Mahondoh Di Galuh, Kabau Sirah Manapiak Jajak Di Puncak Klasemen

Spaso tatagun. Matonyo nan tajam manatap wasit. Jantuang rasonyo nak copot. Stadion Galuh nan tadi rami, tibo-tibo sunyi. Sadonyo manunggu. Wasit sadang baparok jo VAR. Sapakan nan mambaluik jaring tadi, antah sah antah tido.

Kailie sarantak galah. Kamudiek sarantak dayuang. Basamo mangko manjadi. Baitu kato Nil Maizar mananamkan sumangaik ka anak asuahnyo. Kabau Sirah datang bukan untuak mambuang tando. Inyo datang untuak manakluak-an Stadion Galuh. Sajak paluik babunyi, paja-paja Padang ko langsuang mahondoh. Cigin larinyo sarupo kudo baru lapeh kandang. PSGC Ciamis dipaso batahan di rumah surang.

Masuak minik kalimo baleh, drama dimuloi. Stefano Lilipaly malapeh umpan manih. Bola maluncue gagek ka kaki Ilija Spasojevi?. Sakali sentak, bola mambaluik jaring. Tapi wasit angkek tangan. Offside! Baitu sangko hakim garih. Suasana tibo-tibo dingin. Sarupo disiram ayie es. Spaso tagalenjek. Inyo yakin posisinyo aman. Untuang ado teknologi VAR. Wasit baparok agak lamo. Akhienyo, tangan wasit manunjuak titiak tangah. Gol! Sorak pemain Semen Padang FC basipongang mambalah langik Ciamis. Skor barubah jadi kosong-ciek.

Jan salah dunsanak. Tuan rumah bukan tido malawan. Laskar Singacala cubo mambaleh. Ezechiel Ndouassel jatuah di kotak penalti. Inyo basangkok jo bek tagok, Igor Cukovic. Urang Ciamis mamintak hadiah penalti. Wasit baliak mancaliek VAR. Jantuang pandukuang Kabau Sirah manggigie. Takut kok poin taserak. Tapi Allah masih mambari jalan. Wasit mamutuihan indak ado pelanggaran. Selamatlah gawang Semen Padang FC.

Alu tataruang patah tigo. Samuik tapijak indak mati. Baitu tanangnyo pertahanan nan disusun Igor Cukovic. Tiok sarangan lawan dipatahkan. Sampai masonyo, minik-minik akhie patandiangan, M. Rahmat baraksi. Paja ko lari kancang. Mangicuah lawan sinan-sini. Sarupo si ganjue lalai, lenggangnyo mamukau tapi mamatikan. Sapakan karehnyo indak tabanduang dek kiper Raufa. Jaring kambang untuak kaduo kalinyo.

Skor kosong-duo manjadi tando mati. Peluit panjang babunyi. Kabau Sirah pulang jo kapalo tagak. Tigo poin dibao pulang ka Bukik Karang Putieh. Kini, Semen Padang FC duduak gagah di puncak klasemen Grup A. Basasasak lawan nan lain dicaliek dari ateh. Sabana paten!

Lauak l lari di dalam ayie,
Karek ujuangnyo tanam di pamatang.
Lawan lari bakuliliang mambayie,
Kini puncak milik Semen Padang.