HOME LANGKAN GARAH

  • Kamis, 2 Mei 2019
TANAH
Garah

Tanah

Oleh: Bahren*

 

Pagi-pagi bana Si Man Iriak lah barangkek pai ka pasa tampek e biaso bajojo. Sampai di pasa lah di bukak e lapak, di sapu, bia nak barasiah lapak ko. Di tata galeh. Ma nan patuik di gantuang lah di gantuang e dek Si Man. Ma nan patuik disusun jo di kaka lah di susun jo di kaka e pulo. Pokok e lah rancak lapak e tu kini. Lah sanang hati mancaliak e. Karano lapak lah barasiah, galeh jo jaga lah tasusun rapi sarato segeh, bakato lah Si Man dalam ati, lah patuik paruik ko di isi mah, karano lah ado karajo nan ba mupaaik nan dikarajoan pagi ko. Pai lah Si Man ka lapau Bang Jaka. Bang Jaka ko urang Batawi asli, tapi dek karano lah lamo pulo ba kangkawan jo urang Minang nan manggaleh di pasa tu lah pandai pulo Bang Jaka ko bahaso Minang senek-senek walaupun sakarek baluik sakarek ula bahaso Minang e. Tapi nan Bang Jaka ko, asa tau nyo urang awak nan babalanjo nyo pakai bahaso Minang.

Sampai lah Si Man di lapau Bang Jaka tadi. Disapo e langsuang dek Bang Jaka, e uda Man, apo minum uda koh? Kato si Jaka. Kopi sakarek soto batawi sa cambuang lah Jek, jawek Si Man. Tunggu sabanta yo da. Kato si Jaka tadi. Indak doh lamo sasudah tu tibo lah kopi jo soto nan di pasan Si Man tadi. Diiruik kopi sa iruik di suok soto sa suoak, sambia maengong suok jo kida kok lai ado kangkawan nan lain makan di tampek si Jek ko.

Indak doh lamo sasudah tu, datang lah Gindo Apuak bajalan bagulambek, karano kok bajalan kancang indak lai takao dek inyo, badan ko bana nan lah sagadang dorom baa ka capek malangkah, lah barek kasado e. di balakang Gindo tampak pulo si Muih lah balari-lari kaciak mangaja Gindo. Mako makan lah basasamo wee di lapau Bag Jek.

Dek lah bakumpua ka sadoe, ota ko makin manjadi-jadi. Mulai dari pamilu, sampai ka barcelona manang. Mancester pulang kampuang, pokok e Si Man, Gindo jo Si muih lah manjadi pangamat jo komentator serba tau nan sapagi tu. Sampai lah curito ko ka soal tanah. Dek lai barasaki salamo manggaleh, tacito-cito lah dek Si Man ka mambali tanah untuak ciek parumahan. Di tanyo lah ka Gindo jo Si Muih soal tanah tu. Dek urang nan baduo ko lah labiah dulu ba rumah jo batanah di Jakata tu.

Dek mancaliak Si Man sarius bana maota, datang lah niaak Gindo nak mampa ulahan si Man, yo ka mancarai tanah Ang Man? Iyo Puak, kato Si Man, lai ado nan murah tu? Lai… ado bana kini nan murah tu mah Man. Sabalana e ko mah Puak! Si Man Makin panasaran. Iyo….iyo sabana e mah Man. Lai ndak maha Puak?. Indak, harago tajangkau. Dakek jo Taman Mini. Mandanga Taman Mini, Si Man samakin serius batanyo ka Gindo Apuak. Bara harago e puak? Limo baleh ribu nyo Man? Mandanga limo baleh ribu langsuang amba pusek si Man. Karano limo labeh ribu tu dek rang panggaleh samo jo limo baleh juta. Dalam pangaja Si Man kok limo baleh juta sameter sataruih meter lah bara lo pitih e tu banyak sangaik mah, kato e dalam ati sajo.

Maha bana mah Puak, limo baleh ribu. Indak takao di Den tu doh puak. Murah tu Mah Man. Kama ka ang cari tanah Limo baleh ribu di Jakata ko, yo di sakitaran Taman Mini tu ado nyo Man. Ambiak lah tu. Kok den ambiak 100 meter  sajo lah bara pitih e dek ang tu Puak, lah tangah duo miliar pitih e tu mah. Kama ka den cari pitih sa anjek tu. Den gadai an tanah di kampuang lun cukuik tih den lai doh Puak. Nan lain je lah ang suruah mambiak tanah tu. Manga ang ambiak 100 meter, senek je lah ambiak. Ambiak je agak sakaruang kan ndak maha ang mambaia tu doh. Karano tanah di situ bali e indak ba meter doh Man, bakaruang. Limo baleh ribu sakaruang. Eee karapai… den sangko ko iyo tadi tu, lah sumangaik lo den mandanga oceh ang. Kiro e tanah ka untuak mananam bungo ang katoan ka den. Salah den, tadi tu? Ang katoan ang ka mancari tanah, tu den katoan ado urang di dakek Taman Mini nan manjua tanah. Sia nan karapai kini ko???

 

*Dosen Jurusan Sastra Minangkabau FIB Unand  

       

  

 


Wartawan : Bahren
Editor : Bahren

Tag :# Langkan # Garah # Minang