Radio Lutuik Versus PVC19N

Radio Lutuik versus PVC19N

Oleh TE Radjo Boedjang

Di lapau, sambie maota minum kopi. Ota baruok-ruok. Ka ilie, ka mudiek. 

Nan maota saraso jadi juaro. Nan mandanga angguak-angguak balam. Nan ari tambah malam juo.

Dari sakian kaba nan diotakan, biasonyo ado nan pamuncak. Sarupo lomba lari, ado ciek nan juaro. Ado ciek isu nan malenggok marabuik talingo urang salapau. 

Ukurannyo bukan batue-salah kaba. Tapi hasil dominasi dari muluik bijak si tukang kaba. Nan langkok jo garak tangan jo suaro lantang. Sambie maangkek sabalah lutuik di ateh bangku, inyo basipongang maruok kaba. Mangkok banamo radio lutuik!

Di ruang publik nan sangek tabukak dan bebas co kini ko, "radio lutuik" sarupo dapek jalan untuak bakicau ka salaweh alam. Dunia daring mambukak paluang radio lutuik bakambang biak. 

Apolai kutiko musim korona sarupo kini, radio lutuik maoyak-oyak kaba. Hinggo urang Sumbar pun banyak nan picayo korona ko hanyo konspirasi sajo; karajo urang untuak mangacau ekonomi dunia. 

Padohal, di laman covid19.go.id, hanyo ampek daerah di Indonesia yang alum kanai korona lai. Sarupo ditulih Kompas.com, hinggo Selasa (5/1/2021), ado 510 kabupaten/kota di 34 provinsi yang terdampak Covid-19. Hanyo ampek kabupaten/kota yang alum ado kasus Covid-19. Yakni Dogiyai, Intan Jaya, dan Puncak di Papua; serta Pegunungan Arfak di Papua Barat.

Salain itu, ado sabaleh daerah yang lah kanai, tapi kini lah lapeh dari korona. Yakni Nias, Nias Selatan, dan Nias Barat di Sumatera Utara; serta Pulau Taliabu di Maluku Utara. Sarato Merauke, Puncak Jaya, Yahukimo, Tolikara, Waropen, Mamberamo Raya, dan Yalimo di Papua.

Nah, nan iko bukan radio lutuik. Tapi kaba sahieh. Bisa dipatangguangjawek an. 

Namun, co apo se lah ka mambana kan. Radio lutuik acok mangalahan sumber-sumber resmi. Walau tiok hari diposting info anti-hoaks, namun nan lah picayo ka radio lutuik, justru info resmi ko pulo nan dikecek an kaba duto!

Sarupo itu pulo nan tajadi kini. Sungguahpun Menkes Budi Gunadi mangecek an Program Vaksinasi Covid-19 Nasional (PVC19N) kadimulai tanggal 13 Januari nan ka tibo--kini sadang manunggu izin pakai darurat (Emergency Use Authorization/EUA) dari Badan Pengawas Obat dan Makanan (BPOM)--tapi komen-komen urang di daring atau luring masih banyak nan takuik disuntik.

Padohal kini lah 1,2 juta dosis vaksin Covid-19 dikirim ka 34 provinsi di seluruh Indonesia. Vaksin ko dikirim batahap, mulai 3 Januari lalu, dan ditargetkan salasai pada 7 Januari 2021.

Dan Presiden Jokowi lah mangecek an kau pamarentah lah mamasan (firm order) sabanyak 329,5 juta dosis vaksin Covid-19 untuak palaksanaan PVC19N.

Jokowi mintak PVC19N salasai sataun. Kecek Menkes Budi vaksinasi akan balansuang salamo 15 bulan untuk 181 juta rakyat (70 persen dari jumlah penduduk Indonesia). Dan mulai 13 Januari hinggo April, PVC19N Tahap I diutamoan untuak 1,3 juta tanago kesehatan (nakes).

Lalu, Tahap II (masih dalam bulan Januari-April 2021) divaksinasi pulo 195 ribu urang nan tiok ari karajonyo memang barado di tampek-tampek rami (polisi, tantara, Pol PP, tokoh masyarakat dan tokoh agamo. Tamasuak urang-urang nan baumue di ateh 60 taun.

Sudah tu di Tahap III yang dimulai April 2021-Maret 2022, divaksinasi pulo masyarakat nan rentan dari aspek geospasial, sosial, dan ekonomi. Dan Tahap IV (juo diadoan April 2021-Maret 2022) divaksinasi masyarakat jo pelaku perekonomian lainnyo, mamakai pendekatan kluster sasuai jo ketersediaan vaksin.

Sasuai rancana nan disabuik di ateh, memang angkek tangan wak ka pamarentah. Salut wak ka Presiden Jokowi dan jajaran pamarentah.

Namun nan manyakik, sabagian urang nan tapangaruah radio lutuik. Urang-urang tu lah mangecek tak amuah divaksin. Sudahlah tak amuah, urang-urang itu pun manyebar carito-carito yang mampatakuik i urang banyak.

Dalam kalompok urang-urang tu, dak saketek pulo nan cadiek candokio. Antah dek tapangaruah radio lutuik, atau inyo tu bana nan radio lutuik? Antahlah.