HOME LANGKAN PEPATAH

  • Kamis, 26 September 2019
ILALANG NAN TABAKA SICEREK MANOMPANG MATI
Pepatah

ILALANG NAN TABAKA SICEREK MANOMPANG MATI

 

Oleh: Rona Almos

(Dosen Jurusan Sastra Minangkabau FIB Unand)

 

Pado kesempatan kali ko ado duo pepatah yang akan dibahas. Pepatah yang dimaksud iolah pepatah nan manganduang kato-kato ilalang. Pepatah patamo babunyi ilalang nan tabaka sicerek manompang mati. Untuk manjalehkan apo bana makna dari pepatah di ateh talabiah dulu dijelehkan makan kato demi kato dari papatah nantun. Kato patamo yang dijalekan iolah kato ilalang. Lalang atau ilalang dalam bahaso latinnyo ditulih jo kato imperata cilydrica. Ilalang iyolah sajenih tinaman nan tumbuah liar. Tinaman ko dapek tumbuh dima sajo. Jikok nyo tumbuah tinggi nyo bisa sampai 30 cm sampai 180 cm. Tapi tinaman jinih ko batang nyo ketek indak namuah gadang, jiko diukua paliang sakitaran 2 mili sampai 3 mili gadang nyo. Pucuak ilalang marunciang sarupo duri. Ilalang ko batuneh jo basisiak. Rumpun ilalang tumbuah tagak indak bacabang. Pado umumnyo tinaman ko babulu di buku-bukunyo.

Kato kadua iolah kato nan. Dalam kajian bahasa, kato nan bapungsi sabagai partikel. Partikel iolah kato nan biasonyo indak dapek diderivasikan atau diinfleksikan, nan manganduang makna gramatikal namun indak manganduang makna leksikal, tamasuak di dalamnyo preposisi, interjeksi, konjungsi jo artikel. Nan dalam bahasa Minangkabau, samo aratinyo jo yang dalam bahasa Indonesia. Kato nan pado pepatah di ateh manyatokan bahwa bagian dari kalimat yang barikuiknyo majalehkan kato yang dimukonyo.

Salanjuiknyo masuak ka kato sicerek. Sicerek ko dalam bahaso Indonesia dinamokan jo garupillai. Sicerek punyo namo ilmiah yaitu clausena excavada burm. Sicerek iolah tumbuhan nan tagak. Kayunyo bisa digunokan dek orang untuak ulu kapak, sarato pisau. Samantaro itu daunnyo digunokan dek urang untuak ubek mencret.  Sicerek acok tumbuah indak bajauahan jo ilalang.

Kato nan kaampek iyolah kato manompang. Kato manompang marupokan bantuak turunan dari kato tompang. Manompang di pepatah di ateh bararti ikuik sato. Barikuiknyo kato yang tarakhir iolah kato mati. Mati iyolah hilang nyaonyo atau indak banyao lai.

Sarupo dijalehkan di ateh tadi ilalang jo sicerek iduik badampiangan. Bilo ilalalang nan kariang tabaka, mako sicerek yang ado di dakek ilalang tadi pasti tabaol lendong pulo tabaka. Tapi kasadonyo itu bukan ateh kandak dek sicerek untuak sato tabaka dek ilalang cako. Pepatah di ateh dapek dijadikan iktibar,  baso nyo urang nan indak basalah bisa tabaok lendong dalam pakaro nan babahayo nan indak dikatahuinyo samo sakali, mako inyo akan tabao manjadi korban ateh perbuatan urang lain.

Dari papatah tadi, agaknyo alah saelok jo sapautiknyo lah awak ko bapandai-pandai dalam mancari kawan sairiang atau nan kadijadikan kawan. Kok dapek kawan nan elok. Mako elok pulo lah awak jadi nyo. Kok dapek kawan nan cilako. Tabaok rendong malah badan diri. Bak cando sicerek, dek badakek an taruih tumbuah e jo ilalang. Mako sansaro badan diri katiko bancano malando si ilalalang tadi.

Talabiah jikok dimusim kariang kini nangko. Indak ado disiram bagai jo minyak tanah atau pun bensin nan ilalalng ko mudah sajo tabakanyo, apolai kok ditambah pulo jo minyak tanah sarato bensin. Antah kajadi apo keadaannyo.   


Wartawan : Rona Almos
Editor : bahren

Tag :# Langkan # Pepatah # Minang