HOME LANGKAN CARITO

  • Rabu, 6 November 2019

Pado Hiduik Baputiah Mato, Elok Mati Bakalang Tanah

Carito
Carito

 

Pado Hiduik Baputiah Mato, Elok Mati Bakalang Tanah

Oleh : Filla Anggelia Putri*

 

“Pado Hiduik Baputiah Mato, Elok Mati Bakalang Tanah”, bantuak ko lah kiro-kiro hiduik Si Bujang Geleang kiro-kiro. Bujang Geleang ko tingga sabatang kara, anak yatim jo piatu, lai punyo dunsanak tapi indak dapek batenggang indak dapek bagantuang, dunsanak lai kayo rayo, urang nan lai bapitih, sarato lai urang nan tapandang juo, namun limbak nan dari pado  itu indak tatolong kamanakan nyo. Indak  lai ta silau sasakali, indak dicaliak-caliak, hiduik surang indak punyo apo-apo, hiduik bansaik. Inyo kini lah manjadi urang nan paliang mularaik nan kato urang kampuang, sajak ketek hiduik surang alah tabiaso hiduik susah, indak mamintak kian kamari, namuah bakarajo apo sajo, indak maraso malu jo sado karajo nan dikarajoannyo, namun bak itu  Bujang Geleang acok bana dicacek urang kampuang, acok tahino, ka sia ka mangadu, tampek mangadu indak ado, tampek batenggang pun indak ado. Dek inyo Si Bujang Geleang alah musikin, indak pulo punyo apo-apo, indak ado nan nio bakawan jo inyo.  Hanyo ado surang nan namuah bakawan jo inyo, sia bana urang nantun, liau banamo Buyuang, Si Buyuang ko nan acok mandanga apo sajo parasaian Bujang Geleang ko.

Pado suatu katiko, wakatu Bujang ko jo si Buyuang ka pai mamanciang ka batang aia, di dalam pajalanan basoboklah kaduonyo jo Siti, Siti ko tasabuik bana di kampuangnyo, gadih rancak nan elok budi, elok tutua kato nyo, tapi nyatonyo apo nan dikecek an urang kampuang indak ado nyatonyo, gadih rancak tapi indak punyo sopan santun, baitu lah disabuik saharusnyo. Wakatu tu pulo Siti ko handak pai ka balai jo kawan-kawannyo, si Nur namonyo. Kaduonyo maota-ota sambia tagalak-tagalak di pajalanannyo. Di tangah jalan basobok lah Bujang ko jo Siti. Ondeh mandeh yo sabana rancak adiak nan mamakai baju merah ko, yo tadayo hati ambo mamandangnyo, baitulah kato Si Bujang ko. Mandanga nan bak kian mangecek Siti ko, Ondeh da oi, usahlah denak uda rayu, uda caliak uda pandangi lah diri uda lai sapatuiknyo uda marayu denai, mandanga kato nan bak kian yo sakik bana rasonyo didalam dado, ramuak lah jantuang kiro-kiro. Bakato pulo si Buyuang ko, Oi diak indak buliah bakato bak kian, kana hati urang nan ka sakik diak, indak di dangakan Siti langsuang pai bajalan.

Indak galok indak hujan, badarai-darai aia mato Si Bujang ko, indak ado harago dirinyo dek padusi nan tu, mangecek lah Si Bujang ko ka Si Buyuang, lah nyo pijak harago diri ambo, indak mukasuik ambo marayu, ambo hanyo menyampaikan apo nan apo liek, indak cukuik urang kampuang sajo nan indak mamandang harago diri ambo, jo padusi juo indak mamandang harago diri ambo, indak ado gunonyo ambo hiduik lai ko Buyuang. Mandanga nan baitu bakato Si Buyuang nan ko indak usah didanga bana indak udah di ratok'i, Tuhan indak mamandang umaiknyo dari harato bando, basaba sajo lah Bujang dulu.

Barisuak harinyo, Buyuang pai karumah Bujang Geleang ko baniaik nio mambaok Bujang pai mamanciang, dek kapatang indak jadi pai karano sakik hati Si Bujang ko, lah sampai di rumah Bujang ko, takajuik si Buyuang nan ko mancaliak Bujang di biliak nyo basimbah darah, manangih Buyuang mancaliaknyo, talambek bana ambo tibo, yobana nyo buktian apo keceknyo ka ambo patangko. Mandanga kaba Bujang bunuah diri, mangko manyasa si Siti ko alah mangecek kasa ka bakeh inyo kapatang tu, nasi alah manjadi bubua, hanyo panyasalan nan tingga.

 

*Mahasiswa Sastra Minangkabau Unand


Wartawan : Filla Anggelia Putri
Editor : bahren

Tag :#langkan # carito #Minang

Baca Juga Informasi Terbaru MinangSatu di Google News

Ingin Mendapatkan Update Berita Terkini, Ayu Bergabung di Channel Minangsatu.com