Maloyo

Maloyo

Oleh: Bahren (Dosen Sastra Minangkabau FIB Unand )

Alah sapakan agaknyo, kajadian Si Man Iriak jo Piak Onjai gagal manonton pilem di Padang. Dek garah-garah mambar salam ka urang nan ado dalam studio pilem, akianyo pilem nan lah taniaik ka ditonton labih bitu sajo. Tapi, Si Man jo Supiak agaknyo lah rila samo kajiadian dan manjadi malu di badan diri inyo baduo.

Utuak ka palengah-lengah hari. Di hari akad ko pai lah Si man Iriak jo Supiak Onjai malala-lala pakai kareta onda mio. Onda mio ko, iyo samacam paragiah dari kakak jo uni Supiak Onjai wakatu inyo baraleh duo bulan nan lampau.

Kama wak ka pai ko da?

Naiak lah upiak dulu….

Kok ka kama lah awak beko..

Nan pantiang di gaih Onda Mio ko ka arah Buak Basuang tu a

Adih Nah da jawek Supiak…

Lah naiak lah Supiak Onjai…kateh Onda Mio tadi

Onda pun di starter.. dan mulai di gaih dek Si Man Iriak

Dari simpang basoka si Man malaju ka arah simpang jaguang, di Simpang jaguang inyo taruih ka cimparuah belok ka Jati taruih ka Bypass. Di simpang ujuang lampu merah by pass babelok dsi Man tadi ka arah Sungai Limau taruih ka Tiku.

Tibo di Tiku hari iyo lah siang pulo, baranti lah Si Man Iriak jo Supiak Onjai tadi di pasia Tiku untuak makan siang.  Di pasia Tiku ko sangaik tanamo gulia lauak karang nan baru jo masih segar-segar. Makan lah Si Man jo supiak, inggo batambuah tigo kali.

Salasai makan jo sumbayang luhua. Di gaih baliak onda mio ko ka arah Simpang Manggopoh taruih luruih ka Buak Basuang. Sampai di Buak Basuang, timbua pangana dek Si Man Jo Supiak, Wak taruih je ka Maninjau jo kelok ampek-ampek baa nyo Piak? Tanyo Si Man? Dek Upiak baa dek Uda se nyo da, lanjuik cek uda lanjuik upiak. Mako makin dipakuek lah dek supiak paguik tangan e ka Siman Iriak.

Ndak bara lamo sudah Buak Basuang, tibo lah inyo di Pakan Akad, dari Pakan Akad taruih ka Bayua, dari Bayua bakelok ka arah kelom mpek –ampek. Dek jauah bajalan banyak di caliak, Lamo duduak banyak di raso. Tapi nan sakali ko Supiak iyo mintak baranti ka Si Man Irian.

Baranti wak sabanta da, kato Supiak Onjai manjalang kelok duo satu nan tasabuik rancak jo indahnyo. Sabanta dih Piak kato si Man. Pas di kelok duo satu biko wak baranti sambia mangopi jo minum teh. Kopi diminum kacang matua dikubak dicampua jo kopi angek yo sabana sero rasoe  Piak kato Siman. Jadih nah da.. upiak tasarah dek Uda Sajo.

Sampai lah iyo di kelok duo satu, di situ inyo baranti di rest area nan cukuik mantap sacaro pamandangan, sarato makanan jo minumannyo nan sangaiklah sero jo lamak bana. Di pasan kopi sakarek, dimintak teh sagaleh. Kacang Matua jo Mi abuih indak lupo.

Sambia manunggu pasanan datang, batanyolah Si Man Iriak ka Supiak Onjai… baa kok mintak baranti Upiak tadi, rancana uda kito baranti di Ambun Pagi, tapi dek upiak lah mintak baranti mako uda baranti di siko, tapi di kelok duo satu ko rancak juo.

Itu lah dek uda.. Maloyo upiak da.

Biaso sajo tu nyo, maloyo dek jalan ba kek kelok piak.

Indak dek jalan ba kek kelok doh da.

Tu dek a Upiak maloyo…?

Itu lah dek uda…a maloyo se upiak da

Biasonyo  jalan nan ba kek kelok ko, kok sakik palo Upiak, Upiak bisa mancaliak sajo ka suok jo kida sambia mancaliak batang-batang nan ijau-ijau, kato urang kalau mancaliak nan ijau-ijau bisa mambuek pamandangan sajuak jo kumbali segar. Tapi nan sakali ko indak mangkuih doh da.

Baa tu Piak? Si Man, makin panasaran. Biko da… uda dek mancaliak luruih se ka muko, cubo lah uda caliak suok jo kida dek Uda. Li nampak juo dek uda nan ijau-ijau lai? Lah payah kini mancaliak nan ijau-ijau sajak urang ka Pamilu ko da. Nan banyak tampak kodak-kodak urang nan indak parnah tampak sabalun nyo se nah Da.

Ko kini di suok kida jalan banyak bana Pas Poto nampak dek Upiak. Indak ado batang nan tacelak nampak dek e doh da. Asa tacelak di situ pas poto e talatak. Sahinggo baruak jo tupai sajo payak mamanjek upiak raso da. Dek gara-gara ruangan tampek inyo ka mamanjek lah panuah dek pas poto nan ukurannyo indak tigo kali ampek atau ampek kali anam lai da. Tapi lah sagadag layar tancap. Bahkan ado nan sagadang layar pilem di bioskop tampek wak manonton patang kalamari da. Yo sabana gadang.

Upiak raso kalau buliah lapangan pacu kudo jo lapangan bola diagiah poto dek caleg-caleg tu da mungkin dialeh nyo lapangan bola jo lapangan pacu kudo tu mah da. Ciek lai da kok buliah landasan pacu Bandara Minangkabau tu di pasang jo potonyo dipasang e pulo tu da. Baa indak ka maloyo Upiak dek uda… beko sudah salasai pamilu ko sis nan ka mangamehan Alat Peraga Kampanye (APK)  nyo tu dek uda. Li ka di barasiahan dek caleg-celeg tu? Indak kan? Paliang nan turun tangan mambarasiahan urang KPU jo pol PP, batambah juo karajo apak KPU jo Pol PP. Tu ado lo nan AKP nyo tu nan takah urang-urang sawah nampak dek upiak da, ka untuak panakuik-nakuik buruang jo unggeh mungkin tu ndak da?

Iyo pulo yo piak, kadang kok di kana-kana bana, batua juo nan Upiak katoan tadi. Kok iyo pak caleg tu nio dipiliah dek urang tampaik daerah pamilihannyo, mustinyo sajak ampek taun nan lalu nyo lah mulai babuek untuka dapilnyo. Jadi pas ka pamilu ko inyo indak paralu bana mangaluakan banyak biaya untuak kampanye. Bahkan ado di babarapo tampaik, ado caleg nyo nan indak ado spanduk nyo doh piak tapi inyo memang dipiliah dek karajo nan alah dipabuek nyo salamo ko. Tapi kini baa juo li, ari tingga sapakan nan tasiso untuak kampanye li nyo piak. Kok maloyo lo upiak dek gara-gara tu uda sato pulo lah Maloyo….