HOME LANGKAN KATO

  • Sabtu, 24 Juli 2021
Adie, Makan Sabalik
Adil dan keadilan (foto internet)

Adie, Makan Sabalik

Oleh TE Radjo Boedjang

Adonyo urang pidie, karano ado urang lain nan baarok, tapi tak bulieh. Tiok nan dimintaknyo tak ado nan dapek. Mako lakek lah gala pidie. Kikik!

Urang disabuik kikik adolah respon dari urang lain nan tak dapek pintak. Kok ado urang nan lapang alamnyo, apo nan diminta dek urang lain inyo bari, mako lakek lah gala darmawan. Elok ati. Dll.

Adokah urang nan mutlak darmawannyo? Adokah urang nan mutlak pulo kikiknyo?

Karano kaitan urang jo urang ko banyak talinyo, mako pasti tak ado urang nan darmawan saratuih parsen. 

Urang darmawan untuak surang urang, atau sakalompok urang, pasti ado surang jo baduo nan manilainyo idak darmawan. Urang darmawan pasti ado urang lain nan manilai kikik!

Baitu pulo sabalieknyo. Tak ado urang nan samparono kikik. Pasti ado surang jo baduo nan mancapnyo darmawan. 

Darmawan jo kikik hanyolah panilaian dari surang urang atau sakalompok urang. Padan sarato alat manilainyo samato hanyolah interest surang-surang. 

Lalu, kutiko peradaban bakambang. Padan jo alat ukue pun disapakati basamo. Kok lamak samo diraso. Tibo di mato idak dipiciangkan, tibo di paruik idak dikampihkan. 

Idak batumpak-tumpak makan api. Idak ado istilah sarami-rami alek, nan anak rajo lalu juo. Pokoknyo, padan jo alat ukue idak pandang bulu! Itu namonyo adie.

Adie bisa diaratian maukue sasuatu pado sasuatu sasuai jo padan dengan alat ukue nan lah disapakati.

Dalam fisika, maukue ko mambandiangkan besaran jo satuan. Untuak mambandiangkan ko, paralu alat ukue. Analog jo itu, kikik baru dikatokan kikik bilo lah diukue.

Harus ado alat ukue kikik. Paralu ado besaran kikik. Caro maukuenyo adolah mambandiangkan besaran (dalam hal iko adolah kikik) jo satuannyo (misalnyo ciek kikil, duo kikik, dst...).

Heyeiii... makin susah jadinyo mah. Maa ado alat ukue kikik? Samo halnyo, lum ado alat ukue cinto, banci, dll. 

Iyo bana, maukue sagalo sasuatu nan takaik jo raso, alangkah payahnyo. Tapi, anehnyo, satiok kito acok lancang mamakai raso maukue tiok ari. Kito lancang mancap urang dan sakalompok urang jo raso kito surang. Bahkan pemerintah pun tiok ari dicap dek rakyaik badarai ko sakalamak paruiknyo sajo!

Dak ado masalah kito maukue jo raso. Tapi, nan raso itu very-very important person nah. Sangaik personal bana. 

Makonyo, usah raso nan disampaikan. Usah maukue jo raso. Apolai takaik jo nan nyato, gawa jadie bilo pakai raso maukuenyo.

Tapi, caliek lah nan nyato--zahir, nan bisa diukue jo alat ukue nan nyato pulo. Alat ukue nan bayiek tarupo.

Kok maukue tensi, kan ado tensimeter. Jaleh baraa paneh kito. Baitu pulo maukue panjang, saidak-idaknyo pakai jari untuak manjangko. Baru dapek, panjang tu sajangko, duo jangko, sadapo, duo dapo, dst.

Nah, jikok kito lah maukue jo alat ukue dan ado padannyo, barulah adie kok tibo. Itu pulo nan manjadi dasar prinsip pangulu. Pakaian pangulu di Minangkabau adolah bakato bana, maukum adie. 

Adie dalam hal iko adolah manjalankan sasuatu sasuai parentah. Parentah maksudnyo adolah hukum nan lah dibuek. Ado tigo hukum nan paralu kito pahami (dulu lah ado tulisan ambo mambahas hukum nan tigo tu, bisa dicaliek di koran Khazanah nan tabik bulan-bulan nan lampau, atau cigok di rubrik Langkan, subrubrik Kato di portal Minangsatu.com), dan tagak hukum sasuai jo objek takaik. 

Babaliek ka pangka, sasuai judul tulisan iko, kini bisa kito definisikan "adie adolah manjalankan sasuatu sasuai parentah". Parentah itu mukasuiknyo hukum nan dipakai. 

Jadi, kato-kato maukum adie bamakna bahwa hukum lah dijalankan sasuai parentah. Ado parentah agamo (hukum agamo), parentah adaik dan parentah negara.

Sacaro hukum negara (UUD45, UU, PP, Permen, jo Perda) tiok warga negara samo rato kanainyo--equality before the law. Pejabat ataupun urang tani, wajik manjalankan protokol kesehatan (prokes). Wajik limo M. Mamakai masker, mancuci tangan, manjago jarak, maindari karumunan dan mangurangi bajalan (mobilitas) kok dak urgen bana.

Siapopun wajik patuah manjalankan prokes. Idak mancaliek bulu doh. Babulu dak babulu, rato kanai--wajik jalankan prokes. Itu baru adie. Adie tu makan sabalik...!


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #MakanSabalik