HOME LANGKAN KATO

  • Sabtu, 1 Mei 2021
Umpan Serak, Langkah Tingga
Langkah Tingga (ilustrasi.internet)

Umpan Serak, Langkah Tingga

Oleh TE Radjo Boedjang

Kok dak ado barado, dak ka tampuo basarang randah. Tak ado karajo nan dak batujuan. Tiok karajo ado motif. Tiok nan dikakok, tantu ado mukasuik jo tujuan.

Apopun karajo musti ado motif. Tamasuak urang manolong, pasti ado motif jo mukasuik. Kok urang ikhlas, motifnyo ridho Allah. Banyak pulo urang manolong karano basabab bakarano. Karano inyo dunsanak, karano sasuku, karano sakampuang, dan sagarobak sabek jo karano lainnyo. 

Baa pulo jo karajo politik? Iko kan alah jaleh mah. Bukan Kinari Kinari sajo, Kinari ka Bukik Tandang. Bukan kamari kamari sajo, gadang mukasuik kadijalang.

Kok ado urang bagi-bagi sembako, apolah kutiko dakek ka pileg jo pilkada, lah sakampuangnyo urang tau; iko ado udang di baliek batu mah. Lah jaleh urang nan sadang mancari suaro nah!

Sungguahpun sarupo itu, sembako tu abih juo. Urang banyak mamakai prinsip; dak ado doa panulak rasaki. Sabagian bapandapek; awak kan dak mamintak, tapi karano diagiah tantu ditarimo, dan dak ado pulo ijab kabue jua bali suaro doh kan?

Dan, tanyato kutiko suaro dietong, memang dak basuo jo jumlah paket sembako nan dibagi doh!

Kaberang? Jaan! Karano kutiko sembako dibagi, kan dak ado ijab kabue atau janji doh kan? Dak ado etong etongan nyo doh. Kecuali foto si anu di pambungkuih sembako sarato maajak supayo mamilieh yang di foto tu.

Ibarek mangayie, sembako tu kan umpan sajo. Kok manggatue kayie, dicotok dek ikan, alhamdulillah. 

Bagi-bagi sembako tu sarupo malapeh umpan serak. Diserak an se banyak-banyak. Samakin banyak umpan diserak, kemungkinan umpan dicotok banyak pulo.

Namonyo se umpan serak, manggatue jadih. Tak manggantue kabaa juo. Nan ikhtiar kan lah jalan. Kaputusan di Nan Kuaso.

Kok mujue takadie Tuhan, ikan mancotok joran dielo. Ikan binguang, talulue umpan serak. 

Di sinan lakek pituah; ati-ati jo muluik manih. Manih jan capek dilulue. Inok manuangan sabalun tamakan umpan.

Nanang saribu aka, pikie palito ati. Manguok dulu baru mangecek. Malantai sabalun luluih. Usah ondong ayie ondong dadak. Maloncek koncek, maloncek pulo garundang. 

Karano balam acok lupo jo jerek, sadangkan jerek tak pernah lupo jo balam. Umpan serak maminang garak. Umpan tamakan utang tibo. Alamek sansai badan diri.

Tak kan tampuo basarang randah. Ado rantiang nan ka mancucuak. Umpan serak maminang langkah tingga.

Namonyo tukang papeh, langkok garak jo garik dikajinyo. Tak mungkin umpan serak dilapeh di ayie gadang. Hanyo di lubuak pamanih laku.

Hanyo di lubuak umpan diserak an. Sungguah pun kaabih juo umpan dek ayie. Nan ikan salubuak tatek ka paniang-paniang lalek. Kok dak ka tarapuang tabao jalo! Di balango basoboknyo.

Kalaluannyo bana lah tu kini; tuah umpan maundang arok. Arok ka manose sasa tibo. Di sinan lah raso panyudahannyo.

Dek ikan nan bakatuban, manose nan bakajinak an, alam takambang jadi guru. Usah ka umpan serak, umpan nan bauntuak pun bisa dilengahan.

Baitu lah, kurenah jo umbuak umbai nan manjadi pakaian dek manose. Dak kamaa ka pai, kito dikabek jo kepentingan. Di sinan undang dibuek. Sumbang salah jadi padoman.

Tatkalo tampuo basarang randah. Ruponyo ado tabuan di ateh nyo. Urang manunggu langkah tingga. Baitu tingga langkah, di situ sepai tibo.

Sabalun baiek tarupo di nan rami, angguak anggak geleang amuah. Tak diiyo ditidokan. Galak manih bakalabiehan. Iyo apak sajo nan batuah, nan daolu tu onjak-onjak i se tu mah!

Apak itu pun sarupo si kuduang dapek cincin. Sagalo mole dionyok an. Sagalo sambah ditiboan. Rupoe nan banyak tu manunggu apak mabuak. 

Dek cinto dunie, langkah diejang sabalik ranah. Sarupo pandeka baru malangkah; daun manggarik nyo cuek juo. 

Lalu, kutiko umpan lah tamakan. Langkah pun lah banyak tingga, di sinan tampak atah jo bareh. Urang nan banyak mulai mancibie. Namo pun lakek saumue-umue, payah maubah mameloknyo.

Pulang maalum ka bakeh datuak.


Wartawan : TE Radjo Boedjang
Editor : sc.astra

Tag :#Minangkabau #BahasaMinangkabau #EsayMinangkabau #LangkahTingga