HOME LANGKAN CARITO


  • Kamis, 7 November 2019
Panyasalan
Carito

PANYASALAN

 

Oleh: M. Nanda Arisandi*

 

Dulu ado saurang anak mudo kampuang banamo Leman sia urang yang indak tau jo inyo, pareman kampuang yang karajonyo ampia tiok ari kadang mambuek rusuah di kampuang. Dek karano apaknyo urang tapandang di kampuang kamari basagan jadinyo, mangko urang indak acuah ka inyo. Kadang lah sampai ka Apaknyo parangai anaknyo nantun, Tapi baa lah anak lah gadang alah payah diajari.  Dari pagi sampai lah sanjo pulo ari karajonya malala indak katantuan juo, kok lah malam hari bamain karateh koa di kadai. Sampai mandehnyo lah berang managahan anaknyo tu tapi indak juo barubah do. Sanjo ari mandehnyo sadang manjaik, tibo lah Si Leman ko ka rumah nio mintak pitih ka mandeh nyo. “ Mandeh, oi Mandeh minta denai pitih lah Mandeh. Iko denai nio pai kalua Madeh jo Si Pilai nio ka Kadai” kato Si Leman ka Mandehnyo.“ oi nak, alah bamain juo tu, apo nan ka dapek di sinan juo ?. Mandeh indak ado mamacik pitih do.” kato Mandeh manasehati Si Leman. “Aden nio bamain jo kawan-kawan dennyo Mandeh, apo loh salahnyo ?” jawek Si Leman. Dak lamo kaluah lah Apaknyo Si Leman dari biliak, dek mandanga baheboh-heboh Mandehnyo.“ Apo juo nan ang mintak lai, patang ko baru den agiah ang balanjo kini ang mintak lo baliak ka Mandeh ang ?. Dari pado mode iko juo parangai ang rancak marantau la ang lai lah. Ang caliak anak si Ujang Taduang tu hah, lai banyak anaknyo indak ado inyo manyusahan urang gaeknyo do, ang surangnyo mode  iko bana parangai ang”  berang apak Si Leman maajai anaknyo.“ Aden, kamari nio mintak pitihnyo. Dak usah Apak bandiangan den jo urang lain tu do” jawek Si Leman malawan ka Apaknyo sambia pai maninggan rumah.

            Di malam hari sasudah tu duduak lah Si Leman di Kadai baliak, urang alah mulai rami nan tibo dikambangan karateh koa sia nan ka bamain di kadai malam tu, dak lamo tibo Si Pilai di Kadai tu Nampak Si Leman sadang managuak kopi, indak sato bamain koa.“  Oi Leman, baa kok ndak sato ang main kini. Biasonyo lah lamak she galak ang bamain ?” tanyo Si Pilai ka bakeh Si Leman. “ Sadang maleh bana den bamain kini, dak ado nan jaleh pangana den do” jawek Si Leman. Alah abih lo ari di Kadai, alah mulai pai urang baransua surang-surang ka rumahnyo. Bak itu juo Si Leman jo Si Pilai bajalan lah kaduo nio pulang karumah surang. Di tangah jalan batanyo Si Pilai “ Apo juo nan ang pikian man ?, dari Kadai tadi indak kalamakan seh mungko ang Nampak dek den.”. “ Aden sudah ba heboh jo Apak den tadi sanjo, dek den acok mintak pitih” jawek Si Leman. “ Oh masalah pitih, kok pitih nan ang sabuik ikuik ang jo den lah.” Pai lah Si Leman maikuikan Si Pilai malam tu.

            Ditangah malam nan kalam ari, sampai lah kaduonyo di mungko rumah yang gadang di Kampuang sabalah. Kironyo buruak lah ajakan Si Pilai diajaknyo Si Leman ma rapok rumah urang kayo di Kampuang sabalah. Lamo kaduonyo saliang badebat, akhianyo dek bujuak Si Pilai ko pai lah Si Leman maikuikan Si Pilai marampok rumah  urang kayo tu, alah labek juo rumah tu diintai dek Si Pilai. Kironyo tadanga kaba pagi arinyo, urang rumah tu pai juo maninggakan rumahnyo hari tu, mangko dek nio Si Pilai nio marampok rumah tu juo bapikia pasti lai aman, apo lai kini ko Si Leman ikuik sato jo inyo. Alah nampak rasonyo ka untuang gadang, masuak lah kaduonyo lalu ka pintu balakang diungkiknyo pintu masuaklah ka dalam kaduonyo. Diusai kasado alai paragaik, barang nan baharago dibao dek kaduonyo alah cukuik rasonyo pailah kaduonyo nio bagageh kalua, katiko kalua dari pintu alun jauah malangkah nampak den urang kaduonyo, diimbau dek urang maliang balari lah kaduonyo indak tantu arah. Lah malan dek Si Leman sadang balari tatungkuik kironyo  dapek dek urang kampuang abih badan ditangani urang, nan Si Pilai alah lari jauh maninggaan. Akhianyo dibaok lah Si Leman ko di panjaro dek urang kampuang sampai berita ko ka Urang gaeknyo, sampai malu kaduonyo dibueknyo. Alah ta coreng arang di kaniang.

