Tampek Bagantuang Nan Lah Putuih

Tampek Bagantuang Nan Lah Putuih

Tampek Balinduang Nan Lah Habih

Oleh: PERLI NOMANZA*

Minangkabau kayo dek kato sindia-manyindia nan di pakai dek urang pado dahulunyo. Apokoh tu pituah, mamangan, atau papatah patitih. Nan di gunoan untuak manyampaian nasihat sarato untuak maajaan anak jo kamanakan.Surupo nan kini kito caliak, urang minangkabau ko banyak juo nan cadiak dek kato-kato lisannyo.

Mamangan jo papatah patitiah ko lah nan manjadi harato warisan jak maso ka maso dek urang dahulunyo.Apo itu nyo niniak mamak, alim ulama atau cadiak pandai sakalian. Tapi kalau di liek pado maso kini, mamangan ko sangek jarang di pakai dek urang Minangkabau. Dapek pulo dikatoan alah puda. Apo lai untuak anak-anak mudo kini ko. Alah banyak lo kato-kato baru nan lahia untuak dipakai dalam mangecek. Sarupo kato kepo, kuy, dan ado pulo bahaso indonesia minang (indomi).

Pado maso kini, mamangan atau pituah adat di Minang ko lah banyak nan di tinggan dek anak-anak nan lah tau jo moderen ko. Katiko pituah adat tu lah ilang di tangah anak-anak kini, samo lah artinyo anak tu lah hilang nilai adat nagari nyo surang. Sabanyo, pangaruah nan masuak ka Minang kini ko, patuik disariang dek urang-urang tuo nan ado. Supayo, adat ko jan sampai lakang dek paneh, lapuak dek hujan.

Kalau dibawoan ka pituah Minang, nan tajadi pado Pituah adat Minang kini ko lah masuk ka pituah “Tampek Bagantuang Nan Lah Putuih, Tampek Balinduang Nan Lah Habih”. Artinyo sapinte lalu, anak Minang kini lah indak tau samo tali gantungan hiduik nan sabananyo. Karano nilei nilei adat nan ado tu, disangkonyo lah “tatingga kareta”. Jadi indak patuik untuak dipakai jo ditiru.

Pituah “Tampek Bagantuang Nan Lah Putuih, Tampek Balinduang Nan Lah Habih”, menjadi bahaso umpamo dek urang Minang. Katiko anak yatim piatu iduik di tanah Minang ko, samo lah makasuidnyo jo pituah nan di ateh tu. Salain tu, pituah ko acok pulo dipakai di lagu Minang. Sasuai lagu tu, Pituah ko samo lah jo manyampaian ibonyo hati katiko urang Minang di lando bancano.

Katiko di aratian ciek-ciek, Tampek Bagantuang Nan Lah Putuih tu bisa baarati hilangnyo prinsip iduik urang Minang. Bisa pulo, hilangnyo tampek batenggang. Karano Makasuik bagantuang dalam kato tu, bisa bararti sandaran urang Minang, patolongan urang lain, jo lain sabagainyo. Makasuaik kato lah putuih di mamangan tu bisa di artian indak ado lai. Hiduik dulunyo ado nan manyanangkan hati, kini sabaliaknyo nan tajadi.

Tampek Balinduang Nan Lah Habih dapek pulo diaratian, urang Minang ko indak punyo rumah. Tapi, kalau dalam artian balinduang jak di pangaruah buruak nan banyak pado maso kini. Bararti tampek Balinduang tu iolah prinsip iduik, bisa pulo ilmu atau padoman nan elok untuak malanjuikan hiduik nan ko.

Kalau pituah Minang nan ado ko lakek di hati anak mudonyo. Tujuan marantau untuak mamerdekakan nagari bisa langsuang tajadi. Artinyo, dalam marantau tu, ilmu pituah ko lah nan jadi inti sabananyo. Sakali pituah ko disampaian, lah sakali pulo urang Minang barumpamo ateh apo nan tajadi. Jadi pituah “Tampek Bagantuang Nan Lah Putuih, Tampek Balinduang Nan Lah Habih” samo lah parumpamoan urang Minang, ateh apo nan inyo rasoan. Karano, pituah ko dipakai katiko nan tajadi tu banyak barisi suasano “ibo”(sedih).

*Mahasiswa Sastra Minangkabau FIB Unand