HOME LANGKAN CARITO

  • Senin, 13 Mei 2019

JADI MENTRI

Carito
Carito

Jadi Mentri

Oleh: Bahren*

 

Tan Patuih kawan si Man Iriak kini lah jadi urang hebat. Sajak manjadi Guru di Bukik Karamuntiang Tan Patuih manjadi urang nan paliang sibuk kini ko, apolai Tan Patuih manjadi salah surang dari Guru-guru Mudo nan sangaik lantang manyuarokan parubahan jo transparansi di sakolanyo. Labiah-labiah kini ko urang sibuk mancalon manjadi kapalo sikola nan baru. Para calon palo sikola lah sibuk mancari dukuangn kian kamari. Walaupun Tan Patuih indak ado suaro di dalam rapek panantuan calon, tapi ba’a ka ba’a Tan Patuih patuik diajak sato dek para tim sukses calon palo sikola.

Tan Patuih pun indak jarang disuruah untuak indak talalu aktif. Di lain kasempatan Tan Patuih disuruah ijan maeboh juo, awak masih sikola. Di tampek nan lain Tan Patuih dianggap anak baru nan kagadang-gadangan, Tapi Tan Patuih cuek, indak bana jadi pangana dek Tan Patuih kecek jo kato nan bak kian. Sampai-sampai dek indak mamikia kan nan itu tadi, siang ko Tan Patuih takalok di biliak kantua rumah nyo.

Dalam Lalok nyo Tan Patuih bamimpi lamak. Labiah lamak dari kolah nan dibuek dek amak si Ojak (bini Tan Patuih). Di mimpi tu, Tan Patuih di suruah ka kantua pak persiden untuak manjadi pangganti salah surang mentri. Karano persiden ado rancana maurak kabinet untuak mangganti mentri. Tan Patuih dinilai jo ditiliak urang nan paliang cocok manduduki kurisi mentri tu. Ado pun kurisi mentri nan ka digantikan dek Tan Patuih iyolah mentri Riset jo Teknologi. Jo sagan dan agak malu-malu Tan Patuih tapaso manarimo jabatan itu.

Dek mandangan Tan Patuih diangkek jadi mentri dek persiden, mako heboh lah sikola Tan Patuih. Calon-calon palo sikola ko langsuang bagageh manamui Tan untuak sakedar mancaliak kan muko nan karuah. Baa ka indak, suaro Tan kini ko sangaik diparaluan dek calon palo sikola. Walaupun Tan Patuih surang, tapi suaronyo samo jo ampia saparo urang nan bisa  mamiliah di sikola Tan Patuih tu. Kawan-kawan Tan Patuih pun mulai jadi paratian calon.

Tim Sukses Pak Dora lah mulai manamui kangkawan Tan Patuih, lah mulai umbuak ambai dimainkan. Pak Noja, bitu pulo lah ado pulo nan mangklaim di kelas iko, bulek suaro ka liau. Si Dede nan paliang kaciak lah co itu pulo, lah manggaleseh-galeseh pulo ka kangkawan Tan Patuih ateh namo generasi mudo. Nan lain ado nan lansuang ka Tan Patuih bahkan ado pulo ka si Man Iriak jo Sudin Patai. Walapun urang nan baduo ko indak di Sikola Tan Patuih, tapi kato urang nan baduo ko manjadi kunci pas untuak masuak ka Tan Patuih. Indak pulo lupo urang tu datang ka amak si Ojak jo Si Piak Onjai bini Si Man Iriak. Karano masuak jalur amak-amak ko tabukti mangkuih wakatu pamilihan persiden kapatangko.

Dari sakian banyak calon palo sikola nan lah datang ka Tan Patuih, mako kasadoyo di tarimo dek Tan Patuih jo ati suko. Kasadonyo dianggap layak jo patuik sacaro undang-undang. Tapi ado babarapo pasan Tan Patuih ka para calon palo sikola ko. Partamo soal a nan alah dibuek, kaduo a nan kadibuek, nan katiko barasiah atau indak kato rang kini transparansi. Nan tarakir sasuai alua jo patuik. Ijan sampai ado pulo palo sikola ko hasil dari ma alua nan patuik di alua, atau di patuik-patuik dulu nan patuik di alua. Sasudah tu Tan Patuih bajanji ka mambuek kaputusan nan paliang adil untuak sikola ko dalam manantuan si nan ka manjadi palo sikola. Tan Patuih bajanji ka calon palo sikola untuak maagiah tau sia pilihannyo dalam duo hariko.

Sahari lah lewat, tibo lah maso manunggu ka sia pilihan tan patuih agaknyo dijatuahkan. Lah babarih lah calon-calon palo sikola tu di muko rumah Tan Patuih sajak sudah subuah. Ado nan salasai sahur langsuang barangkek ka rumah Tan Patuih. Ampia  tigo jam calon palo sikola ko manunggu arok-arok cameh. Sampai lah pukua sapuluah wakatu nyo Tan Patuih manyampaikan sia nan kadipiliah dek Tan Patuih. Tan Patuih lah tagak di podium untuak basiap-siap manyampaikan pilihannyo. Lah di bukak jo kato syukur ka Tuhan. Lah basalawaik pulo Tan Patuih ka Nabi, sampailah saaiknyo mambacokan namo nan ka di piliah. Pas ka manyabuik an namo pilihan ambo adolah…, tibo-tibo datang lah si Ojak dari lua langsuang maloncek ka Tan Patuih nan sadang lamak lalok tadi, Tan Patuih lansuang tagalenjek jo tatagak jo mangucap.

Jo agak berang tan Patuih diariak e si Ojak. Abak ang sadang lamak bamimpi ang malompek lo kabadan abak ang ko. Indak jadi abak manyabuik an sia calon nan ka abak sampaikan. Batal suaro abak ang manantukan calon palo sikola. Gagal abak jadi mentri. Pai lah ang ka sinan jak. Den simbek ang jo kaki beko. Sambia galak-galak surang si Ojak bakato. Makonyo Bak, sudah subuah tu jan langsuang lalok, biaso nyo abak mancangkua jo mancuci oto. Hari ko lalok. Lah mimpi abak jadi mentri.

 

*Dosen Prodi Sastra Minangkabau FIB Unand

 


Wartawan : Bahren
Editor : Bahren

Tag :# Langkan # curito #minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com