HOME LANGKAN TINGKOK

  • Jumat, 22 Maret 2019

Nagari Ata

TINGKOK
TINGKOK

Nagari ATA

di Luhak Tanah Data

 

 

Anggang lalu Ata lah Jatuah

Anak Rajo nan ditimponyo

Usah Karajo dek disuruah

Kakok Sajo lah sugiro

            Lah malam ari di Ata

            Karajo tak juo kunjuang sudah

            Elok dikaji tantang asa

            Kok ka lai manjadi surah

 

 

Kiro-kiro tanggal 20 Mei 2007 nan lampau, bacuritolah Darman Datuak Khatib Rajo di Tarakat VIII kabakeh Zuriati panaliti dari Unand Padang.  Adopun kaba nan liau curitokan ko adolah tantang nagari nan banamo Ata. Dalam kaba nan didanga manga nagari banamo Ata, adolah pado maso daulu kutiko niniakmoyang sampai di situ, nampak lah dek liau niniak nantun sabatang kayu nan sangaik gadangnyo tagaletak sajo di tangah jalan.

Indak ado surag nan tau, apo kolah namo kayu tu dan sia malah urang nan punyo. Surang di antaro niniak nantun, bakato sambia manyuruah ka nan lain “ Anta malah kayu tu ka ete”, sambia manuntujuak ka kayu nan tasirampang tadi. Dek lamo kalamoan habih hari baganti maso, mako kayu nan di Anta tadi dibari namo jo kayu Ata nan barasa dari kato Anta.

Adok ka pado kayu ata, kayu nan rancak kuliknyo sarato kuniang buahnyo, sangaik di suko dek buruang Annggang, mako sampai kini nangko kito acok mandanga pituah urang nan gaek-gaek Anggang lau Ata lah Jatuah, itulah garan mungkin asa nyo papatah nan kito danga inggo kini. Sampai kini tampai nan banyak ditumbuahi dek batang Ata tu banamo Nagari Ata. Baitu bana lah curitonyo nan disampaikan dek inyiak Darman Datuak Khatib Rajo.

Carito nan indak dibuek-buek, bukan pulo dikarang-karang, curtio ko ambo dapek dari kwarih nan bajawek pusako nan batolong dari niniak makak sarato pangulu nan ado di nagari ko, baitu bana kato Datuak Khatib Rajo.

Samantaro itu, ditampaik kayu nan tasirampang tadi nan tak tau namo jo nan bapunyo mako dibari namo tampik nantun jo nami Kayu Tak Banamo. Dek panduduak samakin rami, urang nan makin banyak juo. Lapan urang datuak mambuek pamukiman baru untuak ka tampek tingga jo batani, dibari namo lah tampai tu Taratak Lapan.

  Ado duo baleh niniak nan lain, mambukak parak jo manaruko, mako hasia tarukoan nan lah dibukak dek niniak tu dibari namo Taratak Duo Baleh. Limbak nan dari pado itu lareh nan mamanjang dari ilia ka mudiak, salamo manaruko alah pulo manjadi rami, mako dibari namo larek nantun, jo namo Lareh Nan Panjang. Sampai kapado jaman ulando, Lareh nan panjang tu dibari surang pamimpin dibari gala tuanku inggo kini tasabuik juo Tuanku Lareh Nan Panjang.

Jikok ditanyo tantangan suku, adopun suko niniak kito nan paratamo datang ka Ata adolah dari Gunuang Marapi tapeknyo Pariangan. Suku nan datang babagai-bagai ado Patopang jo Payobada, Ado Malayu dan Caniago. Itulah ampek suku Gadang nan ado di ATA inggo kini.

Baitu malah curito nan diraimo dek Zuriati kutiko itu, jikok ado curito nan bana, sungguah pun bana tu datang dari Allah. Jikok ado kato nan salah, itulah sipaik manusia jo kato maaf sajo mohon dek dunsanak.


Wartawan : Bahren
Editor : T E

Tag :TingkokNagari #AsausueNamoNagari #Minangkabau

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com