            Di Pinjaro lah Si Leman, alah malang nasibnyo kini, indak ado urang yang paduli jo dirinyo kini lai. Manyasa jo apo nan inyo lakuan, ka disasaan bana alah tajadi. Maraso malu jo urang gaek dek parangai alah talampau, nio raso hati Si Leman nio basobok jo Apak samo Mandehnyo nio maminta maaf ka liau. Tapi nan ditunggu indak ado pernah tibo Urang Gaeknyo indak ado yang mancaliaknyo sakali pun. Salamo di Pinjaro lah leman mulai sadar jo dirinyo, di sanan lah inyo mulai barubah hari demi harinyo.Alah mulai baraja mangaji jo sumbayang, sampai satiok harinyo inyo badoa ka tuhan supayo Urang Gaeknyo nio mancaliak nyo ka Pinjaro, kok surek alah ado ba kiriman agak sakali se mungkin kok lai kasanang hati Si Leman kironyo urang gaeknyo dak juo tibo mancaliak.

Ari alah baganti ari sampai indak taraso urang ka masuak bulang puaso. Dikumpuan kasado panhuni pinjaro dikumpuan lah di lapangan mandanga caramah, dari saurang Buya diacara ka manyambuik bulan puaso. Nampak lah dek Si Leman Buya tadi sasudah manyampaian ceramah maminta izin lah ka panjago Pinjaro nio mangecek sabanta ka Buya. Kironyo Buya tu urang yang tingga di Surau yang indak jauh dari rumahnyo. “assalamualaikum Buya, iko awak Leman buya, anak dari Manderiah. Lai takana juo ambo dek buya.” Sapo Si Leman ka bakeh Buya tu. “ Wa’alaikumsalam . ondeh wa ang Leman, apo lah nan tajadi dek ko yuang” tanyo buya aka Si Leman. “ Iko lah buya dek parangai nan buruak mangko baliaknyo buruak pulo ka badan, bia iko jadi pangajaran dek awak Buya, yo buya kok babaliak buya beko minta tolong sampaian maaf awak ka bakeh Mandeh jo Apak buya. Walau inyo baduo indak nio mancaliak awak Buya ” sasudah manyampaian pasan tu baraliak lah Si Leman ka dalam ruang Pinjaro. Sampai tiok hari kadang Si Leman ba ibo ati, di Pinjaro Sampai suatu ari sakiknyo di pinjaro indak juo ado Urang Gaeknyo nan tibo mancaliaknyo.

Pagi ari di Rumah Mandeh rudiah tadanga urang panokok pintu, dibukak lah dek mandeh Rudiah, dicaliak sia lah nan tibo di pagi-pagi ari. Kironyo urang panjago Pinjaro nan tibo nio maagiah kaba bahwasanyo anaknyo Si Leman alah maningga subuah tadi sasudah sumbayang subuah, dek karano sakik salamo di pinjaro. Langsuang taduduak Mandeh Rudiah mandanga kaba anaknyo tu. Pai lah kaduonyo mancaliak Anaknyo yang kini alah takalok indak ka Jago lai, apo guno ka sobok, bacarito saketek indak bias lai. Jo surek tarakhia Si Leman bapasan.

Untuak Mandeh jo Apak

            Kok malu lai denai punya malu mandeh, kok manyasa denai lai manyasanyo pak. Kok dipinjaro ko denai lai barubah, pinjaro ko yo sabana kalam, indak ado yang bisa denai caliak do. Kok kalua denai indak bisa ndak bisa mancaliak, hanyo tibo Apak jo Mandeh nan denai haroknyo. Kok di Pinjaro ko denai kini kanai hukum bia lah, tapi jan hukum pulo denai taragak  Mandeh jo Apak. Hampia tiok hari denai badoa Mandeh maminta sakali juo denai nio basobok tapi indak juo do mandeh. Sampai sagitu bana denai buek malu pak.

            Sakik denai disiko ka sia denai mangadu, kok iyo kini kito ndak basobok bia lah mandeh Leman tunggu sampai wakatunyo tibo, sakali lai maafan lah denai Mandeh, Apak.

Leman

Pacah tangih kaduonyo, sasali tiado guno lai. Pasan surek dulu bacampakan kini pasan surek batangisi. Itu lah pasan akhianyo Si Leman nan nio sakali sajo basobok jo Mandeh samo Apaknyo walau basobok indak bacarito jo surek Leman mangadu.

*Mahasiswa Sastra Minangkabau Unand


Wartawan : M. NAnda Arisandi
Editor : bahren

Tag :# Langkan # curito #minang