HOME LANGKAN GARAH

  • Selasa, 23 April 2019

Kuik Kon

Garah
Garah

Kuik Kon

Oleh: Bahren*

Dek urang lah heboh-heboh masalah sia nan kajadi persiden, sasudah pamilihan umum tanggal 17 April 2019 kapatang ko nan si Man Iriak pun indak pulo bisa lapeh dari masalah nyo salamo di lapak barunyo. Di sangko kalau lah manye-o lapak lah indak ado lai masalah nan katimbua, kiro e labiah kurang samo je masalah nyo jo bajojo di terminal. Di terminal masalah nyo kalau ndak di kaja pol PP paliang basiarak jo pareman. Tapi sajak balapak ko masalah lain timbua, ado uang retribusi lah namo e, ado pitih pasia lah namonyo, ado pulo nan uang lisrik jo aia bagai. Tambah banyak lah masalah nan di adok-i dek Si Man Iriak sasudah bukak lapak tu. Tapi Si Man, manjalani nyo tatek jo senyum dan galak sajo. Dalam hati si Man taruih sajo yakin nan razaki ko sado nan lah tamakan kalau alun, aratinyo alun pasti manjadi razaki si Man di hari tu.

Babaliak baliak curitonyo ka soal pamilihan persiden tadi. Lah di caliak radio dek Si Man, di bukak jo dibaliak-baliak e tepi. Di danga kan koran nan urang sibuk sajo bacurito soal si nan manang, sia nan kajadi persiden. Sia nan kalah, bara suaro samantaro. Padoan kok dikana-kana bana dek Si Man. Kok ka manang bana paja tu. Kok kalah bana calon Si Man nan inyo ka tatap sajo manjadi panggaleh jo panjojo di pasa nyo. Indak ka mungkin bagai si Man diangkek jadi mentri atau manjadi kapalo di BUMN. Mako nyo Si Man ko indak paduli bana jo masalah tu.

Tapi ado ciek nan jadi paratian dek si Man, kutiko urang sibuk jo masalah kuik kon. Etong capek kato rang kini. Kecek si A calon e nan ka jadi, kato Si B calon e pulo nan ka duduak. Sampai-sampai ado pulo di tonton e dek Si Man di tepi iklannyo. Iklan urang sadang bapole makan di restoran. Kutiko di tanyo dek nan laki-laki bara kanai makan jo minum e ka sameja-annyo. Capek sajo pelayan e manjawek duo puluah limo da, bitu kacapek e maetong. Tapi a nan tajadi kutiko nan laki-laki tadi pai ka kasir. Sasudah di etong e pakai kakulator e. kasir tu manjawek total e saratuih tujuah puluah ribu labiah. Takajuik lah nan laki-laki tadi. Satangah berang e bakato tadi kacek palayan kanai duo limo. Kini kok saratuih tujuah puluah. Jo santai kasir e manjawek, palayan e tu kuik kon pak. Nan iko ril kon.   

Mancaliak kajadian tu, tapikia lah dek si Man. Urang nan bacakak ko harusnyo pai lah agak sakali makan sate ka simpang tasiun kuretapi di Tabiang Padang. Di Simpang Tabiang tu ado kadai sate nan kasado alah anak buah sampai induak samang e pasiah bana jo kuik kon ko. Palayan sate tu bisa maetong bara kanai wak makan sate, walapun inyo ndak pakai kakulator. Cukuik jo kuik kon sajo dalam wakatu ituangan datiak langsuang kalua bon makan wak tu. Ado na kanai ampek puluah, ado nan kanai tujuah baleh ribu. Sasuai jo nan di makan. Etoangan nyo labiah kurang takah ko limo..limo sapuluah, sapuluah.. ampek…ampek baleh. Ampek baleh duo.. duo lapan. Mako tabayia lah wak duo lapan. Tantu urang batanyo baa kok duo lapan. Iko lah kuik kon nan sabananyo. Kok nak tau baa kok jadi duo lapan tapaso batanyo lah ka Si Man awak ancak nyo.

 

*Dosen Sastra Minangkabau FIB Unand


Wartawan : Bahren
Editor : Bahren

Tag :# Langkan # Garah # Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com