PADUSI ALANG-ALANG

HOME LANGKAN CARITO


  • Jumat, 7 Februari 2020
PADUSI ALANG-ALANG
Carito

PADUSI ALANG-ALANG

OLEH: BAHREN*

 

         Sasudah manyurah tantang padusi bungo cangkeh duo minggu nan lapeh, sarato padusi lawah-lawah ka Ajo Sutan minggu kalamari. Mako batambah sumangaik lah Ajo Sutan nak tau jinih jo ragam padusi lain, nan ado manuruik pandangan kito di Minangkabau ko. Tantu sajo, jinih jo ragam padusi tu langkok jo pituah nan manyaratoi jinih padusi nantun. Dek ulah raso panasaran tadi, pagi kini bagageh lah Ajo Sutan ka lapau Kamek nak mancari Mak Katik. Sarupo nan taralah, Mak Katik biasonyo duduak mangopi di lapau Kamek ko sabalun mangakok karajo nyo di ladang.

         Agak capek dari nan taralah langkah Ajo sutan ka lapau Kamek, liau takuik agaknyo, kok lah barangkek Mak Katik ka ladang. Untuang sajo, pagi ko mak katik indak pai ka ladang, dek ulah badan e, agak dangai taraso pagi nangko. Kasampatan lah dek Ajo Sutan nak batanyo-tanyo ka Mak Katik. O Mak Kati, sapo Ajo Sutan ka Mak Katik, Iyo ambo, jawek Mak Katik ka Ajo Sutan. Biko mah Mak, galik tangaran dek ambo, salain padusi bungo cangkeh jo padusi lawah-lawah ado pulo urang nan manyabuik-nyabuik padusi alang-alang Mak. Iyo koh bitu Mak? Bari jawek tanyo ambo Mak.

         Ooo bitu, Sutan. Memang iyo Sutan, galik tadanga dek awak istilah padusi alang-alang atau padusi layang-layang. Tapi apo bana padusi alang-alang tu, biko mamak ambo dulu manyurahkannyo kapado ambo, Sutan.

        

Kalau padusi nan palala

Padusi banamo alang-alang

Katiko dapek angin nan salasai

Tabang nak tinggi dari gnuang

Nak satampuak jo bintang timua

Gilo malenggok ilia mudiak

Pai tak ado nan di anta

Pulang tak ado nan dibaok

Bumi bulek alam bapaliag

Jikok iradaik mahandaki

Dihoyak topan jo badai

Karateh cabiak bingkai lah rarak

Namuah nyo carai jo pingalan

Pado tasangkuik ateh rumah

Itu padusi nan palala

 

Inti dari surah itu agaknyo, mambari ibaraik ka kito nan basamo baso ado jinih padusi nan palala, namonyo padusi alang-alang. Padusi nan masuak ka dalam jinih iko iyolah padusi nan indak sanang di rumah mako diibaraikkan lah jo padusi alang-alang tadi. Padusi nan jinih takah sarupo iko bapantangan agaknyo bapitih banyak atau agak balabiah razakinyo. Mako kutiko itu juo, sagalo nyo ka diaru jo dijajak nyo. Mako limbak nan dari pado itu, nan namonyo padusi alang-alang iyolah tipe padusi nan palagak sarato panggaya. Bukannyo indak buliah ikuik sato jo mode sarato gaya nan sadang manjadi tren mukasuiknyo Sutan, tapi labiah dari itu, padusi alang-alang ko alah talampua talewat bateh. Kadang-kadang lah gadang pulo pasak dari pado tiang dek ulah mampaturuikkan gaya. Giilran lah tajadi nan bak kian susah lah kito manyalasaikannyo. 

Untuak itu, alah sapatuiknyo lah kito sabagai ayah dek anak-anak kito, mamak dek kamanakan mambari tunjuak sarajp pangajaran ka anak jo kamanakan kito supayo mereka indak tamasuak ka jinih padusi nan bak kian, ko bil khusus ka anak jo kamakan nan padusi ko Ajo Sutan. Mudah-mudahan lah Mak Katik, jikok lai ado juo nan manusrah nan bak kian, tantu batambah juo ilimu sarato pangana kito. Labiah nan dari itu Mak, dapek pulo lah kito nan masih mudo ko manyampaikan tantang rancak sarato arif bijaksano nyo adaik kito Minangkabau.

        

 

*DOSEN SASTRA MINANGKABAU UNAND


Wartawan : Bahren
Editor : bahren

Tag :# Langkan # curito #minang  

SASAMPIK-SAMPIK BALAI ANAK RAJO LALU JUO
MADA
Maminteh ka ulu, mangaja ka balakang
Maminteh ka ulu, mangaja ka balakang
PITUAH KUCIANG II
PITUAH KUCIANG I
LABUAH SAMPIK
TUO ADAIK
PADUSI LAWAH-LAWAH