HOME LANGKAN GARAH

  • Jumat, 19 April 2019
Tan Patuih
Garah

Tan Patuih

Oleh: Bahren*

Alkisah, baramulo curito ka diurai, diurai molah bagulambek. Adopun curito nan ka diurai kini ko iyolah curito tantang kawan Si Man Iriak. Kawan bukan sumbarang kawan, kawan nan surangko lah bak cando jari tunjuak jo jari tangah. Rokok sajo nan jadi pambatehnyo. Bitu bana dakek nyo Si Man Iriak jo kawannyo tu. Nan kawan Si Man Iriak ko lah manjadi urang hebat kiniko di Padang. Inyo manjadi guru di unipersitas Andalas nan di Bukik Karamuntiang.

Kaba tantang kawannyo ko baru di dapek dek Si Man Iriak kutiko Supiak Onjai mambaleh pasan WhatsApp Si Man nan dua hari nan lalu. Dalam balasan pasan Si Man tu, Piak Onjai mangabari tantang kawan Si Man tu. A kolah balasan pasan dari Piak Onjai ka Si Man biko malah curitonyo.

Dear Da Man di Tanah Jawo

Balahan hati jo jantuang upiak nan sakarek lai. Pasan uda nan kalamari alah upiak baco. Sanang bana dalam hati sajuak dalam kiro-kiro mandanga uda lah mambukak lapak kiniko di pasa, walaupun masih lapak nan ketek. Sanang nan indak bukan ka palang da, kok kadisabuik gadang hatiko, raso ka pacah rumah awak mandanga barita dari uda. Ciek lai da, soal pitaruah uda tantang unggeh jo buruang uda lai upiak jago jo agiah makan. Asa uda tau sajo unggeh jo buruang tu da, upiak mandikan duo kali sapakan. Ba agiah sampo jo sabun harum bagai da. Pokok nyo da. Uda tanang sajo soal nan ciek tu. Jan cameh uda tantang itu.

O..iyo da. Ciek lai da. Pagi tadi Upiak basuo jo urang rumah, kawan uda yang biaso uda curitokan ka upiak, Tan Patuih tu mah da. Upiak basuo jalan jo bini nyo ka lapau si kecil da. Kaba dari bini nyo Tan Patuih tu kini lah manjadi urang hebat, nyo jadi guru di Unipersitas Andalas. Upiak takajuik mandanga namonyo Tan Patuih kato uda, mako batanyo lah Upiak langsuang ka bininyo. Akia kato bacurito lah bini nyo ka Upiak tantang asa mulo baa namonyo Tan Patuih.

Kato bini nyo Tan Patuih tu, dek karano inyo urang Jawa dan babini jo urang Minang Piaman. Di Piaman ko satiok minantu sangaik manjadi larang jo pantang dek mintuo maimbau minantu jo namonyo. Mako dibarilah gala minantu tadi. Babari gala Sutan. Urang Piaman ko dek biaso maimbau minantu ko jo gala dan manyingkek gala. Sutan biasonyo di singkek pulo manjadi Tan yang arati nyo Sutan.

Dek Upiak kepo ko da heh. Batanyo pulo lah upiak tantang patuih tu. Baa kok diimbau patuih padoan namo laki e kan indak patuih doh da. Namonyo pirtus. Bini nyo pun manarangkan ka Upiak. Patuih ko dek karano namo laki e ko agak payah dibaco jo disabuik dek dek lidah rang kampuangnyo. Paratamo sakali lai pirtus, sasudah tu barubah jadi pituih, lamo lambek pituih tadi manjadi patuih, sakalian manjadi olok-olok agak e da. Bitu bana bini e bacurito.

Dek uda indak amuah bacurito salamo ko, baa kok kawan uda tu banamo Tan Patuih, akirnyo Upiak dapek inpo ko dari ring satu kato rang kini da. Sahiah curito ko, indak hoax do da. Jadi kok ado kawan uda nan lain kabatanyo. Agak e itulah curito nan sabananyo baa bana kawan uda tu banamo Tan Patuih.

Oyo da… sabalun lupo Upiak da. Kok lai ado uda barasaki, dan bisa pulo mangirimkan zakaik agak saketek untuak urang di kampuang. Bia Upiak bagikan pulo hari ka rayo isuak da. Doa Upiak selalu yang terbaik untuak uda.

Inggan iko surek balasan dari Upiak dulu da. Dek unggeh jo buruang uda lah bakicau pulo mintak makan. Upiak agiah molah daulu makan jo minum unggeh jo buruang uda tu. Paluak ciek dari Upiak Fitri Hurjani 

 

* Dosen Jurusan Sastra Minangkabau FIB Unand


Wartawan : Bahren
Editor : Bahren

Tag :# Langkan # Garah # minang