Malala Ka Gandoriah

Malala ka Gandoriah

Oleh: Mesy Triana Dewi

Ndak dikana-kana hari lah akaik pulo. Jadwal kuliah hari akaik ko ndak ado, baitu pulo kegiatan di lua kampus, sabana sanang hati soe, sahari ko dapek malala jo kawan-kawan. Hari nan ditunggu-tunggu sajak sinayan, raso ka ba’a hari ko baganti jo hari akaik supayo bisa main ka tapi pantai gandoriah, tampek biaso duduak jo kawan-kawan tiok hari akaik.

Kini hari lah manunjuak an pukua 10, biasonyo kawan-kawan lah maagiah kaba dima ka duduak siang beko, tapi antah takalok, antah ba’a ko lah, ndak ado nan maagiah kaba surang alah e do. Dek ndak ado kaba, Esy tintiang manyasah baju untuak ka dipakai kuliah sanayan lu, dek baju nan ka dipakai lah abih pulo. Abih juo wakatu satangah jam manyasah baju kumuah ko. Sasudah manyasah Esy bahe maluruihan pinggang sabanta, ndak lamo sudah tu badariang hp ko, rupoe talepon dari si Mike mangaba-an beko siang awak duduak ditampek amak nun di sabalah kadai kak Ina tampek awak biaso bali langkitang jo pisang kapik.

 Tabasuik pangana Esy batanyo ka si Mike b’aa kak Ina ndak manggaleh, biasoe tiok minggu galeh e nan paliang banyak?

Antah,tadi Ike lewat samo ibu di sinan tadi kadai kak Ina ndak babukak do (jawek Mike)

Oo jadilah Ke, alah ba kabaan ka si Nisa jo si Via awak duduak tampek amak nun? beko mancaliak kadai kak Ina ba tutuik di bahe e jo babaliak dek urang baduo tu beko liak (jawek Esy agak cameh )

(Manjawek Mike) alah nyo Esy, lah dulu bakaba-an ka urang baduo tu, mandi lah Esy lai,  jam duo Mike japuik dih? urang baduo tu manunggu je di tampek Mak Nun pado bolak baliak nyo.

Jadih Ike, Esy mandi lu (jawek Esy)

Ndak bara lamo sudah tu Esy lah salasai mandi jo babadak, dicaliak hari lah pukua duo lewat, nan si Mike ko alun juo tibo lai.

Ndak lamo sudah tu tibo si Mike.

Baa kok lamo na Ke, a nan tajadi mako salamo ko na? (tanyo Esy agak cameh)

Iko Sy a, ban ko di tangah jalan boco lo tadi, tukang tumbok ban jauah lo, tu lah jauah lo mandorong tadi. (jawek Mike agak tarangah dek panek mandorong onda e)

Ndeh barantilah duduak lu, Esy ambiak an aia..latiah na bantuak e (kecek Esy bajalan arah ka dapua ma ambiak aia)

Basorak lah si Mike, Esy ndak usah lai, beko wak ka balanjo jo minun jo tampek Amak Nun nyo, keh lah pai wak lai. urang baduo tu lah lamo na manunggu beko

Barangkek lah si Esy jo si Mike arah ka pantai gandoriah, sapanjang jalan sabana angek hari, namoe jo siang hari pai malala tu yo angek badantang hari.

Ndak lamo sudah tu Esy jo si Mike tibo di kadai amak Nun, nan si Via jo si Nisa lah abih lo langkitang sapiriang ciek baduo dek e.

Baa kok lamo na tibo ko kawan, lah kanyang lo paruik kami dulu a (tanyo si Via ka Mike jo Esy)

Haha kami tadi ado urusan bisnis saketek (manjawek Esy sambia bagarah)

Haha jadi monah, a nan ka ditunggu lai pasan lah pisang kapik, langkitang jo kambia mudo dingin tu  lai, jaga mak Nun lah ka abih lai, urang dek rami nampak a (kecek si Via)

Lah samo duduak ba ampek diujuang muaro pantai Gandoriah, langkitang jo pisang kapik sarato kambia mudo nan di pasan ka mak Nun lah tibo pulo.

Lah panjang jo muncuang dek manyunyuik langkitang mak Nun nan super padeh ko..

Ota batambah lamak dek hari samakin sore, pamandangan ditapi pantai batambah rancak, duduak di muaro ko baragam nan nampak.

Mulai dari nan ka pai ka pulau nan pulang dari pulau Angso Duo,nan bacewek ado pulo. Sabana baragam kalau hari lah sore ko nan nampak.

Ota batambah lamak dek banyak nan ka diotaan, talabiah ado jo nan lain nampak bagalak an juo baru

 Pangka bala ota di siko yo si Nisa, ciek kecek galak banyak. Kok maota-an kilaki ko nan katuju bana di e ko, nan ganteng e lah, nan ba ninja e lah, Nan tiok basobok alah ado jo kilaki nan manjadi bahan pagunjiangan e.

Kok Esy jo Mike manangah je nyeh, aratie tukang galak jo kok maota ko we’e kurang nyo.

Kok si Via pulo tukang solo si Nisa maota ko, baru ka maota si Nisa lah di solo e lo. Tapi walaupun mode tu bana yo sabana sanang bakawan mode ko, kok galak jo kecek sabana lapeh e nyo. Kadang amuah sakik paruik dek manahan galak.

Ndak taraso hari lah sanjo, sunset yo sabana rancak bana ko, yo sabana rancak ciptaan tuhan Allah di dunia ko. Esy jokawan-kawan bagageh mambayia jaga nan alah dimakan e tadi, sasudah mambayia lanjo e ka mak Nun, bagageh pulang ka rumah masiang-masiang lai. Nan si Mike pai ma anta-an si Esy. Nan si Ica pulang jo si Via dek rumahnyo lai sa arah.

Raso ka baa jo hari ko akaik jo rasoe bia bisa bakumpua maota lamak tapi pantai baliak sambia manyunyuik langkitang jo kawan-kawan.

* Mahasiswa Jurusan Sastra Minangkabau FIB Unand