JUICE DE EL EL

JUICE De…El…El

Oleh:  Pramono

(Ketua Jurusan Sastra Minangkabau FIB Unand)

Sarupo nan taralah, tiok ari akaik pagi Ongah jo Mak Itam biasonyo lah lari-lari pagi di sapanjang jalan kampuang Tobesak. Antaro balari-lari nantun liau baduoko maota-ota ringan sajo. Mulia dari ota parakaro anak gadih ketek e nan jolong masuak sikola mangengek sajo satiok kaditinggakan, sampai carito anak bujang nan lah mulai masuak sakola sempe. Pagi nan sakali ko, maraton nyo yo agak jauah alah sampai ka pulau dek gara-gara maota. Matoari makin lamo samakin tinggi pulo, ditambah pulo jo kaadaan kini memang iklim cuaca nn indak manantu. Jikok nyo paneh sabana garang mancucuak angek e sampai ka ubun-ubun. Jikok nyo dingin sampai pulo dingin e ka tulang sunsum. Cuaca iklim ekstim kato urang nan cadiak tau pandai.

Sampai di Pasa Pulau, mako baranti molah Ongah jo Mak Itam tadi di tampaik minum nan baru sajo di loncing kato rang kini, kalau dek Ongah saisuk baru bukak kadai caro rang awak e. “De Islan Café and Resto” alah agak moderen juo rang kampuang wak mah Ngah kato Mak Itam, lah ba baso Inggirih bagai lapau e kini. Padoan kato Si Amaik Tunggak nan punyo lapau ko sabane lapau e ko arati e Lapau kopi jo lontong  Pulau. Lah itu pulo mode nyo kini baa lai kato Si Amaik, kalau indak ado nan cando ka barat-baratan ko indak mampia urang doh, langau se tak inggok doh lanjuik Si Amaik ka Mak Itam. Padoan nan kito jua samo jo nan lain, Kopi jo lontong juo nyo Tam. Iyo bitu kini Maik, baa lai.

Indak bitu doh Maik, baok lah kamari karataih daftar makanan jo minun nan ang jua tu Maik, bia nak kami tenok a nan kalamak dimakan pagi ko. Bagageh lah Si Amaik Tunggak manta daftar makan jo minun nan ado. Bitu sampai di tangan Ongah lah disigi e ciek-ciek a kolah makan nan kalamak pagi ko, nan Mak Itam bitu pulo lah di tenok e lo dangan seksama. Mako jatuah lah pilihan ka lontoang pical gulai toco. Memang agak lain saketek makanan nan ditawarkan dek Si Amaik di kadaiannyo biasonyo urang mambuek lontong gulai toco atau cubadak pakai kuah pical saketek. Nan Si Amaik manawarkan menu lontog pical bagulai toco. Kikiro baa lah ka raso e tu, bialah Ongah jo Mak Itam sajo nan marasoan, awak indak usah lai.

Lah datang pulo pasanan duo piriang lontog pical gulai toco nan dipasan dek Ongah jo Mak Itam. Iko nan ganjia makanan e nampak dek den nyo Tam kato Ongah, iyo Ngah di Den itu pulo na  agak ganjia tampak judul e nyo Ngah. Kok Lontong Cubadak jo Gulai Paku lah ocok wak makan di Tobesak Ngah. Kok nan iko yo olun lai Ngah. Suai, kok ka makan Tong cubadak jo Paku jo wak nyo manga ka pulau bona wak Tam. Batul tu Ngah. Sasakali ka Pulau ko iyo nan gania-ganjia nan ka dimakan Ngah.

Indak bitu doh, pasan lah minun e sakali Tam, hari angek a nan kalomak di minun ko Tam. Caliak lah di daftar minun e Tam. Adik Ngah bok kamari daftar e tu Ngah. Di agiah lah dek Ongah daftar menu tadi ka Mak Itam. Dibaco e lambek-lambek dek Mak Itam sambia marungih-runguih surang. Kopi.. kok kopi, olah tiok pagi den dibuek an dek Rina, tak usah lah bosan kato Mak Itam dalam runguih nyo. Kok Teh manih jo teh es bitu pulo, olah bosan, karano tiok anak pulang jo pai sikola dibuek an teh manih jo teh  es ko, bararti nan iko indak. Baraliah pandang Mak Itam ka bagian Juice. A nan iko lah nan kalompok Juice ko.

Juice Mangga, Tomat, sirsak alah kodok den makan di Tobesak, arati e samo sajo raso e tu. Taruih di baco e ka bawak, Juice pokat, Juice Jeruk, Indak ka jauah bedo jo nan dibuek Si Rina di rumah ko doh raso e kato Mak Itam dalam ati. Sampai lah mato Mak Itam ka Juice nan nomor sambilan di daftar menu tu tatulis de el el. Ko nan nomor sambilan ko iyo olun parnah den minum e ko lai. Di tulih e lah dek Mak Itam di karataih pasanan e Juice De El El, karataih tadi di agiah an e ka Si Amaik, ko Maik minun den, capek dih untuak kini. Disema dek Si Amaik Tunggak karataih tadi, langsuange ka talase di balakang untuak mambuek an pasanan Mak Itam cako, tibo di bulakang agak taisak angok Si Amaik mancaliak pasanan Mak Itam, a kolah nan di pasan Mak Itam, Jucie de el el. Kok kabatanyo ka Mak Itam awak sagan pulo, indak ka ditanyo takuik pulo salah. Nan jaleh memang ado di nomor sambilan daftar minunan tu tulisan e de el el.

Tapi indak Si Amaik Tunggak namoe doh kalau indak bisa manyalasaikan maslah nan sapele takah juice de el el nantun. Jo santai sajo Si Amaik tadi mamasuak an sagalo saketek buak nan ado, mangga dimasuak an ne sakarek, limau manih bitu pulo di agiah e pulo sa kalupak, Tomaik dimasuak e sakarek, Kok pokaik di agiah e satangah. Pokok e lai ado juo buah nan di talase tu lai, dicampua e dek Si Amaik kadalam balender e. lah Cukuik dalam balender tu di puta balander tadi sajadi-jadi e sampai aluih lah buah-buahan tadi, di masuak an ka galeh di agiah susu cokolat saketek ka pamanih sajo di latak an silang paisok Juice tadi, di agiahan e ka Mak Itam. Nan Mak Itam bitu pulo bitu Juice ko diagiah langsuang di nonoh minunan tadi, sakali nonoh abih satangah dek Mak Itam, Agak taisak Mak Itam malulua e. A ko Maik, aia a nan baagiah ka den ko, bacakak-cakak raso e Maik. Iyo itu nan juice de el el tu Mak, Jus dek labiah-labiah nan Mak Itam mintak mako jadi e takah tu. Jadi del el el tu, dek labiah-labiah tu Maik. Iyo Mak. Mak itam nan baruntuang baru Mak, lah bulan nan ka duo wak bukak di siko baru mamak nan barani mintak Juice De El El tu, nan lain sasudah di tanyo e indak jadi mamintak doh Mak. E Amaik karapai, ang karajoan den Maik. Karapai… karapai kamari ang Maik, ganti minun den kini ko juo.