TUO SENDOK

HOME LANGKAN CARITO


  • Senin, 6 Januari 2020
TUO SENDOK
Carito

TUO SENDOK

OLEH: BAHREN*

 

        Minggu pagi, Si Muih, Si Alan jo Mak Datuak Lauik lah santai di lapau Piak Enek. Sarupo nan taralah, baliau-baliau nan batigo ko lah duduak di suduik arah ka ilia lapau. Nan mamintak kopi lah dibuek an dek Piak Enek Kopi, nan nio teh sarok lah di anta pulo dekuda Supiak Enek. LOntong jo nasi goreang alah pulo diidangkan Piak Enek ka Si Muih, Si Alan jo Mak Datuak.

        Sambia makan, lontong jo nasi goreang takana pulo lah dek Si Alan nak batanyo parakaro tuo nan ampek minggu kalamari nan alah disurah dek Mak Datuak Lauik. Mako batanyo lah Si Alan ka Mak Datuak parakaro tuo-tuo nan lainnyo. Bari maaf ambo dek MAk Datuak, iyo agak tagamih-gamih ambo dek surah Mak Datuak tantang tuo tungku pakan kalamari. Tapi samantang pun baitu Mak, bari tarang pulo lah kami tantang tuo nan lain Mak Datuak. Tigo macam tuo lai nan alun Mak.

        Jikok bitu kato Ang Lan, ambek cah, den aliah duduak den sijauk. Pagi ko den nak bacarito tantang tuo sendok atau ado juo nan mangatokan tuo sanduak. Nan namonyo tuo sanduak atau tuo sendok ko. Sacaro umua inyo iyolah bangkeh, tuo dari nan lain. Tapi sacaro pangana iyo alun cukuik bana lai Lan. Antah dek sanduak jo sendok ko dek talatak di dapua atau di tampek sendok sajo mako urang nan masuak katagori tuo nan iko pangana singkek.

Tapi samantang pun baitu, tuo sendokko nan paliang indak katuju sipaik jo kerenah nyo Lan, Muih. Sipaik atau karajo sendok. Sendok ko kok disabuik karajo nyo iyo mangacau sajo satiok ari, asa lah tibo sendok dalam geleh kopi atau the langsuang sajo mangacau karajo nyo. Bitu pulo sanduak asa lah masuak e ka gulai indak ado santan nan indak di kacaua e doh Lan.

Aratinyo bana, nan tuo sendok tu, kalau lah datang di kampuang tu, mako kacau lah keadaan nan alah elok salamo ko ado dalam kampuang. Indak ado masalah dibuek e masalah, pokok e karajo sendok bana nan balaku dalam diri nan tuo sendok ko. Mangacau sajo karajo nyo. Ambek cah Mak Datuak, tapi kalau nan dikacau tu gulo jo kopi atau teh jo gulu kan manjadi lamak e tu Mak? Kok indak dikacau dima pulo kopi kalamak, bitu juo teh jo gulai dek karano sendok atau sanduak ko lah bacampua barang nan babeda sarato santan indak pacah.

Bana, itu jikok ayun sarato kilik sendok e lai  batua, tapi kok kacau sarato ayun sendok e indak bana, mako baserak-serak lah kopi ka tadah, santan nan patuik e manjadi kuah nan lamak manjadi pacah dek gara-gara indak pandai maaduak. Samba atau gulai lai masak juo tapi tak lamak. Mako nyo urang nan tuo sendok ko labiah ka mangacau apo nan alah elok salamo ko sajo karajo nyo. Biasonyo kalau batamu jo urang nan tuo sendok ko banyak di antaro nyo tajadi, inyo datang urang pai, urang maiyo batido inyo tak diajak karan tau ka mangacau sajo. Bitu bana lah agaknyo tuo sendok

          

*DOSEN SASTRA MINANGKABAU UNIVERSITAS ANDALAS

 


Wartawan : Bahren
Editor : bahren

Tag :# Langkan # curito #minang  

SASAMPIK-SAMPIK BALAI ANAK RAJO LALU JUO
MADA
Maminteh ka ulu, mangaja ka balakang
Maminteh ka ulu, mangaja ka balakang
PITUAH KUCIANG II
PITUAH KUCIANG I
LABUAH SAMPIK
PADUSI ALANG-ALANG
TUO ADAIK