.

Ado pulo sabuah lai, kaba nan ambo dapek kan dari niniak moyang kami, nan tuo-tuo dahulu. Manga banamo Padang Gantiang, karano jikok kito mancaliak antaro ciek daerah jo daerah lain di sakaliliang nagari nangko tampak takah gantiang ampia ka putuih, mako tasabuik lah daerah nangko jo namo Padang Gantiang.

Samantaro itu kini, dek nagari batambah rami juo, dibuek malah pamukiman-pamukiman dek niniak moyang Kami, daerah pamukiman atau dlam baso rang di siko disabuik koto, nan agak gadang mako banamo Koto Gadang.  Ado pulo koto nan gadang talataknyo arah ka Ilia, mako banamo lah koto nantun jo sabutan Koto Gadang Ilia. Ado pulo sabuah lai, koto nan bapasang Alam Atau bandera  caro rang kampaung kami, mako daerah itu kini banamo lah Koto Alam. Sabuah lai daerah nan didiami dek baliau kaluarga Rajo Dani mako banamo lah daerah tu kini  nan daulunyo banyak bancah atau rawang caro rang kini. Mako dibarilah dek niniak moyang kami daerah itu kini jo sabutan Boncah.

Labiah dalam Mak Datuak Mantiko Kayo bakisah pulo maso itu, baso urang Padang Gantiang ko ado nan asanyo dari pariangan jo Limo Kaum, Dusun Tuo Batikam jo Gurun sarato dari Simabua. Suku nan ado di nagari Kami nangko, ado nan basuku Sambilan, ado pulu basuku Tujuah, Suku Caniago jo Suku Kutianyia, langkok jo Suku Rajo Dani sato di dalam.

Adok ka bake carito parang nan di ateh tadi, agakyo parang nan dimkasuik dek Mak Datuak Mantiko Kayo iyolah parang Paderi. Parang nan tajadi antaro kaum adaik jo ugamo. Manuruik pandangan Kami nan manaliti, pandangan itu basabab dek bakarano adonyo daerah nan banamo Koto Alam. Alam ko sasungguah nyo bamakna bandera atau panji nan dipancang dek kaum Paderi wakatu itu.

Itu malah kaba curito sarato asa jo usua mangko nagari banamo Padang Gantiang. Jiko ado nan salah tantangan surah nantun, salah nan datang nyo dari ambo, makalum sajo lah dek dunsanak nan mambaco. Kito nan hanyo manusia, tampek salah jo gawa bagantuangnyo. Jikok nyo ado carito nan bana, tantu kabanaran datangnyo dari Tuha. Allah ta’ala kayo sungguah tampek sagalo ilimu bahimpunnyo. Ka dunsanak nan mambaco maaf dipintak, ka Allah ampun di pinto. Wallahu a’lam.  

 

*(DOSEN SASTRA MINANGKABAU FIB UNAND)

 

 


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com