HOME LANGKAN KATO

  • Kamis, 23 September 2021
LABAH
Carito

Labah

Oleh: Bahren*

               

                Umpamo-umpamo nan dibuek dek inyiak moyang kito daulunyo sasuai bana jo palsapaj adaik alam takambang jadi guru. dari mamangan nantun dapek kito ambiak padoman nan jaleh, baso urang tuo-tuo kito daulunyo sangaik bapadoman ka alam. Sabuah tando-tando  nan dipagunokan niniak kito nan bapadoman kapado alam dapek kito caliak dari mamangan nan bakaitan jo Labah. Biko bana bunyi mamangan nan dapek kito  caliak:

               

Maha aragonyo Kain Batiak

Maha nan indak dapek di bali

Bungo kambang jiko dipatiak

Labah sakawan manjagoi

 

Mamangan adaik di ateh mampacaliakkan kapado kito basamo, baso Labah jo bungo iyolah duo simbol nan dipakai dek urang tuo kito sabagai umpamo untuak anak gadih jo anak bujang. Aratinyo bana Jikok ado anak gadih nan jolong gadang, dalam mamangan tu diibaraikan jo kambang nan kadigaduah, bisa jadi dek urang nan datang dari lua. Mako basiap-siap lah labah sakawan, anak bujang, atau sanak sudaronyo nan laki-laki nan sakampuang atau pun saparuik (sakawan) akan siap-siaga manjago dunsanak padusinyo ko tadi. Baitu bana urang tuo kito mambari kieh kapado kito nan hiduik harikini, baso dunsanak padusi kito itu adolah barang nan maha, jiko maha nyo kadisabuik maha nan indak bisa dibali baitu mamangan dibarih kaduo mangatokannyo.

                Tapi, tantu ado tanyo nan manyentak di kapalo apokoh nan sarupo mamangan itu, di maso sakarang kini nangko masih koh lai tapakai di nagari kito, jikok dicaliak jo dipandangi saat sakarang kini nangko iyolah agak tarumik awak mangatokanno. Alah banyak pulo diantaro dunsanak padusi kito ko nan bak cando uwia-uwia mintak gatah, antak-antak I untuak digaduah sarato di rayu dek lawan jinih nyo.

                Jikok dimintak untuak bakato sacarao jujur, memang harus kito akui pulo baso kini apo nan manjadi tanyo di ateh tu dibabarapo daerah ado tajadi, umumyo bisa kito caliak didaerah-daerah nan lah banyak bacampua urangnyo. Babagai alasan pun muncul sabagai tando pambanaran dek mereka tu, alasan gaul lah, alasan baitu jaman e kini dan saderet alasan lain nan kadang mambuek kito mauruik dado.

                Ba’a dek kito kini lai, kok nan manjadi tanyo tadi itu, iyo alah pulo tajadi. A nan paralu kito pabuek, a nan raso nyo mandasak untuak dikarajokan. Kan itu nan paliang pantiang kini ko kito pikia kan, indak sajo manyalahkan nan lah tajadi tapi labiah dari itu, tantu solusi nan paralu. Kok manuruik pandangan ambo, kok mambari sipaik lah kanamonyo, ado eloknyo bagulambek kito mulai baliak, mambarikan palajaran tantang sipaik jo karakter nan sasungguahnyo ka anak kito mulai dari tingkek sikola TK inggo sikola manangh lah namonyo. Palajaran tantang etika, palajaran nan tang kieh sarao ereang jo gendeang atau paliang tidak tantang kato nan ampek, alah harus mulo kito pikia kan. Jiko itu lah nan tajadi mako mamangan nan lain nan mamuliakan anak gadih kito diranah minang nan bakaitan jo labah nan lain bisa jadi ujuik nyoto lah nyo kini. Baiko mamangan mamandangnyo

 

Abuaknyo Sarupu mayang taurai

Daguak Labah Bagantuang

Iduang bak cando dusun tungga

Baitu adaik manarangkannyo.

 

Semoga sajo, apo nan manjadi cito-cito jo harapan kito basamo manjadi kanyataan lah ahndaknyo. Mari kito basamo-samo mampalajari baliak mamangan adaik rang tuo-tuo kito daulu. Untuak bisa jadi padoman dalam kito mnjalani iduik di zaman nan indak manantu kini ko. Semogao.

               

*Dosen Sastra Minangkabau FIB Universitas Andalas


Wartawan : Bahren
Editor : bahren

Tag :# Langkan # curito #minang