Sakali Aia Gadang, Sakali Tapian Barubah

Sakali Aia Gadang, Sakali Tapian Barubah

Oleh: Eka Meigalia*

Kito lah masuak pulo di musim paujan. Babarapo hari ko ujan cukuik labek ampia di sado daerah di Sumatera Barat ko. Kapatang ujan labek tu sampai mambuek longsor jo banjir di banyak tampek, sarupo di Kacamatan Tanjuang Raya Kabupaten Agam jo Kacamatan Koto Parik Gadang Diateh Kabupaten Solok Selatan. Salain karano curah ujan nan tinggi, longsong tantu ado hubuangan juo jo parangai manusianyo. Utamonyo nan indak pandai manjago alam sakitarnyo.

Masalah curah ujan nan tinggi sampai mambuek longsor jo banjir ko sabananyo dak bakaik jo papatah “sakali aia gadang, sakali tapian barubah”. Tapi sangaik tapek dijadian acuan untuak mancaliak apo nan tajadi katiko aia gadang tibo. Mako kito dapek mancaliak mukasuik nan tasurek dari papatah tu.

Pado ungkapan “sakali aia gadang” ado kato sakali, aia, jo gadang. Kato sakali adolah kato panunjuak bilangan nan aratinyo samo jo ‘satu kali’ dalam bahaso Indonesia. Kalau dalam bahaso Minang indak disabuik pulo ‘ciek kali’, tapi tatap disabuik ‘sakali’. Kato sakali ko bisa juo aratinyo ‘suatu wakatu/ maso’.

Salanjuiknyo kato aia nan bahaso Indonesianyo samo jo air. Kato aia diagiah kato gadang sasudahnyo. Gadang samo jo ‘besar, banyak’. Mako aia gadang mukasuiknyo adolah aia nan banyak, gadang, dan dapek juo disamoan jo ‘banjir’ dalam bahaso Indonesia. Di Minang ado pulo istilahnyo ‘galodo’ untuak manyabuik aia gadang nan tibo tu.

Sasudah “aia gadang” mako “tapian barubah. Tapian ko mukasuiknyo adolah tampek nan dangka di tapi batang aia atau sungai. Biasonyo dipakai urang untuak tampek mandi atau mancuci. Barubah aratinyo manjadi balain atau babeda jo nan sabalumnyo. Jadi tapian nan jadi tampek mandi atau mancuci tu balain jo nan sabalumnyo.

Bakaik jo aia gadang tadi, tantu nan mambuek tapian tadi tu barubah adolah karano aia gadang nan tibo. Dapek kito bayangan apo nan tajadi di batang aia katiko aia gadang tibo. Tapian nan dangka samulo dapek sajo barubah manjadi ndak dangka lai. Dapek juo hilang nan dangka tadi. Tapi dapek pulo nan samulo ndak dangka, sasudah aia gadang tibo manjadi dangka tampek tu. Sadonyo baliak ka aia gadang nan sakali tibo, sakali tapian barubah.

Mukasuik nan tasurek dari papatah tu adolah sarupo nan dijalehan di ateh. Dapek kito caliak diantaronyo dalam penelitian Farah Sahara jo kawan-kawan tahun 2013 nan ditulih dalam Jurnal Rekayasa Sipil Vol. 9 No. 2. Farah jo kawan-kawannyo ko manjalehan apo nan tajadi di daerah aliran Batang Aia Limau Manih akibaik galodo tahun 2012. Katonyo Batang Aia tu manjadi labiah laweh kini. Rumah-rumah nan ado di tapi Batang Aia tu rusak-rusak karano aliran aia tu barubah jo batambah leba. Mako sasuialah jo apo nan disabuik dalam papatah, “sakali aia gadang, sakali tapian barubah”.

Tapi mukasuik nan tasurek dari papatah tu ndak bahubuangan jo aia gadang atau galodo tadi. Bagi urang Minang, papatah tu manjalehan bahaso dalam hiduik tu akan ado taruih parubahan. Nan tatap tu ndak akan ado. Karano iduik taruih barubah, mako satiok individu itu dituntun untuak dapek manyasuaian diri ateh parubahan tadi tu.

Parubahan itu juo dapek disababkan dek dua hal. Ado nan kahandak dari alam, ado pulo karano harus barubah karano ado nan dibutuahan. Kalau kahandak dari alam misalnyo karano aia gadang tadi. Manusia indak ado kuaso malawan kahandak alam tu. Kok tapian mandi nan barubah, manusia hanyo harus manyasuaian diri jo kaadaan tu. Kok biaso mandi mancuci di ciek tampek, mako kini harus maaliahannyo ka tampek lain. Atau nan biaso tingga di tapi batang aia, tapaso harus pindah jo manyasuaian diri baliak untuak iduik di tampek nan baru.

Parubahan nan tajadi karano dibutuahan tu misalnyo panggantian pamimpin. Pamimpin ko baiak dalam kaum atau juo di instansi-instansi pemerintahan sipaiknyo indak untuak salamonyo. Tantu ado bateh wakatunyo urang barado di satu posisi jabatan. Presiden sajo bisa manjabaik hanyo limo tahun dalam ciek periode. Kok lai tapiliah baliak, bisa manjabaik sakali lai. Tapi ndak bisa labiah dari duo periode.

Katiko pamimpin batuka, tantu banyak hal pulo nan batuka. Ado aturan-aturan baru nan dibuek dek pamimpin nan baru ko. Urang-urang nan mambantu di sakaliliangnyo pun akan nyo tuka. Sabagai urang nan ado di lingkungan itu, tantu harus bisa manyasuaian diri, mambiasoan diri jo apo parubahan nan dibuek tu. Tapi dalam hal iko indak pulo bararti pamimpin ko dapek sakandak atinyo mambuek aturan jo kabijakan.

Jadi urang Minang tu memang dituntuik untuak dapek manyasuaian diri dimano pun barado. Katiko marantau, jauah dari kampuang sarato sanak sudaro, urang Minang harus baraja untuak batahan iduik. Bisa mancari kawan jo sanak sabanyaknyo di tampek nan baru tu. Caronyo tantu jo manyasuaian diri jo kabiasaan-kabiasaan di tampek nan baru tu. Baa caro urang iduik, makan, sarato bagaua, itu lo nan disasuaian. Tujuannyo supayo iduik tatap bisa dilanjuikan biapun ado nan barubah. Sarupo jo papatah di ateh, “sakali aia gadang, sakali tapian barubah”, biapun tapian lah barubah, nan kahidupan di tapian tu tatap harus dilanjuikan. Tatap harus bajalan sarupo biaso, tapi harus disasuaian jo apo nan barubah tadi.

*Dosen Sastra Minangkabau Universitas Andalas