HOME LANGKAN GARAH

  • Selasa, 22 Oktober 2019

Soto Wednesday

Garah Langkan
Garah Langkan

Soto Wednesday

Oleh: Pramono*

Pukua sambilan lewaik sangenek hape Tanbraind badariang babunyi, kiro e talepon dari Mak Itam, inti nyo bana manyuruah Tanbraind  untuak basiap-siap karano oto e lah dakek dari rumah Abah ko. Tapi, samantang pun baitu, Abah ko dijapuik e sasudah manjapuik Tek One. Mak Utiah urang nan paliang tarakir di japuik e dek Si Adri pagi nantun. Mak Utiah indak di japuik di rumah e, tapi dijapuik e di ujuang simpang rumah sajo.

Lah langkok sado nan ka dijapuik jo diangkuik mako maluncua lah oto manuju ka arah Pikumbuah. Oto malaju santai sajo walaupun amper kacepatan oto e acok barek ka suok. Tibo di pang Duku batanyo lah Tanbrain ka Adri, “Andri sahur pagi tadi?, lah sajauh ko oto bajalan alun juo baranti, lah taraso pulo paruik kami a?. Jo santai sajo Adri manjawek, iyo Pak di rumah Tek One tadi sahur, sambia manunggu Tek One bakameh diagiah e lah awak sarapan. Kok yo alun ado nan sarapan pagi nantun karano janji e barangkek pukua sangah lapan. Takuik kok talambek mako indak sarapan lah Tanbrain jo kangkawan e tadi dulu. Cari lah tampaik baranti lai Adri, kato Mak Itam.

Ampek puluah minik antaronyo, sasudah Mak Itam mangecek tadi, mako baranti lah oto Si adri dakek Ncakiambang. Tampek Mak Itam biaso sarapan kok ka pai arah ka Kiktinggi, Dangpanjang, atau Kasangka pasti Mak Itam singgah di lapaun tu. Sakadar kan Tupek lai tunjang atau  kan soto. Tapi nan sakali ko Mak Itam jo kangkawan mamasan soto. Soto di Ncakiambang ko indak soto ayam bukan pulo soto dagiang. Tapi soto rabu, soto nan dicampua jo paru-paru bagoreang. Mako dipasan lah dek Tanbraind jo Mak Itam soto ko limo priang.

Sasudah soto bapasan, indak lamo antaro e nan dipasan pun tibo makan lah Mak Itam jo kangkawan sambia maota-oto santai. Di subalah arah ka lauiak Mak Itam jo Tanbraind makan soto. Nampak lah surang bule sarato supir jo kawan e nan mamasan soto pulo. Sambia sasakali bule ko bakato ”delicious soto, this fries meat is crispy”. Supir nan sakaligus manjadi pamandu bule tadi agak e mambantah. No...No…it’s no fries meat. It’s Rabu..You know Rabu?, What is Rabu? Tanyo bule tadi ka supir e. Supir ko mulai binguang rabu atau paru-paru ko a baso Inggirih e. tapi nan namoe  urang awak jo pede sajo wee manjawek rabu. This is Soto Rabu. Rabu is the day after Selasa. Selasa? Yes Selasa. Rabu is Wednesday. Ooo soto Wednesday is Soto Rabu. Yes… yes… Soto Wednesday.

Dek ulah mancaliak supir nan talampau picayo diri sarato mandangan e babaso Inggirih tadi, tasambua lah galak Mak Itam jo Tanbrain, sarato Ma Utiah jo Si Adri. Soto Wednesday. Iyo pulo.. santiang bana supir tu yo pak, indak tantu dek e baso Inggirih rabu atau paru ko di buek e sajo baso Inggirih hari rabo, mako jadi lah soto rabu ko manjadi soto Wednesday, ciloteh Si Adri. Ado pulo bahan ambo kok sempat mambaok bule bisuak pak, kok batanyo e, a namo makanan ko kan tantu pulo dek ambo a nan ka ambo jawek. Soto Wednesday   

         

*Ketua Jurusan Sastra Minangkabau FIB Unand


Wartawan : Pramono
Editor : bahren

Tag :# Langkan # Garah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com