HOME LANGKAN CARITO


  • Sabtu, 4 Januari 2020
TUO TUNGKU
Carito

TUO TUNGKU

OLEH: BAHREN*

 

        Mak Datuak Lauik, Si Muih Jo Si Alan sarupo nan taralah kalau nak macari urang nan batigo ko iyolah di lapau Piak Enek. Lapau Nan latak e arah ka ilia kantua wali. Lapau Piak Enek iyolah tampek biasonyo Mak Datuak, Si Muih jo Si Alan duduak satiok pagi sambia makan lontoang, goreang pisang sarato mangopi jo minum teh manih angek. Pagi hari ko urang nan batigo ko alah pulo duduak di suduik lapau tampek e biaso maota-ota sarato bacurito tantangan iduik jp kahidupan nangko.

        Sayuik-sayuik tadanga dek Piak Enek, Mak Datuak Lauik ko bacurito tantang urang tuo. Antah apo kolah sabab jo karano nyo mako Mak Datuak bakisah tantang urang tuo ko ka Si Muih jo Si Alan. Nan jaleh tadanga dek Piak Enek ko, Mak Datuak mangecek parakaro Tup Tungku. Biko curito Mak Datuak ka Si Muih tantang Tuo Tungku nan tadanga Dek Piak Enek kutiko maanta lontong nan dimintak dek Si Alan.

        Parakaro tuo di kampuang kito dalam adaik Minangkabau ko Muih, dari surah jo curito nan Den dapek sarato danga dek Baliau Ungku Katik dari Batipuah. Baliau parnah mangatokan ado ampek jinih urang tuo nan partamo Tuo Pusako, kaduo Tuo umua, katigo Tuo Sanduak, ka ampek Tuo Tungku. A pulo mukasuik e tu Mak Datuak tolong lah surahkan baliak kabakeh kami ko Mak, bia nak kami sampaikan pulo ka anak kamanakan kami di kalak kamudian hari, manjadi tunjuak jo pangaja juo lah isuak andak e dek anak kamanakan tu Mak, bari jawek kami dek Mamak.    Jikok baitu kato kalian, bialah nak den surah ciek-ciek bia nak nyo manjadi pangajaran. Tapi samantang pun baitu nan untuak sakali kini kito mulai dari nan nomor ampek. Baa dek nomor ampek, karano nan jinih ko banyak batamu kodok basuo di saat sakarang kini nangko.

Baa bana tuo tungku tu, manuruik surah nan den dapek mako bisa den katokan bak iko. Sacaro umua urang ko bisa di katokan alah tuo dari nan lain, jikok kito caliak jo ibaraikkan ka tungku, nan tungku ciek ko alah banyak mancubo asam garam sagalo parsoalan nan ado dalam iduik jo kahidupannyo. Tapi samantang pun baitu, urang nan tuo tungku ko bisa di kecekkan acuah tarado apo sajo nan tadaji di sakitar nyo, nan tanyadi dalam korong jo kampuang nyo.

Caliak lah sipaik tungku, nak angek dek tapanggang dek api atau dingin dek di diruih jo ayia, nan tungku ko sarupo indak ado kajadian sajo. Inyo tatap sajo sabagai tungku. Kok di caliak ka urang tuo nan ado di dalam korong jo kampuang bisa kito katokan baso urang nan tuo tungku ko, hanyo tuo dari sagi umua tapi indak paduli jo apo sajo kajadian nan tajadi di korong jo kampuang nyo. Nan inyo urang nan tuo tungku ko sibuk sajo jo karajo nyo. Indak paduli jo kaadaan sarato jo lingkuangan. Baitu bana urang tuo nan jinih sarupo iko. Kok nyo masuak indak ganok, jikok kalua indak ganjia.  Untuak pagi ko, inggan iko dulu nan bisa den sampaikan, bisuak-bisuak kito ulang atau kito surah pulo tuo nan lain.

 

 *DOSEN SASTRA MINANGKABAU UNIVERSITAS ANDALAS


Wartawan : Bahren
Editor : bahren

Tag :# Langkan # curito #minang