HOME LANGKAN TINGKOK

  • Selasa, 12 November 2019
Padang Magek
TINGKOK

Padang Magek

di Luhak Tanah Data

Oleh Bahren*

 

Iyoooo…bajalan lah tigo datuak

Bajalan nan dari Pariangan

Handak mambukak lahan nan baru

 

Apokoh bana mukasuik datuak

Bajalan bairiang-iriangan

Di lahan baru nan dibukak tu

 

Datuak Tuo jo Datuak Sati

Cukuik tigo jo Datuak Magek

Dangakan molah samo  kanti

Bia disurah bagulambek

 

Bakisah molah A.S. datuak Majo Dirajo, Bakisah liau di Padang Magek. Tanggal duo puluah maso itu dalam tahun duo ribu tujuah. Limo puluah anam umua liua maso itu kutiko bakisah tantang Padang Magek ko, ka Ivan Adilla liau bacurito. Danga kan malah elok elok, simakkan bana baiak-baiak baa mangko nagari banamo Padang Magek.

            Bagulambek liau bakisah kabakeh Ivan maso itu. Tasabauik lah maso daulunyo Adolah tigo niniak moyang kami turun nan dari nagari Tuo Pariangan. Sia bana niniak nan tigo iyolah Datuak Sati jo Datuak Tuo tigo sarato Datuak Magek Parang. Dalam bajalan maso itu, Datuak Magek mambaok padang untuak ka panabeh jo pamutuih samak nan ado di sakuliliang. Dek lamo lambek bajalan sampailah Datuak Magek nantun di sabuah padang nan lueh. Lueh nan indak alang kapalang salaweh mato mamandang baitu bana laweh padang nantun.

            Mako baranti lah Datuak Magek di situ, mambukak lahan jo mandirikan rumah tampek tingga. Habih hari baganti minggu. Minggu lalu bulan pun tibo. Urang nan batambah rami juo. Mako dan dari pado itu daerah nan lah rami nantun dibari namo lah dek urang jo Padang Magek. Sabagian urang mambari arati Padang Magek ko jo Padang nan laweh punyo Datuak Magek sabagi lai urang bapandapek Padang Magek ko jo Padang punyo Daruak Magek.

            Limbak nan dari pado itu, ado pulo pamukiman nan lataknyo di daerah nan agak katinggian nan katiak, kami di siko manyabuik nyo jo Guguak Katiak. Katiak dala baso kami disiko samo jo ketek dalam baso Minang rang nan banyak. Ado pulo pamukiman nan talatak di daerah guguak nan labiah Gadang, kami disiko manyabuik daerah nantun jo Guguak Gadang. Ado sabuah guguak lai nan layak nyo agak ka baruah, rang di siko manyabuik tampek nantun jo Guguak Baruah.

            Samantarao ado tampek nan banyak ditumbuahi dek batang Pauh jo batang Patai, mako banamo lah kampuang tu kini jo Pauh sarato Patai. Ado sabuah tampek lain nan lataknyo di tanah nan gantiang nantun, urang kami di siko manyabuik daerah nan di gantiang tu jo namo Gantiang. Baitu bana kisah nan ambo dapek dari mandanga curito rang tuo-tuo nan daulu. Lain nan dari pado itu, curito nan ambo dapek pulo kami di siko rang Padang Magek basuku Supanjang jo Malayu, suku Caniago jo Badi Jantan sarato suku Baodi Batino.

            Baitu bana kisah diurai, dek baliau A.S Dt. Majo Dirajo. Kok ado kisajah jo curito nan indak bana sarato salah. Maklum lah dek dunsanak pambaco kasadonyo, ambo nan hanyo manusia, tampek nyo salah jo jangga bahimpunnyo. Kok ado nan batua sarato bana tantang kisah nan dibaco, tantu kabanaran nan datang dari tuhan, Allah taalah kayo sungguah, tampek sagalo ilimu bahimpunnyo. Kapado dunsanak maaf di mintak kabakeh Tuhan ampun dipinto.

 

*Dosen Sastra Minangkabau Universitas Andalas


Wartawan : Bahren
Editor : bahren

Tag :#Langkan #Tingkok #Asa #Usua #Nagari #Minangkabau